السلام عليكم .. حبيبتي ليالي بتكلم بصراحه ولا تزعلين مني ياقلبي
من ولدتي وانتي تعيدين وتزيدين بنفس الموال ! خلاص ياقلبي تجاوزي هالمرحله خلاص انسي
ولدتي قيصري وكبر ولدك حرام عليك للحين تحنين وتزنين انك والده قيصري ، عادي جدا ياقلبي كل النسوان يولدون قيصري ايش صاير بالحياه
واذا عمرك ٣٠ !! تعتبرين صغيره ليش انتي مكبره نفسك ؟ فيه بنات عمرهن ٣٠ وتوهن يتزوجن وعادي جدا ..
شي ثاني انتي مازلتي تعيدين وتسبين ف زوجه ابوك ؟ ياقلبي خلاص حرام عليك اعتقيها لوجه الله
لو هي سيئه صيري احسن منها واذكريها ب الطيب ..
نجي لزوجك .. يعني مايصير تشوفين نفسك على زوجك ، واذا جامعيه وجميله ؟ الدراسه والجمال ماتسعد الانسان
والرجال مايدور وحده تشوف نفسها عليه .. يدور وحده حنونه وقلبها طيب وتحتويه ، شوفي نفسك دايم تنتقصينه عشانه عسكري !!
واذا كان موظف قد حاله مو مهم ترا .. لا تخلين نظرتك قصيره وصغيره ، غريبه انك جامعيه وتفكيرك بالطريقه ذي !!
المفروض عشانك جامعيه ومثقفه تكونين اكبر من هيك حبيبتي ..
انا شهادتي اعلى من شهاده زوجي ، واصغر منه بواجد .. واجمل منه ، لكن عمري مافكرت اقول هالكلام عن زوجي ، لانه عندي اكبر وارفع من هالسواليف
احبه واعزه ولا شهاده ولا جمال ولا شي بالحياه ينزل من قدره ..
لا تقارنين زوجك بنفسك ابدا .. لا تقولين له انا جامعيه وانت عسكري .. لا تحسسينه انك شايفه عمرك عليه !!
طبيعي يعايرك ف اهلك وانتي شايفه حالك عليه ، يعني تستنقصينه ولا تبينه يستنقصك ؟
والزوجه دايم توطي صوتها عند زوجها وتراعيه وتدير بالها عليه .. وغلط غلط تتكلم عنه بالشينه وتطلع عيوبه
مايصير كل مره تقولين انه مدمن العاده .. زوجك ذا لازم تكونين ستر وغطا له !
جمعتكم كلمه الله .. واستحلك بكلمه الله .. ونمتم علي مخده وحده ، ماعاد فيها انا وهو صرتم واحد وبينكم طفل بعد
دايم استري على زوجك وقابليه بوجه حلو وسمح ، وان غلط عليك اسكتي ولا تغلطين بينكم طفل وانتي ماتبين الطلاق
خلص عيشي مع ولدك وانبسطي بحياتك وخليك من هالسوالف اللي مالها داعي ..
وطليقه زوجك المفروض ماتجيبين سيرتها ابد.. يعني تذكرينه فيها ويقعد يقارن بينكم ..
وترا مو عشانها مو جميله ولا متعلمه معناته انتي احسن منها ، لا ابدا ابدا انتي غلطانه ..
ممكن هي افضل ب صبرها وتحملها وامور كثيره ، الجمال ماهو مقياس ابدا .. وتراك كذا اغتبتيها وذنب الغيبه عظيم
فيه كلام واجد ودي اقوله .. اخت تقوله لاختها .. صعب تعيشين حياتك كذا وصعب زوجك يعيش معك وانتي كذا وصعب على ولدك بعد
غيري نفسك .. اللي راح راح لا تجلسين تعيدين وتزيدين فيه ، الرجال مايحب الحرمه الزنانه ابدا مايحبها
ياليت تقرين كلامي وكلام الاخوات وتاخذين العبره منه ، لاني الاحظ الكلام اللي مايجي على مزاجك تطنشينه وكنك ماقريتيه وهذا غلط
الله يسعدك ويوفقك ولاتزعلين مني ..