تجربتي كاملة في الولادة القيصرية بالبنج النصفي بمستشفي سليمان فقية بجدة

[Neven]

السلام عليكم ورحمة الله وبركاتة
ازيكم يا احلي قمرات
انا جيالكم النهاردة بموضوعي دة بعد الحمدالله ما ولدت بالسلامة من اسبوعين

انا كنت بسئل علطوللو فية حد ولد قبل كدة في مستشفي سليمان فقية بجدة وتحديدا لو حد ولد مع الدكتور احمدعبدالمجيد والنهاردة بقي هقولكم تجربتي كلها مع الولادة ومع البنج النصفي

اولا : نتكلم عن المستشفي
بسم الله ماشاء الله بجد المستشفي رعايتها تحفة من اول لحظة دخلت فيها المستشفي علشان يحضروني للولادة نضافة ملهاش مثيل وتعامل الممرضات كلهم بجد في منتهي الاحترام

ثانيا: الدكتور احمد
مهما اتكلمت علية مش هجيلة حقة بجد ربنا يكرمة يارب دكتور في منتهي الاحترام وبيراعي ربنا جدا وكان مهون عليا الولادة جدا وواخد الموضوع ببساطة دة غير بقي اني كنت خايفة جدا من الجرح وتقفيل الجرح والالم اللي هسحة بعد العملية لكن اقسملكم بالله ان الجرح في منتهي الجمال وهما بالضبط 3 ايام اللي حسيت بيهم بالالم وبعد كدة قمت زي الفل والجرح معمول بطريقة تجميليلة بجد ربنا يباركلة وبنصح اي واحدة عايشة في جدة تروح تتابع معاة

ثالثا: البنج النصفي
كنت محتارة جدا بين البنج الكلي والنصفي لاني ولدت بنتي الاولي ببنج كلي والمرة دي كنت حابة اجرب النصفي ولما سالت الدكتور هو شخصيا كان مرشحلي النصفي وقالي اتكلمي مع دكتور البنج برضة واول مادخلت غرفة العمليات واتكلمت مع دكتور البنج لقيتة قالي النصفي احسن برضة بس كل اعراضة انك ممكن يجيلك صداع لمدة 3 ايام ودة بيحصل بنسبة 5% بس وعلاجة اننا بناخد باندول اكسترا 3 مرات في اليوم وبنشرب قهوة تركي 3 مرات في اليوم

المهم كنت قايلة دعاء الاستخارة قبل ما ادخل ولقتني بقولة اتوكل علي الله واخد النصفي قالي ماشي
اداني الاول حقنة موضوع بنج موضوعية علشان محسش بحقنة البنج النصفي ودي شكتها عادية جدا زي اي حقنة وبعدها اداني حقنة البنج النصفي يادوبك حسيت بشكة كدة وتقل في ضهري وبعدكدة خلاص
وعلي فكرة الحقنة دي مش بتتاخد في العمود الفقري ولا في العضم زي ما معظمنا فاهم لا الدكتور قالي دي بتتاخد مابين الفقرات
وطبعا مقدرش انسي برضة دكتور عبدالفتاح دكتور البنج دة كان سكر وبجد طول العملية كان قاعد فوق راسي بمعني الكلمة جاب كرسي كدة وراح قاعد فوق راسي

الدكتور جة وقالي يالا مستعدة قلتلة اةة وطبعا انا عاملة فيها الشجاعة قوي وقلتلة علي فكرة انا شفت علي النت الولادة القيصرية وعارفة انت هتعمل اية قالي طب كويس وقعد يضحك المهم لقيتة بيقولي احنا هنعقم البطن الاول وبعدين نعملك تيست كدة علشان نتأكدة ان البنج وصل لبطنك فاستغربت الكلام قولتلة طب ما انا خلاص مش حاسة بالجزي اللي تحت خالص قالي معلش علشان نتأكد اكتر

