قصتي بالحمل و ولادتي ب حبيبي "خالد" .. [[ الجزء الثاني ]]

[Senyorita]

السلام عليكم ورحمة الله وبركاته


أولاً أحب اعتذر عن التأخير بالموضوع .. لظروف خارجة عن ارادتي


~ ~ ~ ~ ~ ~ ~ ~ ~ ~ ~ ~ ~ ~ ~


اللي يحب يقرأ الجزء الأول يضغط عالرابط :


قصتي بالحمل و ولادتي ب حبيبي "خالد" .. [[ الجـزء الأول ]]


~ ~ ~ ~ ~ ~ ~ ~ ~ ~ ~ ~ ~ ~ ~


قصـة الولادة :


قبل يومين من ولادتي .. كنت منومة بالمستشفى " كـالعادة " و رخصوني أخيراً أطلقوا سراحي من كثر ماتنومت عندهم صرنا ربع يزوروني ويضحكون معاي يحليلهم النرسات ( الممرضات ) .

المهم بعدها بليلة كنت انا وامي عند بنت خالتي كانت توها حامل وانا احن على امي يلا نروح نمشي في دوحة عراد ( ممشى ) دام الجو حلو ، ومن كثر حنتي احس امي تبي تفتك قامت و ودتني ، وانا امشي واحس ظهري يتقطع من الألم مع اني مامشيت وايد .. الين ما استسلمت قلت لهم خلاص بروح البيت .

بما ان زوجي و اهله كانوا مسخنين كلهم ، كنت انام في بيت ابوي عند امي ، وبعد مارجعنا من الممشى قلت لأمي بنام في حجرة اختي تحت مافيها احد لأن مالي بارض أركب الدرج قالت اخاف اييج الطلق .. قلت لها اذا ياني بسوي لج تلفون هههههه ، يومها اكتشفت ان امي عندها الحاسة التاسعة عشر ههههههه.

نمت ، وخبركم من بداية الثامن الحامل تحتصر ودايماً في الحمام اعزكم الله ههههه ، الساعة 5 الفجر صحيت ودخلت الحمام ورجعت انبطحت على السرير .. وفجأة حسيت كأن أحد في يده قلم وطقني من تحت وجـان يهد الماااااااااي !!!

فزيت من على الفراش وانا اشهق و وقفت اطالع تحت على طول قلت ((( ماسويت شعري !!! ))) << الحمدلله والشكر ههههه ، خذت التلفون وطيران عالحمام حتى بدون ما اصك باب الحمام اكرمكم الله قلت اذا الطلق مو حامي بروح الصالون عالساعة 9 وبسوي شعري << اقنع نفسي مثلاً ؟!

ابوي دايما يمر علي بعد مايرجع من المسجد يقعدني للصلاة جان يجوف باب الحمام مشرع وانا قاعدة ( أشوة اني لابسة طويل ومغطية نفسي ، يلعن ام الاحراج ) !
قلت له يبـه قول حق امي ان نزل علي الماي .. ابوي مابين لي شي كلمني بكل هدوء .. و ركب الغرفة ويزلزل امي مسكينة نايمة "قومي بنتج نزل عليها الماي" ! وقامت واهي متخرعة تقوله " انزيــن جذي عاد تخرعني ؟" جان يقولها "بسم الله عليج .. بس قومي حق بنتج" << عقب شنو يبه حبيبي ههههه عسى الله يطول بعمرك

في هالأثناء انا للحين مكاني واتصلت بزوجي وقلت له .. تدرون شرد علي ؟ يقولي نامي وراج يوم طويل !!

ومن الخرعة انا ما ادري يصير اصلي ولا لأ .. قمت وصليت الصبح والله يتقبل خخ

يات امي وانبطحنا يازعم بنام عشان نرتاح شوي ، الله وكيلكم ولا غمضنا عيونا .. بس انبطحنا شوي بدت الآلام شوووي شوووي تزيد ، في البداية ألم الدورة الشهرية بعدين خلاااص يستوي الأكشن

أكيد تقولون ليش مارحت المستشفى على طول .. امي تقول في ولادتها بأختي العودة تمت 3 أيام في البيت من بعد مانزل عليها ماي الهادي !! يعني تو الناس ، مع اني قريت في النت ان يعني موعد ولادة .. المهم

