[dr.loly]

_____________________________________

باهي الحمد الله علي سلامتك صار انزريتي في مصراتة غادي .. اكيد رعب وخوف

اي والله انزريت غادي...

طبعا خالتي جت بنغازي وقتها عشان عملية خالتي الصغيرة ع الغضروف عموما وقتها كان ليا 3شهور ع بياني
وفرحي كان ع الصيف وكنت بنبتت ونا عارفه ان مصراته فيها حاجات سماح خصيصا ف الحرير والبدالي العربيه
والذهب وعندهم حاجات مميزة ف بعض الاشياء
عديت روحت مع عيت خالتي كان التاريخ وقتها 25.1.2011
اول ايام جن افراح ولمات ومناسبات عليك جووو ماطعنش محلات

وبعدها جا المولد ندكر في يوم الحب ههههه وكانوا خايفين من الثورة الناس ف مصراته نقصد تقول كانوا حاسين انها بتحاااصر
العرب غادي قعدت اتلم في المواد الغدائيه وخلاص
لدرجة راجل خالتي حتي هو قال نديروا نفسهم جاب صناديق طماطم وزيت وتن وجبنه وصابون وحاجات هك واحيين حرب بجد
وطلعنا قبل المولد بيومين هك نتفرجو نذكر عجبتني بدلة عربيه متاع فجرة وذهب يقولولها ب 1700 ووحده تركواز بي 600
كنت بنرد جو زمان ببنغازي انطلع بدلة كبيرة وصغيرة
هههههههه جت عاد الحرب ولا شريت هذه ولا هذه
بس ايام ماننساهنش طوووول عمري

كان دعائنا انا وخالتي وكنتها ان يطيح علينا صارووخ ولا يخشوا علينا جماعه الطاغية
وبعد نفقد الامل كانت خالتي تبعث فيا التفاؤل تقولي توا يقعد كله خراف ونحكوا به في ايام فرحك وليلة حنتك وتجيبي عيال وتحكيلهم هالقصص وقتها كنت متوقعه النهاية مانحسابش ان ننجوا من هالحرب

قصص واجد صارنلي غادي نا وعيت خالتي والحمدلله صمدنا في بيتهم الصامد ع قولة المقبور
لعند ما جا خويا وروح بيا ف جرافه بحريه وعليك ترويحة كانت قمة العداب الحرب كوووووووم واللي صارلي بها الجرافه كوووم اخر تبيله قصة بروحه... خاذي قصص الحرب

والحمدلله وصلنا بنغازي سالمين طبعا عيت خالتي ماجوش مابوش يسيبوا بلادهم ...ونا ماكنش خاطري انسيبهم بس خويا تعب بيش ما حصل وجا وقالي ان ماما مشغوله وديما تبكي علينا فروحت وانا مكسورة الخاطر


اول اسبوعين نفسيتي تعبانه وماناكلش الحق كنت نبي علاج نفسي من اللي صارلنا من رعب واصوات تفجير قويه وجماعة الطاغية خشوا منطقتنا حدودها بس مرتين ... حسيت ان بنغازي كلها جتنا تحمد ع السلامة وقتها
بعدها بديت نتأقلم... وماطقيتش شهرين لين طلع فرحي والحمدلله ع كل حال