شوربة الفريك
السلام عليكم ورحمة الله وبركاته
كثيرات من المبتدئات سالتني عن طريقتي في تحضير شربة الفريك
البارح صورتها بكل مراحلها ونقدمها لكل مبتدئة في الطبخ وطريقتي تختلف عن طرق البعض اكيد مش كل الجزائريات يحضروها بنفس الطريقة لكني اراها جد سهلة ولذيذة
بسم الله نبدا
نحتاج دجاج وقطع لحم خروف حبذا لو تكون ضلوع فيها العظم والشحم لانها تعطيها بنة هايلة
بصلة متوسطة وثوم وغصن كرافس ورند وفلفل حار اكيد حسب الرغبة
2 فنجان كبير فريك نوعية جيدة لان النوعية تلعب دور في البنة + 2 ملعقة كبيرة طماطم مصبرة وملعقة صغيرة هريسة او حبةطماطم ونقصي شوي من المصبرة
توابل وهي موضحة بالصورة ملح كسبر فلفل اسود افاح فلفل احمر حار
كل اللوازم هنا
نبدا اولا نرحي البصل والثوم ونضع اللحم في الكوكوت وشوية زيت وملح فقط ونقلي على نار هادئة حتى يذبل البصل
التوابل ما نقليهاش من المرة الاولى حتى لا تفقد رائحتها
ثم نضيف باقي المكونات مع غسل الفريك : الفريك الطماطم الفلفل الحار والرند والكرفص والتوابل ونقلي لبرهة ما نطولش
ثم نضيف كاس ماء ونخلي المكونات والفريك يتشرب عصارة اللحم والتوابل باه يجي بنين
واخيرا نمرق بحوالي 3 لتر ماء
قبل ما نغلق الكوكوت نضيف زيتون اخضر شرائح : اختياري ونغلق عل الكوكوت نصف ساعة كاملة
بعد ما تنضج نضيف بولات لحم مرحي نتبلها بلملح والفلفل الاسود فقط ونخليها تغلي في الشربة ما تديش وقت طويل وهي اختيارية طبعا
هاهي شربتنا جاهزة باه تنتقل للسوبيار
وتقدم مع الدبشة اي الكسبر والنعناع الجاف