طبعا هما حاطين ملاية بيني وبين الدكتور وقعد بقي دكتور البنج يرغي معايا ونفتح في مواضيع ونتكلم وكل دة وانا حاسة يادوبك زي مايكون حد حاطط ماية ساقعة علي بطني والدكتور كل شوية يقولي معلش انا بعقم بس الاول علشان نشتغل علي نضافة وانا اقولة ماشي ودكتور البنج كل شوية يقولة يالا بقي علشان عاوز اعمل التيست

وفجأة الاقي الدكتور يقولي
نيفين
قولتلة نعم
قالي خدي بنتك
يالهوووووووي بنتي
اتارية كل دة كان بيعمل العملية وعمال يضحك علية ويقولي اعقم البطن وتيست ولقيتهم كلهم بيضحكوا عليا والدكتور يقولي انا شغال بقالي 10 دقائق
طبعا احساس مش هقدر اوصفهولكم اول ما حطلي بنتي علي صدري بوستها وراحوا واخدينها بسرعة علشان ينضفوها والدكتور كمل بقي وقعد يرغي معايا برضة وهو بيقفل الجرح وبرضة محستش باي حاجة والله خالص
وشوية بعد مانضفوا البنت جبهولي تاني بوستها وبعدين اخدوها

وبعدين الدكتور خلص والممرضات بقي جم نضفوني وكدة وطلعوني في غرفة الملاحظة لمدة نص ساعة كدة وبعدين طلعوني علي الغرفة وكنت طالعة فايقة جدا ومش حاسة باي حاجة ،، انا دخلت غرفة العمليات 10 بالليل طلعت 11 وطلعت غرفتي علي 12 الا ربع كدة فضلت لغاية الساعة 3 الفجر مش حاسة باي حاجة لكن من بعد 3 بقي عينكم ماتشوف الا النور ههههه
ابتديت بقي احس بألم العملية بس طبعا الدكتور كان كتبلي علي مسكنات قوية بصراحة دة غير الممرضات بقي مسبونيش اليوم دة لدرجة اني بقيت اقولهم سبوني شوية عاوزة انام كل شوية واحدة تدخل اللي تقسلي الحرارة والضغط ويدوني حقنة ومسكنات وكل حاجة ممكن تتخيلوها
والحمدالله عدت علي خير هو اول يوم بس التعب وتاني وتالت يوم بقيت احسن شوية الالم طبعا كان موجود وخصوصا الالم الضهر من النومة بس مع المسكنات كلة بيعدي

بالنسبة للبيبي بقي :
نظامهم في المستشفي انهم مش بيلبسوهم اي لبس من اللي انتي جيباة معاكي هما بيلبسوهم لبس معقم من عندهم عباة عن قطعة كدة من فوق زي التي شيرت كدة والبامبرز ويلفوهم بكوفرتيتين وخلاص علي كدة ولما سألتهم طب لية كدة قالولي علشان التعقيم وعلشان ميحصلش اي عدوي
وطبعا هما رضعوا البنت لبن صناعي بس كل شوية كانوا يجبهولي ويقولولي حطيها علي صدرك علشان ترضع
بالنسبة لتصوير البيبي في العمليات ،، هو ممنوع تدخلي الكاميرا معاكي غرفة العمليات بس انا كنت ماسكة الكاميرا في ايدي واديتها للمرضة سبتها معها واول ما البيبي طلع راحت هي مصوراة وفضولوا يصورها صور قد كدة وهما بينضفوها ويلبسوها
والحمدالله ربنا رزقني ب (حلا)

دي تجربتي بالكامل في مستشفي سليمان فقية بجدة ومع الدكتور احمدعبدالمجيد
وانا تحت امركم في اي سؤال او استفسار

ادعولي ربنا يبارك لي في بناتي ويخلهوملي
وربنا يكملكم علي خير ويرزق كل مشتاقة يارب