السلام عليكم اخواتي الغاليات:
قطعتكم 3 شهور وهي مدة طويلة بعرف بس اسمعوا اللي صارمعي
زوجي طلع معه مشكلة بس بالضبط مامنعرف شو هيي
عمل تحليل للحيوانات المنوية
والدكتور قال لازم عملية،بس زوجي مابيعرف كتير بالمصطلحات الطبية بالالماني لهيك مافهم بالضبط اذا كانت المشكلة بالعدد ولا بالحركة ولا عرف اديش نسبتهم
المهم عمل عملية من شهرين وقلله الدكتور يجي يفحص بعد شهرين ليشوف الوضع
وبكرا رايح يفحص لنشوف النتيجة
بس عندي استفسارين:
الغريب بالعملية انو عملوله الشق بالخصية نفسها مو تحت البطن
مع انو العلم متطور ،ايام زمان كانوا يعملوا عملية الدوالي بشق الخصية بس بعد ماصار إله مضاعفات اتطور العلم وصاروا يعملو شق صغير تحت البطن ويعملوا العملية
فيكون تسألوا وتشوفوا عالنت كمان،كل عمليات الدوالي الحالية بيعملو شق بالبطن مو بالخصية
بقى ليش عملوا لجوزي شق بالخصية مابعرف
هاد سؤالي يا بنات بليز اللي عندها معلومة تجاوب
اصلاً انا شاكة بعملية الدوالي وبعتقد انو العملية كانت عملية الخصية المعلقة اذا سمعانين فيا
لهيك بنات بترجاكم تفسرولي اكتر اذا عندكم معلومات ولو بسيطة
عن عملية الدوالي وعملية الخصية المعلقة
بفرض انو جوزي كان بعاني من الدوالي او من الخصية المعلقة او حتى من التنين
واهم سؤال مين حملت بعد عملية الدوالي حمل طبيعي يعني ومتى صار الحمل
بليز يا غاليات اذا عندكم اي معلومة لاتبخلوا علي فيها
وادعولي احمل عن قريب
والله العظيم الغربة صعبة من دون ولاد
انا دورتي بهاليومين ادعولي ماتجي
والله يرزق كل مشتهية بإذنه تعالى
والحوامل الله يتمملكون على خير يارب
ورجاء ياغاليات سامحوني على تقصيري
لانو وقتي صاير كتييير ديق
عم ادرس لغة وعم اشتغل وبتعرفوا طبخ ونفخ دوبني انام صدقوني
طولت عليكن حبيباتي
بالتوفيق للجميع وناطرة ردودكم
اللهم ارزق اخواتي وارزقني الحمل في القريب العاجل
فأنت القادر على كل شيء
اللهم لاتذرنا فرداً وانت خير الوارثين
امييين....