هلا بالاخت الغاليه تسلمين ياقلبي على اجاباتك وتحمليني الين ماانتهي من النفاس انا واسئلتي ماابي الخبط انا مكمله على الفيتامينات والكالسيوم والحديد بالنسبه لقشر الرمان ماشربته بعد بس شغالتي يوم شافتني انشفه واطحنه قالت حلو هذا بس مررررر مره خفت وقلت اسأل قبل اتوهق وماالقى احد اسأله وبالنسبه للحبه السودا ممتاز انها ترفع المناعه ولا لا نقطعها ولاشي ماتضايق هي خلها لين نكمل الاربعين ونوقفها مره وحده الله لايخيب رجانا ولايتكلنا على جهدنا..<<<< آمين يارب *** ونفس الشي الزعتر التزم فيه هو اصلا حلو وخفيف مايتعب مادام ينفع نكمل مابقا شي . *** بالنسبه للكبو ودي اجرب بس خايفه يمكن اجرب اللي قلتي عنه والله ينفع فيه وكلام الحريم ياكثره بس سالفة الرشاد رابع يوم قلت لها اصلا ماقد سمعتها الا منك كل يقول اذا انقطع الدم بالنسبه للقرفه والزنجبيل انا قلت لك اشرب قرفه مع يانسون وقشر وفعلا احيانا انساها يوم واحسه خف وثاني يوم اشربها ويرجع ولذلك حرصت عليها يوميا والحمدلله الحين ماعاد ينزل معي الا افرازات صفرا بس كثير زي النزيف انتظرها تخلص واستخدم الرمان والرشاد والحليب بالفلفل كل يوم وازيدك اني كنت احط عليه بالعشرين الاولى م ص حلبه والحين مستمره بالفلفل بس مع العسل ( ترى علبة اللانجنيز الكبييييييييره قربت تخلص شكلهم مسوينها للنفاس تخلص بنهايته ) وانا احط الماش مطبوخ ماتحملته ني واحيان مطحون واحيانا لا واستخدم الفلفل الاسود ارشه على الاكل بعد مااطبخه وقبل آكله الله يجزاكي كل خير ويوفقك ويكتب لك ماتتمنين ويجعل ماتسوينه كله حسنات لك يارب وفعلا كلامك صح بالنسبه للسلبيات انا اقول يمكن انا اخطأت بالاستخدام تحملي بعد بقا لي اسبوعين بالنفاس الله يجزاكي خير عندي كم سؤال جديده هل لازم التزم بالأكل اللي انتي كاتبته << ملتزمه جدا الى الحين مالخبطت الا مرتين بس بالعشا هل لازم استمر اشرب التالي : القرفه والزنجبيل الفلفل الاسود على الحليب ( او ممكن اشرب بدون فلفل ) الى آخر النفاس او يكفي يوقف الدم وماله داعي اشربها انا عادي اكمل بس اخاف انه لازم اوقفها انا الحين وقف معي الدم بقا افرازات لونها بني وانتي بكرامه ومستمره كل ماغيرت القى شي بسيط بس وشلون تتوقف وهل الحين المفروض ابدأ الرمان والرشاد وهل استمر عليها الى نهاية النفاس واقطعها آخر يوم بس ومارديتي علي بخصوص عصير الرمان هل له نفس مفعول قشر الرمان وسمعت انه ممكن يستخدم كغسول للتضييق << صح او ماعندك فكره وش بقا بعد هل الممنوعات اللي يقولون عنها الناس مثل المشروبات البارده والاشياء اللزجه ينطبق الى آخر النفاس او فقط الى ان يوقف الدم والاستحمام ايضا سؤال آخير وارجو انك تسامحيني ان تعبتك والله يجزاكي كل خير ويسخر لك عباده هل ممكن ان اخت النفاس تجي بعد انقطاع الدم وان اخذي للرشاد والرمان ممكن يمنع حدوثها لأن ودي اسافر بعد الاربعين مباشرة واخاف تجيني وانا مسافره اغير جو وماعندي استعداداتي من المشروبات والخلطات او انها ماتجي الا بعد نهاية الاربعين اكيد لأني مااذكر متى جتني بنفاسي الاول ولك مني كل الشكر والامتنان عندي كم سؤال جديده هل لازم التزم بالأكل اللي انتي كاتبته << ملتزمه جدا الى الحين مالخبطت الا مرتين بس بالعشا لامو لازم نفس الاكل انا قلت من قبل ان هذا جدولي حطيته لنفسي.. يعني الوجبات ممكن تغيرين فيها على اللي يناسب عاداتكم.. بس اهم شي حاجه مفيده..