هل السفر خطره لوحده حامله

[عآشقة الجنآن]

السلام عليكم ورحمة الله وبركاته

كيفكم يااخوات ؟؟؟انشاء الله انكم بخير وبصحة وسلامة

كل عام وانتم بخير بقدوم شهر المبارك شهر العبادة

ابي اسألكم يااخوات

شهر شوال زواج خالي والله يتممها على خير وانا حامل وراح اخلص شهر الثاني وادخل الثالث

هل السفر مضر لي وخاصة السفر طويل تقريبا 7 ساعات

وزوجي يقولي لاتسافري بس هذا زواج خالي الصغير وابي اروح حتى لو منعتني الدكتورة

هل السفر مضر لي ولا لا؟؟؟

بسافر مع زوجي لوحدي يعني اقدر اخذ راحتي وزوجي مايقصر معي

وش رايكم اسافر بالسيارة ولا بالطيارة؟؟؟وشكرا

[عروستة]

والله يا اختي طبعا الطياره افضل لك لأنك حامل .. السياره ماترومي المطبات و ترييين توصلين وايد 7 ساعات

[ρυяỉтч •]

شوفي انا يا كثر ماسافرت وكنت اسافر لشرقيه وتبعد عننا 1200 كيلو متخليه
ابدا افرش لي بالسياره ورا واحط راسي وانام .. والحمدلله ماصارلي شي
والحين حامل وكل اسبوع نازله لاهلي 400 كيلو ، وربك الحافظ يا قلبي
اذا الطياره متاحه هي افضل .. واذا مو متاحه استخيري واعزمي وروحي شوفي خالك عريس
هو كل يوم بيعرس يعني ..

[جرة عسل]

اذا تقدري تسافري طائرة اكيد افضل
واذا بتسافري سيارة استخيري ياقلبي
واذا ماكنتي مرتاحه لاتسافري
حملك وجنينك اهم من السفر واكيد بيعذرونك
لان انا سافرت مسافه 250 كيلوا وجاتني افرازات بنيه كنت بموت خوف وانا في نهايه الثالث

قالت لي الدكتورة السبب الاجهاد
الله يكتبلك مافيه الخير

[عآشقة الجنآن]

الله يجزاكم خير ع ردودكم

بس هذا اخر خالي ونفسي احضر الزواج وزوجي راح يفرش لي وراء السيارة عشان اخذ راحتي

بس اهل زوجي يقولون لي لاتسافري ماصدقنا انك حملتي وتبين تنزلين الولد اما عن الزواج مو لازم تحضري

كلامهم قاسي بس زوجي قالي لو تبين بوديك نفسي ماتروحين مع احد وهو اللي واقف معي

الطيارة اخاف منها اما السيارة هو معي يقدر يونسني الين مانوصل صح الطريق طويل بس اجلس 4 ايام وارجع بعد ما يخلص الزواج

[ملكني الهدوووء]

حبيبتي اذا ربي كاتب لك بثبوت الجنين راح يثبت مهما حصل
بالنسبه للسفر عادي بس لاتسرعوا
عارفه انا اسبوعيا مابين جده والمدينه افرش ليا ورا
ومخففين السرعه وكل ماحسيت بتعب بجسمي نوقف وامشي شوي
عشان اغير من وضعيتي والحمدلله الحين بالثامن
والله يكتب لك اللي فيه الخير وتشوفي جنينك بين ايدينك وتنبسطي فيه

[عآشقة الجنآن]

انشاء الله والله يجزاك خير يااخت (ملكني الهدوء) ع مرورك

وانشاء الله راح اسوي مثلك بس زوجي خايف علي

وزوجة خالي الكبير لما تزوجت حملت وكانت جايه عند امها في الطائف وسقط الجنين وماحملت بعدها الا بعد 3 سنوات عشان كذا امي خايفة علي وتقولي مو لازم تسافري وانا محتارة مرررة

[ملكني الهدوووء]

الله يحنن قلب زوجك عليك اكثر واكثر

لكن ياقلبي هذا بيد الله

وربي لو تجلسي ع فراشك طول الوقت وربي ماكتبوا لك ماراح يثبت

وبعدين كل حمل يفرق عن حمل

اتوكلي ع الله

واذا محتاره مرا استخيري

[عآشقة الجنآن]

مشكورة اختي زوجي قالي خلاص دام انك تبين تروحين الزواج راح اخذك وانشاء الله مايصير لك شي

حتى خالتي حامل وراح تروح الزواج يعني مو بس انا حامل

ومثل ماقولتي كل حمل يفرق وربي يثبت لي الحمل لي ولك انشاء الله وتولدي بالسلامة انشاء الله

[q6wah]

أختي توكلي ع الله وروحي .. وقولي دعاء السفر واستودعي نفسك وزوجك وان شاءالله تروحون وترجعون بالسلامه