السلام عليكم
اخباركم بنات والدات و كروشات ؟؟
الف مبروووووك للي ولدوا و الله يسهل و ييسر للبقية ان شاء الله
بما ان بنتي نايمه قلت راح اكتب لكم قصة ولادتي
بالبداية و في ليلة يوم السبت تاريخ 28 مارس ما كانت عندي اي بوادر ولادة بس كنت امشي
جت لي بنت عمي تقولي ليش تمشين كذا ؟؟ المشية لازم تكون رياضية و بخطوات متباعده مو مشيتك انت مشية دلع هههههه
طيب سمعت كلامها و طبقت الي قالتلي عليه و مشيت تقريبا نص ساعه ايلين ما وجعني ظهري
بنفس اليوم و انا نايمه جاني الطلق بس كان بارد و ماصخ بس بطني تتقلص و ألم عبيط بالظهر و البطن
بس كان ( منتظم ) تقريبا كل ربع ساعه و بعدين صار كل 10 دقايق
قمت من الفراش الصبح دخلت الحمام اكرمكم الله لقيت عندي افرازات بنية و طبعا تشقق وجهي من الفرحه و استيقنت ان عندي ولادة و كلمت زوجي
زوجي طلب مني اكلم امه و استفسر منها لاني بكرية و رحت كلمتها و جلست معاها قالت لي صبري و شربتني منقوع زعتر و خلتني اكل تمر
و بعدين ع الظهر نزلت عندي قطع دم اعزكم الله دقيت على زوجي مره ثانيه قال لي نفس الكلام و رحت سألتها قالت يلا بنروح المستشفى
بس خبرت زوجي ما رضى لان الألم كان خفيف نفس ما هو بس انتظم كل 5 دقايق .. قال اختي لما اخذتها ما كانت تتكلم من الالم و انت عادي و تضحكين
اتوقع اذا اخذتك راح يرجعونك ..
امه ما عجبها الوضع و توترت راحت كلمت اختي عشان تجينا .. جت اختي قالت بنحسب الوقت بين كل طلقة و ثانية و مثل ما قلت كانت المدة 5 دقايق
قالت يلا بنروح المستشفى قلت طيب الالم عادي اقدر استحمله قالت مو شرط يمكن طلقك بارد !!
المهم ع الساعه 5 طلعنا انا و اختي و ام زوجي و 2 من خواته ع المستشفى يعني تقريبا الشعب كله ههههههههه
و انا اضحك اقول اتخيل ما في شي و يرجعوني البيت و انواع النكت و الاستهبال بالسيارة
وصلنا دخلوني من عند الطوارئ و بعدين على طول ع غرفة الولادة عشان يكشفون علي و انا اسألهم طيب ليش ما تحطوني بالملاحظة! استغربت
و بعدين رحت لبست اللبس تبع الولادة و دخلت الغرفة كان فيها نيرسات و سبحان الله اول ما دخلت راح الالم !
سألوني في وجع ؟ قلت لا .. قاموا يضحكون طيب ليش جايه ؟
بعدين جت الدكتورة المناوبة كشفت علي و انا اكثر شي اتعقد منه الكشف الله لا يوريكم اصيح من الالم
قالت مفتوح 5 سم ولادة !!
انا من سمعت جاني خوف مو طبيعي قمت ارجف كني سمكة مطلعينها من البحر ؛ (
ركبولي جهاز الطلق و جهاز نبض البيبي .. نبض البيبي كان سريع جدا يعني البنت كان ناقصنها اكسجين الدكتورة قالت لي نامي ع جنب
و بعدين الحمد لله استقر .. و بعدها قام يلعب علينا النبض مرات يزيد و مرات ينخفض و كان عندي تقريبا 4 نيرسات و الدكتورة كلهم قاعدين يراقبون النبض
حطولي سقاية و بعدين قالت الدكتورة راح نقرص كيس الماي قلت طيب فتح كيس الماي و جت النيرس عندها ابره فرغت الي فيها بالسقاية
سألتها شو هذا ؟ قالت هذا زين يخلي الرحم يفتح بسرعه !!! مع اني شاكه انه طلق لان بعده زاد الالم و قام يجي كل دقيقة و طبعا الالم ما ينوصف
بعدين قالت بوسع بأيدي بس انا ما خليتها توسع عدل قالت انت هذا ما استحملتيه ! بعدين كيف بطلعين راس البيبي ؟
طبعا تحطمت من كلامها و زاد الرعب
قمت استغفر و اسبح و ادعي ان ربي اذا اخذني ياخذني طاهره من الذنوب و قامت تجيني كل الافكار السوده و ندمت اني جيت ع المستشفى و ندمت اني عرست و حملت
راحت الدكتورة عند اهلي برا قالت ادعوا الله يخليلكم البيبي لان نبضها ضعف
و بعدها بشوي راحت تكلم زوجي ان راح يشفطوا البيبي عشان ينقذوها قام زوجي يصرخ عليها يقولها و انا وش عرفني وش هو الشفط ما درست طب !!!
اذا بتقوليلي بتسوين شي اشررحيلي عنه !
و اثناء ما هي تتناقش معه برا فتح عندي الرحم 10 سانتي و جت دكتورة ثانية كان توه بادي دوامها قالت فتح الرحم ادفعي
انا لما جيت ادفع حسيت الطلق راح بس هي قامت تشجعني تقول ادفعي بسرعة بتختنق البيبي رحت انا دفعت بكل ما عندي و الحمد لله
طلعت بنوتي و ما مرت ثواني الا و اشوفها على بطني
طبعا اللحظات كانت مثل الحلم بنتي كانت عيونها مفتوحه و تطالع مستغربة و اللهم بارك كانت جميلة جدا
حتى اهلي قاموا يقولون نخاف نطالع بوجها لا نحسدها ...
بس طبعا الحين صارت شي ثاني انكمشت و صار لونها احمر و اصفر انخسف القمر هههههههه
طبعا انا كنت مستغربة كيف قدرت اطلع الراس !! بس طلعوا شاقيني من الفرج ايلين الشرج الله يكرمكم
و طبعا بعد ولادتي اكثر ما عذبني الجرح و الخياطة و الحمد لله انا و بنتي بخير
و دمتم سالمين