السلام عليكم ورحمة الله وبركاته
مساء الخيرات عالجميع مشكورين علي سؤالكم علي سوما الله لايوريكم باس وبارك الله فيكم
كيف روحت قبل شويه من العيادة طبعا الموعد في الأصل ليا لأني ليا فترة نشكي من حزامي وعندي ليه خفيفة عاينت قبل فترة ممكن تلاته شهور ودارولي جهاز وقالولي نردوا عليك كان في حاجة وقعدت نستنى وماردوش اليوم مشيت منستفسر شن صار ومندير كشف من تحت لأنه شاكه إنه عندي التهابات هما سبب الوجع وقلت في نفس الوقت نساءلها علي سوما
المهم مشيت وقاتلي الجهاز طلع تمام مافيك شي كل وضعك ممتاز والرحم رجع لمكانه وطبعا سبب التاخير في الرد قالت احني نردو عليك كانا فيك حاجة بس كان الوضع تمام معاش نردو معناها افهميها بروحك
قلتلها مندير كشف عالالتهابات طبعا نحسابه الكشف العادي زي في الحمل عباره عن مسحة من المهبل بس لقيتها بكل ثقة مطلعتلي ماكينة صغيره زي المسدس ترعش وشفافة زي المرش قلتلها في خاطري هذا شني أبدا مانديره علي قد ما قنعو فيا هيا وراجلي قاتلي مش وأعر دقيقتين بس ندخله ناخد عينه من خلايا الرحم ونوعدك نساعدك وما نوجعكش وكان حسيتي بالم قوليلي فورا نوقف طبعا واني مسكره راسي ورااافضه بشده قاتلي امالا خليه مره تانيه لكن مفيش هروب منا ضروري اديريه مهم جدا كل نساء العالم يديروا فيه مره كل عام قلتلها باهي خلاص نديره مره تانيه قاتلي باهي توا نديرلك كشف بسيط بيدي وافقت وشافت عالسريع واندهشت قاتلي المنطقة عندك ممتازة وصحية جدا قاتلي جبتي طبيعي ؟قلتلها إيه قاتلي محظوظه نحسابك جبتي بعملية لأنه المكان صحي ولا كأنه طلع منا عيل رغم انهم ما خيطونيش ماشاء الله قعدت تضحك قالت معقوله المكان هذا طلع منا رأس بيبي واني نقول في خاطري بسم الله ماشاء الله راك تعينيني ههههههه
المهم بعذ طمنتني عالوضع اشجعت شويه إني ندير كشف المسدس هههههه قاتلي باش تطمني مره وحده وترتاحي نفسيا سألت رجلي قلتله شن رايك قالي ديريه إنتي شن خاسرة وكان حسيتي بالم قوليلها توقف وقالي تحملتي وجع الجياب ما تتحمليش دقيقتين عالسريع وترتاحي وفي الأخير غير عالتهديد قالي ما تقعديش تشكي بعدين ديريه توا وارتاحي ههههه
وأخيرا اقتنعت ودرته والحمد لله ماحسيتش غير شي بسييييط لا يذكر كانت يدها خفيفة ماشاء الله وتشجع فيا تقولي كل شي اوكي استرخي بس وتمت وقاتلي تو نرفعو العينة للمعمل يومين أو تلاته ونردوأ عليك والحمد لله روحت واني مرتاحة نفسيا إني كشفت وتريحت
وبالنسبه لسوما الحمد لله انخفضت الحرارة شوي مقارنة بامبارح والدكتورة قاتلي الحرارة عباره عن مقاومة الجسم ضد فيروس وقالت إنه أغلب الأطفال مرضي توا برده قالت استمرو علي خافض الحرارة ولازم تاكل وترقد كويس وراقبوا درجة الحرارة وخلاااص
اخخخخ أخيرا كمل التقرير المفصل هههههه