[dr.loly]

المشاركة الأصلية كتبت بواسطة اوشي

صدقتن يافروستي وهدهد تعب مانحكيلكم عليه


اولا بدينا العرس وكل ماهو علي هامش العرس من يوم جت العروس

فرشت شقتها اللي هو الخميس

وقعدنا يومك وثانيك ماشيين لحوش عمي للمساعدة في كل الامور والصراحة ما نمتش عندهم الا يوم

الجمعة اللي يصبح السبت العرس..

المهم كان يوم الاربعاء طبعا اللي بعد الخميس اللي فرشت فيه العروس

يوم الاربعاء هذا جتنا الكوافيرة في الحوش انا وصبياتي فتلة وقص وصبغ وكل شي ماعدا سلفتي القديمة

قالت لا عندها كوافيرة خاصة بتمشيلها

وقسمنا كل مجموعة تحني في يوم انا طبعا اخترت الخميس عشان حنتي تكون مازال طازة

ويستمتع بيها ابو الشباب خخخخخخ

حنيت انا ودودو ورويتا دودو حنيتها الخطيفة وانا حنيت والحنة الله يبارك

جت اتهبل طبعا جتني الحناية في الحوش بصراحة الحنايه هذي مضمونة وبنت ناس

نعرفها وديما تجيني وتحني فيا وفي الصبح الجمعة اخذيت شناطينا ومشينا لاننا بنباتو في

حوش عمي ..

ويوم الجمعة كان الرمو ..

درنا العشاء كسكو العرس وطلع ايهبللللللللل مع محشي وامسير وسلاطة واللحم امدخن بالفحمة

وطبعا سواية وغسالة الماعين بالاجرة لذلك ماتمش الا اشياء بسيطة

فبل العشا اللي هي العصير والشكلاطة والحلويات والكابتشينو وقسموهم البنات الشبابات

الصغار ونحنا يلي بنمشو في الزفة كنا بالداخل نجهزو في روحنا

طبعا انا لبست الزي الشعبي القديم الفوطة الحمرا وفيها لون اصفر مع الفضة

والميك اب طلع ايهبل دارته لي الكوافيرة حاجة من الاخر

وسلفتي لبست زي تونسي وصبيتي لبست طرابلسي وبنت عم زوجي لبست شرقاوي كامل

والعزايز كلهم لبسو شرقاوي بسيط

ودودو قصت شعرها كاروه او كاريه لان شعرها الله يبارك ويزيد غزير وناعم

وجبت لها لبسة حلوة بكل فيزون رمادي نقشته طالعة مع فالينة طويلة للركبة زي الجلد

لماعة تايقر لونها ابيض في الاسود في الرمادي وجبت لها كندرة رمادي سبيدرو

ورويتا فستان جلد بني مع سير ذهبي وجاكة فرو تايقر بلون بيج واسود

ورمينا عالعروس والجو كان امطار متواصلة بس عبارة عن رذاذ والجو ايهبل

ولما توأم روحي حقني قالي كنك اتقول طايحة من معرض تراثنا الجميل

غـــــــــــــــــــــــــزل عــــــــــــــــــــــــــذري

وجينا قعدنا انحوسو في الحوش انا وصبياتي اللي هنا خوات زوجي لان سلفتي عدت لحوشها

المهم مارقدنا الا وكل شي جاهز للغد وشلنا صناديق الامية والمشروبات والعصائر وكل شي

وحطيناه قريب من الباب عشان بكرة يشيلوه للصالة

ومارقدنا الا الساعة 4 وكنا تالفين للاخر

وننضنا عالعشرة وتينا ارواحنا وشلنا حاجتنا ومشينا للصاله


للحديث بقية ساعود ...

فاصل للصلاة وامور اخرى

ماشاء اللله ماشاء الله .. دام توأم روحك قالك هكــي معناها طلعتي سقــع
بس اللبسه ماتخيلتهش زين قصدكـ العبـــــــــــــروووق؟؟؟؟

ومأجوره ع التعــب إن شاء الله ..
ودودي ورويتا حتى هنا شكلهن أنيقااات كيف مامتهن عااااد

الحاجة هذه بالوراثه راه خخخخ

حلو جو الافراح في الشتاء نحبه .. بصراحه لاشعر يتعبك ويسخنك هههههههه كان طلقتيه
ولا ميكاج يخرب من الحموووو ولا دبش يحميك جو م الاخــير



احكيلنا ع العروسه واستايلها في المره القادمه..