المشاركة الأصلية كتبت بواسطة حياتي قمراتي
الحمد لله لاباس
اوكي دوك نحكيلك على ولادتي
انا ملي كنت فالشهر السادس فبدايتو تحل الكول و دايمن معايا الوجاع و لاطونسيوت تهبطلي
و مرة هكذا انا فالكوزينة مع العشي جوايه 6 طاختلي السقية و الوجع ماكانش بصح بداني في ظهري مع الطريق ايا 9 و نص كنت فسبيطار و القابلة طلبتني فالراديو تاع التاسع عطيتها غير السابع و انا كانت خبرتني الطبيبة ديالي بلي الطفلة التانية مراهيش نتخدة الوضعية الصحيحة بصح حبت تزيد تشوف بالاك سقمت روحها امالا زادت بعتتني مع الفرملية ندير راديو تما عندهم يا يما درتو و انا طالعة فالدرووج الوجع يقتل و انا فاشلة خلاص
ايه طلعتني للطابلة شافتني و كان الكول ديجا فاتح 6 و الوجع يجي يجي بالقوة و مبعد يبرد يروج خلاص و انا حاشاك من هديك الصالة للتواليت رايحة جاية تبانلي تحصرت و كي نخرج منلقى والو ... يجي السطر القاوي نروح عندهم ولدوني ولدوني ايا يشوفوني شوية و يعاودو يرجعوني يقولولي روحي دوري ,,,, يا يما الرحمة كي يخف السطر و يبرد طول يجيني النعاس عيني تجي تنعس و السطر يولي ايا و مبعد طلعتني للطابلة للمرة الاخيرة ايا ركبتلي السيروم و قالتلي اتكلي على ربي عاونيني و نعاونك ,, قلت بسم الله و خليتها على ربي ,, بدات تخلط تخلط و انا مع هداك الوجع ميمبا فقت بلي راهي تقطع فيا ,,,صح توجعت بصح و الله ماشي بزاف شغل متحسيش ثالمون الوجع,, المهم بدات تقولي ادفعي ادفي و انا معاها دفعت مليح مليح كنت قاوية مليح و قسما بالله انا نفع و ندعي لاخواتي كل وحدة باسمها ربي يرزقهم الحمل و الحمد لله دفعت حتى خرجت جنى حبيبتي
ايا هي خرجت و انا فشلت ,, قالتلي ارتاحي شوي دوك نرجع بعدها رجعت و قالتي ميلي على جنبك اليسار و عاودي ولي ,,, دارولي 2 حقن باه نتعاون رجعت بيهم دفعت شويا و الطفلة التانية جات برجليها ,, ايا دفعت شوية و زدت حبست و فشلت كااامل حتى ولات القابلة تعيط باعلى صوت زيدي زيدي وشبيكي الطفلة خنقتيها ,, علابالك هادي الهدرة مزالت في ودنيا ..علابالك هي قالت هكدا و انا هزيت روحي عصرت عصرت حتى خرجت العميرة رنا المهم خرجت و مبكاتش زادت خلعتني مي فطنوها الحمد لله
ايه داتهم لهيكا و خلاتني هكداك و كنت صايي بردت ,, يا يما على الخياطة يا يما مت مت علابالك
كملت كلش و جات عندي مبروك مادام و طلبت مني الاسماء
مسكينة هديكك القابلة هايلة يعني محبتش تقولي على الاسماء كما كنت نولد علابالها قادرة نخلط ههههه
جابتلي الاولى قالتي هيلك الاولى سميها قلتلها جنى و زيد لتانية رنا
ايه داوني طول فكرسي متحرك للغرفة و البنات مجابوهمليش طول داوهم للاكوافوز
|