تعوضك اللي فقدتيه. *** هل لازم استمر اشرب التالي : القرفه والزنجبيل الفلفل الاسود على الحليب ( او ممكن اشرب بدون فلفل ) الى آخر النفاس او يكفي يوقف الدم وماله داعي اشربها انا عادي اكمل بس اخاف انه لازم اوقفها انا الحين وقف معي الدم بقا افرازات لونها بني وانتي بكرامه ومستمره كل ماغيرت القى شي بسيط بس وشلون تتوقف القرفه والزنجبيل والحليب بالفلفل محلى بالعسل.. كلها زياده على الفوائد الصحيه.. فيها ميزه قويه وهي تنظيف الرحم والمساعده على انزال الدم والافرازات.. الحمد لله نزول هالاشياء منك دليل على ان الرحم بدا يتخلص من فضلاته اول بأول..اول شي الدم بعدين الكدره..بعدين الافرازات. اتوقع من ثلاث ايام لخمسه بالكثير وتنتهي الافرازات البنيه فاصبري على اللي انتي ماشيه عليه احسن لك.. *** وهل الحين المفروض ابدأ الرمان والرشاد وهل استمر عليها الى نهاية النفاس واقطعها آخر يوم بس ومارديتي علي بخصوص عصير الرمان هل له نفس مفعول قشر الرمان وسمعت انه ممكن يستخدم كغسول للتضييق << صح او ماعندك فكره لا لاتبدين الحين باقي آثار دم بسيطه خلي رحمك يتنظف منها..وترتاحين.. اذا توقفت الكدره البنيه..وصار باقي افرازات صفرا على بيضا ابدي بالرمان والرشاد ترى عادي لو تخلينه لآخر عشر ايام ترا التكثير منه موب زين. حتى لاحطيتيه مع التمر بالزبد او مع العسل لاتتعدى الكميه ملعقه صغيره مع التمر حق كل يوم..وسبع حبات مع العسل. بالنسبه للرمان كغسول من تحت ماجربته ابداً..لكن بما ان فعاليته معروفه كعلاج داخلي كمشروب افضل انك ماتحوسين نفسك بكثر استخدام الاشياء.. يكفي المنطقه من تحت ملح مع مويه فاتره..ومره لو حسيتي بحكه بس.. الرمان كعصير مدحته وحده من البنات اللي ردوا على الموضوع هنا وقالت انها لقت له نفس المفعول..خفف عنها الافرازات..وعلى فكره هي ذكرت انها تاكله مع اولادها واكتشفت هالامر بالصدفه.. مع العلم ان قشر الرمان غير اللب..بس سبحان الله يمكن الثمره ككل لها نفس المفعول. انتي جربي ولاهو ضارك زي ماقلت لك كل العصيرات الطبيعيه مفيده مامنها ضرر.. *** وش بقا بعد هل الممنوعات اللي يقولون عنها الناس مثل المشروبات البارده والاشياء اللزجه ينطبق الى آخر النفاس او فقط الى ان يوقف الدم والاستحمام ايضا والله المشروبات البارده ماانصحك فيها الحين.. الاشياء اللزجه قصدك الخضار وغيره..مامنها ضرر وحتى عصير البرتقال لو تبين.. الاستحمام مااشوف منه مشكله بس اهم شي لاتتحممين بحار وتطلعين لتيار هوا بارد (مكيف) على طول بيضرك كذا.. اشربي عصيرات وكلي كل انواع الخضار والفاكهه اللي تشتهي نفسك..ومانتي شايفه الا الخير بإذن الله. *** سؤال آخير وارجو انك تسامحيني ان تعبتك والله يجزاكي كل خير ويسخر لك عباده هل ممكن ان اخت النفاس تجي بعد انقطاع الدم وان اخذي للرشاد والرمان ممكن يمنع حدوثها لأن ودي اسافر بعد الاربعين مباشرة واخاف تجيني وانا مسافره اغير جو وماعندي استعداداتي من المشروبات والخلطات والله ماتعبتيني بس انا لااتعبك بالدعوات الحلوه << تلميح... ماخبرت اخت النفاس تجي مباشره بعد النفاس للي نفاسها ماشي طبيعي زيك..يعني ممكن وحده الدم نشف عنها في اسبوع او عشر ايام ممكن تتفاجاء ان الدم نزل عليها بعد الاربعين على طول..