صارت الساعة 7 وانا مو قادرة اقعد مكاني اروح الصالة اذا ياتني الطلقة امشي وامشي وامشي وبين كل طلقة اوقف و الخدامة مسكينة تهمز ظهري ( تسوي مساج لظهري ) .. وتصبرت واستحملت صارت الساعه 8 وربع هني خلاص قلت ما اقدر ودوني سبيتار ( المستشفى ) واتصلت بزوجي وقلت له تعالي 8 ونص اهو عندي وعلى الساعة 9 الا ربع وصلنا .. وانا في السيارة بين الطلقات اكتب في الواتس اب في قروب خالاتي وخوالي ان فيني الطلق ، ومحد مصدقني عبالهم اتغشمر !! لأن اذا الوحدة فيها الطلق شلون تكتب في الواتس اب هههههه

المهم وصلنا وانا للحين مانزلت من السيارة انطر الطلقة تخلص عشان انزل !! ودخلت من باب الطوارئ هههههه وياتني الممرضة تبيني اقعد على الويل جير ( كرسي المقعدين بو تواير ) وانا ياتني الطلقة مو قادرة اتحرك تيبست مكاني ..


تخيلوا ان بالذات قسم طوارئ الولادة المكيف المركزي خربان !!!! و حـررر ،
وانا بين الطلقتين دقيقتين فقط !!! احس جني بموت من الألم ماعندي الا اقول ( لا اله الا الله محمد رسول ) كأن توني داخلة الإسلام ههههه .. و يات الممرضة تشوف شكثر متوسعة تتوقعون جم ؟ 1 سم بـس شنووو ؟! كل هالألم على 1 سم بس !!! والله صدق زوجي يوم قال يومج طويل .

جفتوا كل هالألم الفظيع .. في نفس الغرفة في ثنتين معاي ، وحدة متوسعة 4 سم والثانية اكثر ، وكل وحدة حاطة ريل على ريل و هدوووء ولا فيهم آلام الطلق وانا 1 سم وحاشرتهم ههههه

اي نسيت اقولكم .. بما ان كنت دايماً فيني التهاب في البول اعزكم الله ، الماي اللي نزل مني كان فيه قطع خضرا كأنها اوراق صغار و هاذي شي مو طبيعي اكيد ، واهما ما قالوا لي شي عن الموضوع وانا نسيته لاهية بالطلق .. قالوا يمكن في خطر عالبيبي ان يختنق ومحد خبرني !

قبل يومين المستشفى كان خاااالي الموجودات في حالات الولادة ينعدون عالأصابع وعلى حظي .. يوم الولادة المستشفى فـلللل مافي مكان حتى في جناح الولادة وكانوا ينتظرون ان يفضى سرير بسرعة عشان يودوني الجناح . لاحظوا ان هالكلام ذي كله بين الساعه 9 و 10.

على الساعة 1 تقريباً فضى سرير في جناح الولادة وعلى طول ودوني انا وجيكت علي قالت 3 سم .. ياصبر ايوب على بلواه وانزين يعني متى بولد خلاص ما استحمل صار بين الطلقتين دقيقة ونص ، وضربوني ابره مخدر عشان ماتعب وايد ( مو ابرة ظهر ) .. وصرت ارقد لمدة دقيقة ونص وامي داشة وطالعه مسكينة .. واختي و زوجي و ام زوجي كلهم ينطروني ساعات يخلونهم يدخلون علي وساعات لا .. على حسب الممرضة اذا كانت حليوة ولا نحيسة .


ودقت ساعة الصفر .. الساعة 4 و عشر العصر الطلق خلااااااااااص وصل التوب في الألم واحس بالبيبي يدز وانا اقول للنرس ( الممرضة ) : Sister khalas I want to push ( سستر خلاص ابي ادز ) و قاستني والا 9 سم واخيييراً .. وعلمتني شلون ادز

لازم ايود ريولي من تحت ركبتي واخذ نفس و ادز بدون صوت عشان مااتعب واطلع طاقتي على خالي بلاش .. حزتها زوجي كان يبي يشوفني والممرضات مو مخليينه و قال لهم بدخل ولا علي منكم .. توه بيدخل الا توقفه النرس تقوله تراها خمس دقايق وبتولد .. رجع زوجي واتصل بأمي وامه مساكين في الكفتيريا ياكلون من الصبح على لحم بطنهم ، ورجعوا سريييع . ( يمكن حتى لو دخل زوجي مابيه يكون معاي وقت الولادة ما اايد هالشيء .. اخاف ينفر مني ) !

