أعراض حملي ..

[Rawan.Y.M]

السلام عليكم و رحمة الله وبركاته

كيفكم جميعاً إن شاء الله بخير ؟

أنا كنت مثل أغلب البنات هنا قبل موعد كل بيريود كنت أقعد أفرّ النت على أعراض الحمل و أدقق بكل تفاصيل الالآم إللي تسير معايا ..

و فالاخير تشرّف المحروسة

..

إلين طفشت وأشغلت نفسي بدراستي عن التفكير بالموضوع و معد فتحت النت على دي المواضيع و كل محد تكلم فالحمل و إني تأخرت .. قلت له لمن ربنا يريد ..
..
إلين قبل شهر كان وقت اختبارات الفاينل فالجامعة و مرررة مكروفة و كان موعد البيريود ..
كنت أحس آلامها كالعادة مافي فرق ..
و كل يوم فالجامعة أقول بتنزل اليوم ..
وكل ماصليت فرض أحسها نزلت من كتر ما أتوهم نزولها و أخلص الصلاة و أشيك ألاقي مافي حاجة

و على ده الحال
إلين تأخرت 5 أيام
و أنا بالعادة منتظمة ماتتأخر كدا ..

و لا انتبهت لتأخرها إلاّ آخر يوم في اختباراتي - دوبي استوعب - ..

رجعت البيت و جبت تيست حمل بدون محد يدري و كان وقت مغرب
انتظرت زوجي يطلع المسجد و عملت التيست إلا طلع خطين
طبعاً جري بعدها على المستوصف إللي جنبنا و سويت تحليل دم و طلع إيجابي الحمدلله و حالياً أراجع مع د.سحر ميلودي في مستشفى سليمان فقيه

الحمدلله يارب كما ينبغي لجلال وجهك وعظيم سلطانك
..

طبعاً الفرق الوحيد بين أعراض البيريود و أعراض الحمل عندي كان شيء واحد و أكيد حيختلف عن أعراض أي حامل تانية
و هو

إنو حاسة الشمّ عندي أقوى بكتير
كنت لمن أمر بجانب عاملات النضافة و هما ينضفوا بالصابون و الكلوركس أحس الريحة كلها فخشمي بطريقة غريبة ..

بسّ غير كدا و لا شيء مافرق معايا

لا إفرازات و لا ألام و لا جوع و لا كل الكلام إللي كنت أقرأه و أتوهمه قبل كل بيريود

.. ربي يتمم عليا و على كل حامل و يرزق كل متمنية دي الفرحة يارب ..

بس نصيحتي خلوها على الله و أدعوا و اتصدقوا و أنسوا الموضوع و لا تحاولوا تدققوا فأعراضكم قبل كل بيريود لأن الأعراض حاجة ترجع لكل وحدة و عيلتها و بالأخص أمها
( بالعادة كل وحدة حملها و أعراضها مثل أمها )
يعني أسألوا أمهاتكم أفضل و أضمن ..

تحياتي
أتمنى تقبلوني أخت جديدة لكم

روان