قال الرسول صلى الله عليه وسلم : لعن الله من خبب امرأه على زوجها ولعن الله من خبب رجل على زوجته ..
انتو مالكم اي سلطه عليها وزوجها هو الامر الناهي ولو استعديتوها وحرضتو زوجها عليها وقدرت تبري نفسهاا راح يتخذ منكم موقف سلبي ولو العكس راح يكون ذنب الطفل في ذمتكم ليش ماتعاملوها كأخت تنصحونها وتوجهونها بدل من التفكير بالانتقام عشان ماشتغلت او ماساعدتكم تخربو بينها وبين زوجها حتى لو بقصص حقيقية..
بعدين انتوا ارتكبتو معها تجاوزات كثيرة ..
اولا تجسستو على محادثاتها (ولاتجسسوا ولايغتب بعضكم بعضا)
ثانيا حكمتوا انها بتخرج بدون اذنه وبتفسخ الحجاب في غيابه وانه مثل الاطرش في الزفه مو يمكن عارف وساكت حسب كلامك ماكانت تلبس الحجاب قبل الزواج لاتراقبوا كل تصرفاتها لان مافي انسان بدون عيوب وهذا مايعني اني واقفه بصفها لان في مجتمعنا مرفوض هالاشياء وغير مقبولة لكن في دول عربيه الامر هذا طبيعي الاختلاط وخلع الحجاب والمحادثات مع الشباب ...
ثالثا وهو الاهم فترة الحمل او قبلها ماهي ملزمة غير بنفسها وزوجها وانتو كذلك كل شخص مسؤل عن نفسه فلاتلتزموا معها بشيء الا كرم اخلاق منكم ومساعدة لها كونها حامل واذا ماحبيتوا ماتقدر لاهي ولازوجها يفرضون عليكم خدمتها حتى اخوك عنده زوجته مسؤول عنها ومسؤله عنه واذا حاب يريحها يقوم بنفسه
اتمنى يا اختي ماتدققون في تصرفاتها وتكبرون سلبياتها وتتجاهلون ايجابياتها عشان ماتبدأ المشاكل والحزازيات بينكم وبين اخوكم حتى لو صار بصفكم اليوم بكره بيلومكم حلو بينه وبين نفسه ويمكن تخسرونه وبدل مايكون قدام عينكم وقايم بطلباتكم يروح معها ويسكنون مكان بعيد ..
اما اذا كانت قدامه بوجه ومن خلفه بوجه اخر يعني محجبه وتترك الحجاب او بتساعدكم في وحووده وتختفي اذا غاب وغيرها من التصرفات اجلسي معاها وواجهيها وذكريها ان هالتصرفات ماترضي اخوك وممكن تتسبب في طلاقها عشان تحطينها في الصورة اذا فعلا كنتي تتمنين لها الخير وهذا تهديد اذا استمرت وفعلا كنتي على حق ليش خايفه تخبرينه وماتبغين الكلام يجي عن طريقكم طالما موقفكم سليم وراكبها الخطأ ميه بالميه
اختي والله العظيم قدام عيني الي تسببوا بطلاق انسانه تطلقوا والي خربو حياة اخوهم خربت حياتهم والي فضحوا خلق الله ربي كشف سترهم الدنيا دولاب وكلو سلف ودين ومافي احد معصوم من الخطأ المهم تكون نيتنا في اصلاح ذات البين وتقريب النفوس وتوجيه الاخرين مايكون هدفنا الانتقام وخراب البيوت
لاحظي امك انسانه حكيمة ولها خبرة في الحياة ورافضه الي بتسوونه لانها عارفه عواقب هالامر اسمعي كلام امك وتعوذي من الشيطان وتأكدي انك لو ماعلمتيه مراح يكون عليك اي وزر يوم الدين والعكس صحيح