وانا يالسه ادز بقوووووة ويهي ينقلب احمر و شقت لي عشان تساعدني لين ماطلع راس حبيب قلبي خلودي .. اول ماطلع الراس اقول للنرس ها ادز بعد ؟؟ تقولي لا خلاص وسحبته حبيبي النتفة وحطته على بطني يودته حياااااتي واقولها ( ولد صح ؟ ) تقولي اي << متعقدة لأن عندها خوات وماعندها اخوان تبي ولد هههه

وبس شالته لحفته و ودته توزنه و وحق امي و زوجي وامه وانا قالت لي نامي ارتاحي .. حطت لي بنج موضعي وخيطتني ، انا حطيت لحاف على راسي عن الكشة من عقب العرق ههههههه وغمضت عيني ونمت .. يات امي واختي وزوجي وامه يحببوني ويباركون لي وانا مو قادرة ابطل عيني كأني سكرانه والله ، زوجي يبوس راسي وخواتي الباقيين ياووني يصيحون مستانسين .


~ ~ ~ ~ ~ ~ ~ ~ ~ ~ ~ ~ ~ ~ ~

و بـس احساس جميييل وحلووو من بعد الولادة طبعاً ههههه

الحمدلله ربي رزقني بـ أحلى خـــــالـــد الله يحفظه ، الحين خلص الـ 6 شهور ويمشي في السابع

وقولوا ربي يتمم علي الحمل توني اكتشفت اني حامل لي شهرين وشوي




والسموحة طولت عليكم بالتفاصيل اتمنى انكم استمتعوا بقصتي ، واذا في اي استفسار انا حاضرة

[shush]

الف مبروووك حمد الله على سلامتك

والله يتمم عليكي وتفرحي في مولودك الجديد

[..لوتس..]

ماشاء الله الله يحفظ لك ولدك و يتمم حملك على خير

بس ياليت تكتبين طريقة القسط الهندي للافادة وجزاك الله خير

[ام ليان5]

ماشاءالله استمتعت في قصتك ههههههه
وشعووور جميل ان شاءالله عقبالي وعقبال كل منتظره ومحرووومه

وياليت تكتبي طريقه القسط الهندي عشان البنات يستفيدو

[انثى تكره الظلم]

حمدلله على سلامتك وسلامت خالووودى
الله يديم عليكم الفرحه والسعاده امين يارب العالمين

[سنيوريتا آني]

الف حمد الله على سﻻمتك وسﻻمة خلودي
والف مبروك على حملك ربي يتمم عليكي على خير ان شاء الله

[فتفوته ستور]

حمد لله على سلامتكممم

[Senyorita]

أولاً أحب أنوه .. لازم تستشيرين دكتورتج ، ممكن حالتي غير عن حالتج
انا كان فيني خمول في المبايض ( التبييض ) و تكيس !

تقدرين تحصلينه عند العطار أو الحواج أو عند دكاكين الطب النبوي
القسط الهندي يكون مطحون و لونه بني !



طريقة القسط الهندي :

تاخذين قسط هندي مقدار اصغر ملعقة في البيت ( مثلاً ملعقة السكر )
و تحطينه في فنجان ماء أو ربع كاس ماء و تخلطينه وتشربينه

5 مرات في اليوم ( بعد كل صلاة مثلاً ) ، ولمدة 14 يوم ( تحسبين من أول يوم دورة وحتى من بعد ماتخلص تكملين العد )

وفي اليوم الـ 14 وقفيه وانتظري موعد دورتج اذا ماجاتج الدورة روحي حللي الحمل بالدم أفضل
أو انتظري اسبوع اذا ماجاتج حللي تحليل منزلي .. واذا جاتج لأ تيأسين حاولي مرة ثانية


والله يرزق كل محرومه بالذرية الصالحة =)

[أسيرة زوجي]

الحمد لله على سلامتك حبيبتي

و الله يتمم حملك بخير و عافية يا رب

في انتظار قصة الحمل الثاني إن شاء الله

[دانة العراق]

الحمد لله على السلامة عزيزتي
وربي يهنيكي ويحفظلك خالد وابوخالد وكل عزيز وغالي على قلبكك