*
أنا مو حابة أقسى عليك بكلامي ..
بس دام في قلبك ذرة حب لزوجك، تخيلي إن كل هالحب اللي تشوفينه منه مجرد ( تمثيل ) .. !
شـ بيكون شعورك ؟ أكيد بتقولين مقدر أستمر معاه وهو يخونّي بالتفكير ..
هو بعد لو يدري إن إذا قربك ولمسك وباسك تفكرين بغيره مستحيل يكمل معاك ..
الدنيا سلف ودين وأنا أختك، إذا زوجك الحين يحبك بكرا يجي اليوم اللي يصير عقله وقلبه معلقين بغيرك من غير ما تدرين، وتخيلي ما تكتشفين هالشي إلا وقت اللي حبّيتيه وعشقتيه ..
مو شرط يخونك فعلياً، يمكن يخونك باطنياً زي ما أنتِ قاعدة تسوين الحين ..
لا تقولين مقدر، دام ديانتنا الإسلام وربنا هو الرحمن الرحيم اتجهي لـ رب العالمين اللي ما في أحن منه عليك، ادعي بكل سجدة، قومي نص الليل وتذللي لله وسمعيه بكائك وقولي يارب املي عيني وقلبي وفكري بزوجي، يارب أنت عالم بحالي فوضت أمري إليك وتوكلت عليك يا فتاح افتح لي باب النسيان ومعونتك على حبي لزوجي وإخلاصي له ..
ابدي صفحة جديدة من اليوم، سوي أشياء ترضيه ويحبها، خليه يشوف منك كل شي حلو وجميل علشان ردة أفعاله تساعدك ..
وإذا تبين أفكار كلنا هنا خوات وبنساعدك، انا توني مسجلة والبنات تبارك الرحمن كلهم ما يقصرون معي، فيهم الخير والبركة، بنوقف معاك وبنعاونك لو مدّيتِ يدك لنا ..
إضافةً على ذلك تصدّقي كثير لو تطلعين ريال واحد باليوم، وبعد إذا عندك الخبز اللي خلاص بترمينه خذي وقطعيه قطع صغيرة وارميه بأي أرض فاضية أو حطيه عند نافذة غرفتك للطيور وانوي بداخلك وادعي قبل تروحين عن المكان انها علشان ربي يعينك في أمرك ..
وربي ما يصرف شي عن عبده إلا دليل على حبه له، احمدي الله واشكريه إن ربي حباك بزوج يحبك ويحترمك يا حبيبتي ..