شفاط وفوط للصدر لزيادة الحليب في الرضاعه ولكن بدون فايده
شفاط وفوط للصدر لزيادة الحليب في الرضاعه ولكن بدون فايده
السلام عليكم ورحمة الله
انا والده ولله الحمد من اسبوعين ويومين اللهم لك الحمد والشكر وطبيعي وانا في المستشفى اعطوا بنتي صناعي وانا ما رضعتها الا بعد اربع ايام تقريباً كنت تعبانه
المهم بنتي اللحين ما تشبع ابداً ابداً من صدري تحلس ترضع وتمص مني تقريباً ساعه واحياناً اكثر وبعدها تقعد تصيح صياح يقطع القلب من الجوع واضطر اعطيها صناعي اول ما ترضع صناعي تشبع وتنام
انا نفسيتي الحين سيئه جداً جداً جداً كنت مقرره ارضعها سنتين كامله اتباعاً للسنه وابغى اعطيها مناعه
جبت الشفاط جلست اشفط اكثر من ساعه ما طلع لي الا يمكن 1مل ويمكن اقل في اسفل الرضاعه مرره وارحمها ما يطلع لها الا قطر
اشرب قرفه وقشر وشمر وحليب طوال اليوم وتمر واكل طحينيه بس ما حس زياده يا دوب يقطر تقطير
شريت فوط الصدر قبل الولاده على بالي بقطر تقطير
ياليت الي عندها اي حل او تطمني ان ممكن وضعي يتحسن لاني امنيتي ارضعها طبيعي ونفسي استغني عن الصناعي بس ما قدرت اخاف يجيها جفاف لانها فعلاً تكون جيعانه
ما تقصر تطول تمص مني بس ما تشبع اذا خلاص حرقها الجوع تصيح معد تسكت وما تقبل صدري لانه ما يكفيها
الله يخليكم اعطوني امل اني اقدر اوفق بين الصناعي والطبيعي لعل وعسى وضعي يتحسن ويزيد الحليب
ما تتصورون كيف هذا الموضوع متعبني محسيني بالتقصير تجاه بنتي وان انا ام فاشله غير نفسيتي مع النفاس والم الخياطه اصيح وابكي طول اليوم معد قدرت ااهنى بأي شي