وتحسبها اخت النفاس وهي باقي دم النفاس انحشر برحمها بسبب اما مرض او تصرفات خاطئه منها .. المهم انتي الحين ماشيه تمام وربي يتمم عليك وتطلعين بدون افرازات ولامويات.. مادام سفرك بعد الاربعين مباشره وعلشان تكونين متطمنه.. حتى لو جتك الدوره (اخت النفاس) مافي مشكله مادام معك فلفل اسود وحليب .. يكفي عن الزنجبيل مع القرفه.. وخذي صره صغيره فيها بودرة قشر الرمان تحطين منها آخر يومين من الدوره مع عصير او حتى مع الشاهي اللي تشربينه وانتي مسافره.. والاهم الاكل يكون متوازن ومغذي.. مايكون بطاطس وبيبسي وآيس كريم هااااااااااه شكوووووره على هذا الموضوع المميز اختي ممكن توضحين الفوائد من عمل هذا كله ؟مثلا هل ينحف الجسم اويشد منطقة البطن فقط؟وهل يحتاج مع هذا النظام اسوي رياضه،، مع العلم اني نحيفه قبل الحمل والحين زدت ثمانيه كيلو وعاجبني وزني وماريد ينزل وزني بس شايله هم منطقة الخصر السلام عليكم ورحمة الله وبركاته،،،، ربي يجزاكي كل خير اختي العامرية.... ياليت تفيديني ببعض الاستفسارات الي قريتها في الجدول الرائع الي كتبتيه لنا.. وعليكم السلام ورحمة الله وبركاته واياك جزى عني كل خير واحسان.. ماعليه انتي اي سؤال يرد بخاطرك حطيه ومايصير خاطرك الاطيب بإذن الله. انا ولادتي قريبة بإذن الله، واليوم شريت الأغراض الي كتبتيها بجدول النفاس، بس حبيت اعرف شي بخصوص كميات الأشياء، يعني انتي كاتبة لنا نشرب حليب مغلي محلى بعسل ومضاف له فلفل اسود. ودي اعرف كمية الفلفل الأسود، هل نص ملعقة صغيرة كافية، او احط اكثر؟ الله يهون عليك ويسهل لك يارب.. نعم نصف ملعقه صغيره فلفل مطحون كفايه.. المهم ماهو الكميه بقدر ماهو المفعول اللي يهمنا. *** ف آخر عشرة ايام مثل ماانتي كاتبة، نآكل التمر مضاف له الرشاد.. كم رح تكون كمية التمر والرشاد؟ يعني لو عندي كيلو تمر كم رح تكون كمية الرشاد..؟ الرشاد على كل الاحوال مو زين يكون كثير.. مفعوله قوي جدا.. ملعقه صغيره تكفي..ويكون مخلوط مع التمر. *** مشروب الزعتر الي كتبتيه، هل اجهز منه 4 اكواب مثل ماقلتي واخليه واسخن منه كل ماجيت اشرب منه.. هل اقدر احضّـر منه كوب لأني احس ان 4 اكواب كثير..؟ وكم رح تكون كمية ورق الزعتر، ملعقة صغيرة او اكثر؟ عزيزتي الكميه على حسب الرغبه.. وهو مفيد جدا للمعده ومفيد للارحام بإذن الله.. افضل وقت له قبل النوم لما تكونين ماراح تاكلين شي بعده علشان مفعوله يكون تمام بإذن الله.. الافضل الاعشاب تنشرب مباشره ومايتم تسخينها تكراراً لتحضير كوب واحد حطي بالكوب سكر..وخذي زعتر بين اصابعك بس السبابه والابهام والوسطى.. كميه بسيطه يمكن نصف ملعقه..صغيره وصبي عليه ماء مغلي وغطيه دقايق بس.. واشربيه بالعافيه ان شاء الله. *** بخصوص الماش، انتي قلتي انه ممكن ينطحن ونرشه فوق الأكل؟ بس الوالدة عندنا في البيت دايما تطبخ لنا بذور الماش الخضرا (تغليه مع الموية) وبعدين تصفيه وتضيف له زبدة وسكر، واحنا متعودين نآكله على الريوق، فهل يصلح اني آكله على طريقة الوالدة او لازم الماش يكون مطحون..؟ ابدا مو لازم يكون مطحون.. طريقة والدتك طيبه لو ماتكب المويه.. لان فايدته راحت مع مويته.. اقترح تسوون نفس طريقة الوالده بس يكون على شكل شوربه وبكذا ماتخسرين الفوايد العظيمه اللي في مويته.. الحين لو طبخنا اللحم كمثال وصفينا مويته تأكدي ان اعظم فوايده راحت مع المويه وبقى لنا تقريبا بس الشكل الخارجي للحم. *** هذي استفساراتي اتمنى تجاوبيني عليها، ولك دعاء صادق من القلب ان ربي يعافيكِ ويوفقكِ ويحفظلك ذريتك من كل شر ويجازيكي الجنة انتي وكل من تحبين،،،آمين يارب...