[بسبوسة زوجها]

المشاركة الأصلية كتبت بواسطة nayota

صباح الخير صبايا


منار لاتخافي ولاشي قصدها الرحم مفتوح عندك تلاتة سم ولحتى يصير ولادة لازم يكون عشرة سم وازا متل ماقالتلك انو بس يصير الرحم مفتوح اربعة معناها بتضلي بالمشفى عم تطلقي لحتى يصير عشرة بعدين بتفوتي على غرفة المخاض وبتولدي.. انتي دوري بالنت وشوفي كيف بيكون وضع الرحم بهي الحالة وفي كتير صور مرسومة بشكل توضيحي وبيفهم الواحد شو صاير معو بالعكس فرحي اصلا الشهر التاسع كلو ملل ومابتسدق الوحدة فينا ايمت تولد وترتاح
وعندك فترة طويلة لتولدي وتدخلي غرفة المخاض يعني بتتهيئي نفسيا مودغري وانتي بس تلاقي حالك نزل منك مي هي بيكون نزل السائل لامينويوسي او نزل منك دم بتكون سدادة الرحم نزلت وكمان ازا حسيتي بمغص من ضهرك لبطنك وحسيتي بألم لا يحتمل فورا بتكوني مجهزة شنتاية المشفى فيها مستلزماتك ومستلزمات البيبي من ملابس إلك وإلو ومابعرف كمان ازا نظام المشفى عندك بيلبسو البيبي من عندون وازا بدك تفصيلات على غراض الشنتا على عيني وبوشك عالمشفى بيكون اجا الجد وماعاد في لعب وعلى فكرة هاللحظات احلى اللحظات وان شالله بتقومي بالسلامة يارب ولاتنسي ماتطمنينا عندك

يسلمو كتير حبيبتي هديل
من يوم رحت لعند الدكتورة ولهلئ عم ئول اليوم بولد وماعم يجيني طلق بس عم يصير معي مغص خفيف وضهري عم يجعني كتير وكمان مبارح شافتني امها لسلفتي وئالتلي بطنك نازل معناها ئربت ولادتك
وانا كتير حابي اولد الله وكيلك رح موت من التعب والتقل بس اتسطحت بصير كل منطقة الورك والفخاد بيوجعوني وجع فظيع ما عم بئدر نام طول الليل
بس هدولة بدي اسألك
يعني في بوادر للولادة ئبل بيوم او اكتر ولا هيك فجأة بصير مغص وطلق بنفس اليوم وعلى رأيك يعني تلاتة سنتم بعد كام يوم ممكن اولد لاني خايفي يفتح الرحم اكتر ومايجيني طلق ويعملولي طلق صناعي بئرا عالنت انو صعب
وبتعرفي قررت أتوكل عاالله وآخد ابرة الابيدورال لان دكتورتي نصحتني فيها وئالتلي هي آخدتا وسلفتي آخدتا تلات مرات وبنت حمايي دكتورة وآخدتا بكل ولادها والدكتورة ئالتلي كتير آمنة انشاءالله
انتي شو رأيك؟
ومشان شنتة المشفى سألت الدكتورة ئالتلي بس جيبي لحالك روب نوم وللبيبي بدل خارجي بئى ياريت انتي كمان تنوريني حبيبتي
صحيح كمان بدي اتشكرك لانك ئلتيلي عالبانيوم تبع البيبي اول شي استغربت وماكان يخطرلي بنوب انو فيه هيك شي لما دورت تاري السوئ مليان اشكال الوان عنجد يسلمو
ومرة تانية الف مليون مبروك الحمل الله يباركلك فحملك وفزوجك وفبنتك نايا انشاءالله وديري بالك عحالك حبيبتي
وشو اخدتي موعد عند الدكتورة؟