تعرفوا اليوم اول مانضت حسيت سوما قالقة مسكينة حتي وقفتها عالشباك تشوف في الجو وفرحانة وجعتني انها محبوسة قلت منطلعها بعد فطرنا وغيرتلها ورضعتها قلت لراجلي استنى منطلعوا معاك نتمشوا ونسقدوك للجامعة ماهو الجامعة قريبة علينا يمشيلها على رجليه مسافة ربع ساعة بالكثير
المهم طلعنا تمشينا شوي وفي نص الطريق حسيته صقع وولينا اني وسوما وماوصلتش للحوش نين اتصل بيا قاللي تعالي بسرعة في حفل تخرج في الجامعة تفرجي عليه
الله سبحان الله عالزحمة ومع ذلك نظام وترتيب والطلبة كلهم لابسيم لبس التخرج الاسود والقبعة السوداء والدكاترة والمشرفين لابسين لبسة احمر بالازرق وقبعات زرق ورايحين منظمين والضيوف ماتلقوش كان اللي شاد باقة ورد والا هدية ودايرين الحفلة في الهواء الطلق جنب نافورة وشجر جو خيالي والدكاترة لما جو طابور ويستقبلوا فيهم بالطبول وموسيقى زي الزكرة وبعدين الطلبة قالوا النشيد كل في منهم صينيين وفي كنديين لكن بعدين راجلي قاللي تأخرت منعدي كان بتقعدي تتفرجي بروحك اقعدي قتله لا شن بيقعدني في هالزحمة تو نريح بينهم ههههههه