بالنسبه لموعدي الدكتورة شيكت علي من تحت واخذت مسحه من عنق الرحم وشافت عمليتي وقالت انه كل شي شكله كويس. علمتها عن اللي صارلي بعد شهر من العمليه وقالت غريبه انه رجع لك الالم وانتي ما شلتي شي ثقيل بس يمكن اجهاد او شي زي كذا.. عموما مهو شي عادي بس الحمدلله انك خفيتي الحين.. قلتلها طيب متى ارجع لحياتي الطبيعيه وحابه اسوي شوي رياضه عشان انحف وقالت عادي ابدي الحين!!
قالت ابدي بالتدريج بس اهم شي رياضات مو عنيفه؟ قلت لا وين عنيفه حدي امشي على السير ولا اسبح بالمسبح.. قالت خلاص ابدي شوي شوي وزيدي بالتدريج بس اذا حسيتي بالم وقفي على طول.. قلت طيب وشغل البيت وشيل البيبي قالت انتبهي على نفسك زيادة اسبوعين ثلاثه كذا وبعدها ان شالله ترجعين لحياتك زي اول.. والله مدري عنها ان شالله ما توهقني بس
بالنسبه للولب استغربت لما قلتو لي انه اللي والده قيصري ماتركب لولب.. سألتها اليوم وقالت عادي ماله دخل طبيعي ولا قيصري كلهم يركبون لولب ويعتبر افضل مانع للي يبغا يطول.. انا ان شالله ناويه ابدا احاول بالحمل بعد ست شهور لاني المرة اللي فاتت قعدت سنتين لين ماجبت حبيبي خلودي ومادري انا جبته بسبب التلقيح الصناعي ولا جبته طبيعي لاني سويت اشعه صبغه وبعدها تلقيح صناعي وبعدها سوينا لقائات زوجية بنفس الفتره وحملت ذاك الشهر!! احتمال اشعه الصبغه كانت السبب وممكن احمل طبيعي مرة ثانيه.. يارب يكون كذا.. عشان كذا بعد ست شهور بوقف المانع ان شالله واشوف عشان لو ما صار حمل خلال سنه برجع اسوي تلقيح صناعي وحوسة وبياخذ وقت.. اللولب ما يناسبني الحين بس لو جبت طفلين ورا بعض مثلا ودي احطه واقعد اربع ولا خمس سنين..