[بيرى]

بسم الله الرحمن الرحيم انا ححاول احكيلكوا قصتى بالتفصيل على الله تكون نفع لاخواتى ان شاء الله انا تزو جت من حوالى ثلاث سنين وقبل الجواز عرفت ان زوجى كان عنده دوالى خصيه وتشوهات 98% وعمل عمليه قبل جوازنا بشهرين المهم العمليه طلعت غلط والنسبه زى ماهى والدوالى زادت بقت فى اليمين والشمال والدكتور قاله ان الانجاب صعب من غير حقن مجهرى ورضيت وقلتله انه عندى بالدنيا والخلفه دى بايد ربنا وحده مش الدكاتره ووالله اتجوزنا وحملت فى نفس الشهر بس الحمد لله مكملش وفضلت على الحال ده طول اول سنه احمل واجهض وانا فاكره انه من تشوهات الحيوانات المنويه وبعدين قعدت سنه ونص من غير حمل نهائى جربت فيها كل حاجه من علاج ومنشطات ومثبتات قبل الدوره ما تيجى وتحاليل ليا وليه لغاية اما تعبت ويئست من كل حاجه وكل اللى اجوزا بعدى كان معاهم طفالهم وكل الناس بتسال مين السبب وعملتوا ايه وروحوا لدكتور فلان ودكتور علان وشيخ بيقرا المهم جت عليا لحظه افتكرت اول جوازى وانى اما رضيت ربنا ادانى الحمل بالرغم انه كان تقريبا استحاله بس حب يختبرنى وانا فشلت بنسبة 100% واهتميت بمين خلف ومين عمل وانا لسه وقررت انى ارجع لربنا والجأ ليه وبس ابتديت برنامج حطيته لنفسى حتى من غير ما اقول لجوزى وابتديته من رمضان اللى فات وندرت ندر بينى بين الله وطلبت منه فى السجود وقيام الليل قبل الفجر وصلاة الحاجه بعد العشاء والاستغفار الدائم وقراءة الاذكار والثقه فى الله وفى يوم جت جارتى تقولى على دكتور نسا وقالتلى جربى وتوكلى على الله رحت وانا بقول خليها على الله عادى رحت للدكتور وطلب منى تحليل اسمه ثرومبفيليا وعملته وفعلا طلع ده سبب الاجهاض عندى نسبة تجلط فى الدم عاليه وهى دى اللى كانت بتنزل البيبى وقلت للدكتور انا بقالى سنه ونص محصلش حمل قالى حنمشى على برنامج بس انا مش بدى منشطات وادانى بالظبط الاتى قرص فيتامين e ليا ولجوزى كل يوم +قرص فوليك اسيد ليا ولجوزى على فكره ده مهم جدا للرجاله + قرص زنك ليا ولجوزى برضه وعمل متابعة تبويض مشيت على القرص ده لمدة شهرين وجاتلى الدوره والله ما زعلتش وحمدت ربنا وكل ده وانا مستمره على علاقتى بربنا والتوكل عليه ووالله العظيم انى خلص العيد الكبير ولقيت نفسى حامل ورحت للدكتور وانا طايره من الفرح وادانى حقن كليكسان عشان سيولة الدم كل يوم لغاية بعد ولادتى ان شاء الله بشهرين وبرضه احتسبت كل ده والالام الحمل من الحقنه فى بطنى كل يوم وطلق مبكر فى الرابع ونزول مشيمه فى الخامس بس عندى امل كبير فى ربنا انه يتملى بخير واشوف البيبى انا دلوقت فى اخر السادس ادعولى بالولاده اليسره ويارب يعطى كل محرومه وميحرمش واحده من كلمة ماما اللهم امين واسفه على الاطاله