قصة ولادتي بحبيبة عمري حنان ^^

[أم ح ــنونـہ]

السلام عليكم ورحمة الله وبركاته

ما ادري من وين ابدأ انا آخر يوم برمضان رحت افتح ملف في مستشفى الجامعه الحكومي وقالوا لازم تنويم عشان افتحه !!!
المهم وقلتلهم خلاص اوك وقالوا انتي بأي شهر قلتلهم آخر يوم بالتاسع
قالوا خلاص لازم نعمل لك فحوصات واخدو مني عينة بول وقاسوا وزني وقاسوا ضغطي لقوه مره عالي ولازم ينزلوه وعملوا فحص من تحت لقوا الرحم فاتح 2 سانتي واخدوني لغرفة لحالي وحطوا جهاز على بطني عشان يراقبوا حركة البيبي ودقات قلبها
وكل شوي يقيسوا ضغطي وجات الدكتوره بعد ساعه كده وعملت فحص تاني من تحت ولقته مفتوح 3 سانتي والراس تحت وقالت خلاص لازم تروحي غرفة الولاده
عاد انا انصدمت ما كنت عامله حسابي انه الامور تصير كده
بس كنت مبسوطه لاني راح اشوف حبيبة ماما حنونه اخيرا
ورحت الغرفه الساعه 12 وربع الصبح من دون مرافق
كنت لوحدي وهاي اسوأ شي صراحه مره تعبت نفسيتي
وبالذات لما حطوا لي الطلق الصناعي وبدات رحلة العذاب :(
اااااخ مره تعبت واتألمت وطول الوقت اصرخ ابغى امي وزوجي
وكل شوي الممرضه تقولي ممنوع ممنوع
وانا خلاص شوي واتعارك معاها
بس في الاخير استسلمت وصرت ادعي الله يسهل عليا واخلص
وجات الدكتوره وفحصتني وفتحت عليا المويه تبعت الجنين وراحت
وبعد ساعه جات تاني وفحصتني ولقت مفتوح 4 سانتي
وعلى الساعه 7 ونص الصبح بدأت عملية الولاده
عاد انا كنت مو حاسه بالدنيا فجاه لقيتهم يقولوا ادفعي ادفعي
وانا بس اسمع كلامهم وكل دفعه الرحم يفتح سانتي سبحان الله
لغاية ما فتح 10 ما شاء الله بس طولت شويه وانا ادفع لأن الوجع كان يروح ويجي
ولما قالت الدكتوره ادفعي بكل قوتك لأن الجنين تعب
دفعت لغاية ماحسيت اني راح اموت وعلى الساعه 8 وربع الصباح
جات حبيبة قلبي على الدنيا وحطوها على صدري
وبعدين اخدوها وحمومها وجابوها وشفت وجهها كانت بيضاء كانه عليها بودره
وبعدين اخدتها الممرضه على العنايه لأنها كان عندها مشكله في التنفس
وانا نمت وصحيت لما الممرضه بدها تخرج المشيمه وبعدها نمت تاني
وصحيت على الدكتوره وهيا تخيطتني
وقالت راح اعطيك بنج والحمد لله كانت ايدها خفيفه وما حسيت بشي
وبعدين رحت على غرفتي ولقيت امي وزوجي يستنوني وحضنتهم وبكيت
وسألتهم على النونو قالوا في العنايه بس حالتها تحسنت والحمد لله
وطبعا ما خرجوني على طول لأن ضغطي كان عالي
وبقيت اربع ايام في المستشفى وما شفت بنتي الا بعد يومين من الولاده
ولما قالولي خروج قالوا انتي بس والنونو لازم تبقى كمان يوم
بس طمنوني عليها وكانوا شايلين كل الاجهزه عنها
وخرجت من المستشفى وقلبي خليته مع بنتي مو عارفه انام وهيا بعيده عني
ورحت تاني يوم جري على المستشفى عشان اخدها للبيت
بس قالوا لازم ترضعيها اول بس المشكله ما كانت راضيه ترضع مني
وقالوا لازم تبقى لغاية ما تعرف ترضع منك ونطمن بس انا رفضت
واصريت اخدها معايا البيت وقالوا خلاص تخرج بس على مسؤوليتكم
وزوجي قلهم خلاص راح اخرجها على مسؤوليتي ووقعنا على الاوراق
ورجعنا البيت مع حنونتي القمر والحمد لله صحتها زي الفل
صح للآن مو راضيه ترضع مني بس بحاول معاها كل يوم
وان شاء الله ربي يهديها
بس اهم شي انها عندي وفي حضني
والحمد لله على كل حال