لكل المتاخرات فى الحمل قصص من عيادة الطبيب متجدد ان شاء الله

[قلب الوطن مجروح.]

السلام عليكم ورحمة الله وبركاته

ايوا يابنات زى العنوان كده عندى ليكم قصص حقيقية هتصبركم

على تأخر الحمل والدكتورة دى تبقى اخت واحدة اعرفها وبما انى لسه

متأخرة فى الحمل من سبع سنين بتعد تصبرنى بالحكايات دى

قلت اقولهالكم ونصبر بعض ان فى يوم من الايام هييجى علينا

الدور ان شاء الله وربنا هيكرمنا زى اللى كرمهم دول

الحكاية الاولى

واحدة كانت متأخرة وسلافاتها اتجوزوا بعدها وخلفوا وهى لاء

بس كانت روحها حلوة وبتروح مع سلافتها تتابع حملهم وتخدمهم وكل حاجة زى الاخت بالضبط

وفى يوم وهى فى عيادة الدكتورة اشتكت لها ان سلفتها خبت عليها

وهى زعلانة جدا وسلفتها قالتلها والله كنت خايفة على مشاعرك

وتقريبا شبه اتخانقوا هناك

الست دى سبحان الله والدها توفى فى حادثة حريق كبير فى بيته
وكانت حادثة مروعة راح فيها ابوها
تصدقوا طلعت حااااااااااااااامل فى الشهرده بعد14سنة عذاب
كانت فى عز حزنها على ابوها وطبعا مش مهتمة بأيام تبويض
ولاغيره لكن ربك لمايريد مش محتاج لاسباب وحملت مرتين بعدكده

الحكاية التانية

واحدة راحت لها متجوزة من سنتين وعندها مشاكل كتير وتحليل جوزها سىء للغاية

وكانت دى اول مرة تزور الدكتورة ومعيطة لما طقت لان جوزها عمل تحليل جديد والنتيجة طلعت اسوأ واسوأ

طبعا الدكتورة هديتها خالص وقلت لها طيب تعالى لما اكشف عليكى لقيتها حااااااااااامل فى شهرين وهى متعرفش

سبحانك ياربى اراد يريح قلبها من العذاب ده

الحكاية التالتة

واحدة اتجوزت وهى عندها 43سنة والبيريود بتجيلها كل 3شهور مرة بعد شهر من جوازها راحت تظبط البيريود علشان تحمل

وهى بتكشف تطلع حااااااااامل من اول يوم جواز

يعنى السن الكبير ولخبطة الهرمونات ممنعتش الحمل

سبحان الله ارادته فوق كل شىء

الحكاية الرابعة

دى بقه حكاية واحدة اعرفها من بعيد اتجوزت وهى عندها 20سنة

ومحصلش الحمل وخلاص فات 25سنة على جوازها وكبرت ويئست من الحمل لكن حملت بعد 25سنة جواز وجابت بنوتة

لااله الاالله يعنى كانت تقريبا 45سنة محملتش وهى صغيرة وحملت وهى كبيرة ويمكن تكون دى كانت اخر تبويض لها

هو الرزاق الوهاب يرزق من يشاء بغير حساب

الحكاية الخامسة

دى حكاية صاحبتى وسمعتها منها شخصيا اتجوزت واكتشفت ان جوزها عنده دوالى وقرروا يعملها بعد سنتين من الجواز وفعلا عملها وهى بالمستشفى البيريود اتأخرت قالت يمكن من تعبها

مع جوزها واستقبال الناس اللى جايين يطمنوا عليه لكن اتأخرت

زيادة عن اللزوم عملت تحليل طلعت حااااااامل

يعنى حملت قبل ماجوزها يتعالج سبحان الله وبقى عندها 3اولاد

الحكاية السادسة

واحدة كان عندها مشاكل وجوزها سليم صبر معاها لحد مابقت 36سنة وطلب يتجوز هى وافقت وخطبت له كمان لانها بتحبه ومش عايزة تظلمه معاها واتجوز فعلا وضرتها حملت بتوأم وهى بتولد فى المستشفى والست دى معاها زى اختها وبتغير للاولاد البامبرز

الدكتورة معدية عليهم وبتدعى لها بالذرية قالتها يادكتورة لسه

هأخلف ده خلاص حتى البيريود متأخرة وشكلها خلاص راحت

قالتلها راحت ايه انت 36سنة لسه صغيرة على الكلام ده

تعالى لما اكشف عليكى لقيتها حااااااااامل فى اربع شهور تخيلوا
والراجل بعد ماكن محروم من الخلف اكتر من 15سنة بقه عنده
تلاتة فى سنة واحدة سبحان المعطى

يارب اكون قدرت اصبركم وازرع فى قلوبكم الامل والتعلق بالله

وحده هو مسبب الاسباب

وياريت كل اللى يشوف موضوعى يدعيلى لكل مشتاقة بالذرية

الصالحة ومايحرم اى حد من النعمة دى ياااااااااااااارب

ربنا يكرمكم يابنات اللى تقرأ موضوعى تقيم وترد
وياريت الموضوع يتثبت علشان ندى امل للمتأخرات
فى الحمل لانها والله شىء فى منتهى العذاب وبتبقى
الواحدة عايزة تتعلق بقشاية تديها امل

وكل اللى تعرف قصة واحدة متاخرة تيجى تحكلنا عليا للتفائل مش اكتر