قصة ولادتي بالبراء الغالي

[دانيه]

السلام عليكم و رحمة الله و بركاته

كيفكم حبيباتي .. ما اطول عليكم بدخل في الموضوع على طول
حددتلي الدكتورة موعد الولادة يوم 12|12 هجري 18|11 ميلادي
بس سبحان الله مع اني بكريه ولدت قبل الوقت باربعة ايام .. المهم بدات الامي وانا امشي في الممشى عند كلية الامير سلطان مدري هي جامعه او كليه!! بس دا مومهم نرجع لموضوعنا.. بدات امشي الساعة 8 المساء الى ان صارت الساعة 9 خلااااااااااص ماقدرت اوقف على رجلي قلت لزوجي خلينا نرجع للسيارة احسن بدل الفضايح<<خفت اولد قدام الناس..
سالني نروح المستشفى و الا البيت قلت نروح البيت <<فكرت اني بعد مامشيت و عرقت راح اكون معفنه استحيت اروح كده المستشفى..و طول الطريق و الالم يروح و يرجع و زوجي خايف علي صار يلف قريب من المستشفى كل ماشد الالم قال يلا ننزل للمستشفى وانا اقول لا..حبيبي مسكين قلبو عليا..
وصلنا البيت و اخذتلي دش دافي و حاولت انظف نفسي من الشعر الله يكرمكم..طولت شوي في الحمام وزوجي رايح جاي يدق الباب يسالني انتي بخير<<وترني شوي بس خلصت و طمنت الحبيب عليا و حاولت فيه يدخل ينام تحسبا للظروف وبعد جهد وافق بشرط اصحيه على السحور لانه ناوي يصوم يوم عرفه..وانا الآآمي تروح و تجي كل نص ساعه ..ام زوجي جهزت السحور الساعه2 صحيت زوجي و اتسحر مع والدته وانا بصراحه مااااااااقدرت اكل شي من الالم و صبرت الى ان صارت السعة 3 صباحا رحت المستشفى..دخلت طوارء سألت عن دكتورتي اللي متابعه معاها حملي قالولي اليوم اخذت اجازه....جاتني الطبيبة المناوبة لقت عندي طلق منتظم كل عشر دقائق لكن الرحم فاتح بس 1سم و الحوض ضيق!!انا خلاص من الم قربت اتجنن .. قلتلهم بروح البيت قالت الدكتورة لا مينفعش لازم تبئي عندنا انتي مش حتتحملي الالم زوجي وافق و راح اختار الغرفة (جناح الاميرة 106 بمستشفى السعودي البريطاني)الاطلاله على برج المملكه منظر خرافي و غرفة تجنن قدام السرير حوض سمك و فوقه تلفزيون اقدر بيه اشوف البيبي .. المهم ياحبايبي جات الممرضة و عطتنيابرة منومه الساعة 6ص نمت الى 9ص بعدها صحتني وعطتني حقنه شرجيه وانتو بكرامه دخلت بعدها الحمام اعزكم الله..وريحت نص ساعه قالولي خلاص يلااستعدي بنوديكي غرفة الولادة وقتها خفت و كلمت امي وانا ابكي وهي تبكي <<انا اكتب الان واتذكر و ابكي<<المهم قلت لها تدعيلي و هي كانت توصيني اني مااصرخ..
دخلت غرفة الولادة كانت شي خرافي مررررررررره حلوه و مريحه جلست فيها من الساعه 10 الى الساعه 5 العصر شفت فيها الموت بس لن اذكر التفاصيل لانها توجعلي قلبي و ماحب اوجعلكم قلوبكم زيي بس بقولكم شيء زعلني انو و انا في غرفة الولادة كشفت عليا 4 دكتورات<<ماكنت حابه انكشف للناس بهادي الطريقه لكن الحمدلله على كل حالنصيبي كده لان دكتورتي في اجازة..
2مصريات 1 سوريه 1سعوديه استشاريه هي اللي ولدتني و خيطتني الله يجزاها بالخير لسانها رطب بذكر الله وطمنتني كتير والحمدلله جاني البراء الساعة3 إلاربع بعدها نمت الى الساعه 5 العصر بعدين صحوني وودوني غرفتي اول ما دخلت كان زوجي حبيبي يصورني بكمرة الفيديو وعيونو كلها دموووع الله لا يحرمني منه ولا من قلبه الحنون ولا من وقفته معايا
ولا يحرمني من امه اللي وقفت معايا كانها امي و اكثر..
وشكرا لكم واعتذرعلى الاطالة..