خواتي شكرا كتير لمشاعركم معي و اكيد انا و زوجي قررنا وقف موضوع الحمل ونشوف اذا في عنا مشاكل تسبب هاي التشوهات و الاجهاضات
الحمد لله انا ببلد فيها الطب كتير منيح و خاصة عمليات اطفال الانابيب لكن مع كل النجاح في الطب الا انه ما خرجنا باي نتيجة لسبب اللي بصير معنا و خاصة انه اول حمل احنا نزلناه و بصعووووبة لنزل و التاني توفي بدون سبب يعني كل حالة بتفرق عن التانية
هلا بعد الاجهاضات اللي صارت معي عملت فحوصات كتييييره من فحوصات كروموسومات و فحوصات تجلط دم .. الخ
الحمد لله كله كان تمام و ما في مشاكل و اجمعوا الاطباء انه السبب في تشوه طفلي الاول هو الصدفة و سبب الاجهاض التاني هو حمل ضعيف وهو تنزيل زي اي مرأه بتنزل وقررت دكتورتي انه اذا حملت رح تعطيني ابر تمنع التجلط احتياطا
انا كنت كتير خايفة انه يطلع مشاكل كروموسومات خاصة انه زوجي قريب لي لكن بعد الاطمئنان على سلامة الكروموسومات قررت التوكل على الله واعادة المحاولة
الاسبوع الماضي احتفلت انا و زوجي بعيد زواجنا الثاني بدون اطفال , الحمد لله على كل شي بس كم كنت اتخيل انه بالسنة التانية يكون ابني معنا يشاركنا فرحتنا و يا رب عيدنا الثالث يكون ابني بحضني و ما تحرمني اكتر من سنتين يااا رب
الكل بحكي ليه مستعجلة كلهم سنتين بس للاسف ما حد بعرف كم بكيت و تالمت و حزنت و انجرحت من كلام الناس, ما حد حاسس فيه لما كل البنات بقعدوا يحكوا عن اولادهم و قصصهم, ما حد بحس فيا لما كل اللي تزوجوا معي صاروا يفكروا بالبيبي التاني و انا لسا منكسر قلبي ع واحد
ما حد بحس فيا انا و زوجي لما كل فلوسنا رايحة على العمليات و الفحوصات و العلاجات وبيجوا بالاخر بحكولنا انتوا بتصرفوا كتير و ين بتروحوا برواتبكم... الحمد لله دائما وابدا
انا بهاي السنتين و بهاي التجربة تغيرت كتييير سبحان الله طول عمري كنت البنت المدللة البنت الناجحة البنت اللي كل شي اريده استطيع تحقيقه تفوقت بجامعتي و بعدها بجامعتي ومن بعدها بحياتي الزوجيه لكن الشي الوحيد هو هاد الموضوع
اليوم اكتب لكم و انا ابدا ببرنامج ارجاع الاجنة المجمدة و الاسبوع القادم باذن الله رح ارجع اجنتي و يااااارب تزبط و تكون التالتة نابتة
كنتوا تحكوا انه يا رب تكملة قصتي انه اكون بالشهر التاسع و بطفل سليم لكن النهاية السعيدة مو نهاية كل قصة مع ذلك انا رح ابقى متفائلة ومخليه املي بالله كبير هذه ارادته و انا راضية بما يريد