وسامحيني لو طولت عليك بالأسئلة، ادري انك والدة من كم يوم ومحتاجة للراحة، ان شاء الله بس مااكون ازعجتك بأسئلتي، بس انا بكرية وماعندي فكرة عن النفاس، وبصراحة كل مااقرأ مواضيعك احس بثقة كبيرة ف كلامك وهذا الي شجعني اسألك بالأشياء الي محيرتني،، واذا عندك اي نصيحة اقدر اسويها قبل الولادة ياليت تخبريني، انا حاليا بالأسبوع الـ36 وماباقي شي على ولادتي.. ربي يسهل علي وعلى كل حامل ويبارك لك في بنتك " الجوهـــــرة " ..آميــــــــــــــــن.. ابشري يالغاليه.. والله يجزاك خير على دعواتك الطيبه ويفرج لك ويهون ولادتك وطلقك ويسر قلبك بما وهبك.. عادي ياعزيزتي ماازعجتيني..انا اكتب من المحمول وانا بسريري ماعلي كلافه ان شاء الله.. لاتترددين في السؤال عن اي شي تبينه.. واشكرك على ثقتك هذي اكبر مكاسبي في الحياة اخوتكم وثقتكم يارب لك الحمد والشكر.. والاعظم دعواتكم بظهر الغيب.. ادعي لي بالفرج وان ربي يصلح حالي وعيالي. وبالنسبه للنصائح عن الولاده.. اسهل ولاده ولادة البكريه بحول الله وقوته.. انتي لاتفكرين كيف بتكون ولادتك..لان الولاده زي بصمة الاصبع مستحيل تتطابق ولادتك مع ولادة وحده ثانيه.. كثري المشي تراه مفيد.. بالنسبه للمشروبات انتي ماذكرتي الحلبه معني سمعت عنها وقرات في كتب فايدتها في ادرار الحليب ونزول الوسخات واني بكرامه ودي اشربها في الايام الاولى هل في ضرر منها او بتخرب في النظام اتوقع فايدتها وحده بكل طرق تناولها..لكن مادام انتي متطمنه اكثر لشربها اشربيها بس لاتتعدين اكثر من عشرين يوم..لان الحلبه تسبب افرازات كثيره.. وللمعلوميه اخذها كمشروب يسمن بسرعه..عاد انتي اختاري اللي يعجبك اكلها او شربها ووقفيها بعد عشرين يوم. - بعد ياعمري انتي ذكرتي في المغرب اشرب قهوه وانا ودي استبدلها بمشروب قشر القهوه مع الشمر والقرفه والقرنفل والزنجبيل والحلبه والتمر نغليهم مع بعض ونشربهم كتبتها وحده في المنتدى وقالت لها فوايد عظيمه في التنظيف وكمان سمعت ان الدكتور جابر القحطاني مدح قشر القهوه للنفاس انا اثق في رايك ياعسل فانصحني استخدمها او لا لاني بكريه وماعرف في ذي الامور استبدليها عادي بقشر القهوه لامشكله...لكن الخلطه اللي ذكرتيها هذي مالي علم فيها ابداً.. انصحك لاتكثرين خلطات على نفسك..ترى الاعشاب ممكن تضر زي ماتنفع. والقرنفل برضه مفيد لكن كثرته تسبب مويات للوحده ولاتصير ناشفه. -في النظام ذكرتي الكمون انا اشتريته من عند العطار واعطاني اللي زي البهارات هو ذا الكمون والا يختلف وماذكرتي في النظام طريقه استخدامه الكمون عزيزتي هو نفسه اللي نستخدمه للبهارات فايدته للغازات وللشمم..يخفف آلالام البطن بشكل كبير بإذن الله. بس برضه لاتكثرين منه اشك انه يعيق تدفق الدم ويحبسه والله اعلم. - الاكلات اللي اني كاتبتها اقعد اكلها كل يوم نفسها مااغيرها لاني بمل ودي اغير لاعادي غيري على راحتك مجرد اقتراحات هذي غير ملزمه. معليش ياعمري كثرت الاسئله عليك والله متفشله منك هذا اخر سؤال فين القى العسل الا كتبتي اسمه عند السوبر ماركت والا في مكان ثاني والله انا اللي متفشله منكم تأخرت بالرد..كمبيوتري بطيء يفتح الصفحات بالموووت وفرحت انه اليوم مصحصح قلت طيران خل ارد عليهم. العسل ياعزيزتي لقيته ببنده..وممكن تلاقيه بأي سوبر ماركت كبير جيان او هايبر بنده او كارفور..متوفر بكل مكان.