السلام عليكم ورحمة الله وبركاته
بسم الله الرحمن الرحيم
أكشن ولادتي
طبعا أنا رحت يوم الأربعاء الماضي بتاريخ25/4موعدي في المستوصف وقلت لها أن حركة البيبيات قلت فحولتني على مستشفى الولاده وبعد التصوير قالت أن المشيمه بدأت تعفن
ورحت مستشفى الولاده وسووا لي تخطيط وطمنوني على كل شي وقالوا كل شي تمام بس يبغوني أنام عندهم يومين على شان يطمنون على الوضع بس طلعت على مسؤوليتي وقالت لي تعالي كل يومين سوي تخطيط أفضل
وفي يوم الجمعه تاريخ 28/4وأنا نايمه جلست على ألم خفيف الساعه 11 الظهرقلت شكله ألم من التهاب البول ورحت الحمام وأنتوا بكرامه وبعدين راح الألم شوي ورجع بعدين بس على خفيف وبعد الصلاه رحت المستشفى عشان موعد التخطيط وبعد التخطيط قالت الدكتوره معاك طلق خفيف خل أكشف عليك قلت لها مايحتاج لأني ماأحس بطلق أخاف بس أظل عندكم على الفاضي وبعدين أقتنعت بالكشف وقلت لها يلا سوي لي كشف وطلع مفتوح 4 فقالت لي تنويم أتصلت على زوجي وقلت له وخلصنا أجراءات التنويم وصعدوني عنبر التوليد ونفس الشي الألم خفيف وسوو لي تصوير قالوا الثنتين راسهم تحت وسوت لي كشف ونفس الشي مفتوح 4 وجات دكتوره ثانيه وسوت لي تصوير على الساعه 4 العصر قالت لي دام أنهم في كيس واحد ومشيمه وحده الأفضل ولاده قيصريه لاتجازفين بطبيعي قلت لها أنا أبغي طبيعي قالت لا القيصري أحسن قلت لها خلاص لحظه أكلم أهلي وجلست أكلم أهلي عشان يطلبون والكل أشتغل في الدعوات الزينه ووقعوني على العمليه وجهزوني لها وبعدين رجعت الدكتوره قالت لي جا الدكتور المناوب وماأيدني على العمليه كلش قال ليش تفتحون بطنها والرووس أثنينهم تحت وظلوا الدكاتره في نقاش حاد وبعدين قالوا بنعطيك مهله تولدين طبيعي وسوت لي كشف ونفس الشي بس 4 مفتوح والطلق جدا بارد وضليت على هالحال الى الساعه 12 ونص في الليل قمت أحس الألم بدأ يزيد وقلت حق الدكتوره كشفي علي قالت لي مفتوح 5 تبغين أفتح الكيس عشان يزيد الطلق قلت لها يلافتحي وحاولت تفتحه بس ماأنفتح وظليت خمس دقايق وزاد الطلق علي وبدأ ينزل الماي وظليت أصيح من الألم وسوت لي كشف طلع مفتوح7 وبعدها 8 و9 وبعدها نقلوني غرفة الولاده ونقلوني على السرير وتجمعوا الممرضات والدكتوره على الساعه 1وشوي وخلاص بيطلع الراس وجات الدكتوره وانا أدفع بس بموت من الألم وطلعت الأولى وحسيت براحه وجابوا السونار يبغون يشوفون الثانيه جلست أصوت لاتسوين رجع علي الألم طبعا بعد دقيقه وشوي وبدأت أدفع ورا بعض وطلعت الثانيه وجابوهم أبوسهم وبعد دقايق رجع الألم وطلعوا المشيمه كأن ثلاث ولادات وأنا أرتجف من البرد وخلوني قريب الساعه على نفس الوضع وبعدين جاوا نظفوني وبعدين خلوني ربع ساعه وجات الدكتوره وحطت لي بنج موضعي ومهدأ لي وجلست تخيط وتنظف وركبوا لي قسطره وحطت لي شاش عن النزيف وبعدين خلوني ساعه في غرفة الولاده نايمه وبعدين نقلوني غرفة الأنتظار وعلى الساعه ست الصباح جات الدكتوره وشالت الشاش والقسطره وخلوني أرتاح وأوزانهم حليوه وحده 2800 والثانيه 2700 بس مره صغار
والحين أعاني من الخياطه والتربيه والحمدلله