ياحزة الضيق صدري منك ماضاقي
لقيت معك العلاج وهانت العلــه
اليا رميتي بدلوك داخل اعماقي
قريت لك ماتيسر من كتاب الله
اطوي حبالك وانا واقف على ساقي
عليك راسي طويل ولا قصر ظلــه
كم راح من ضيقه وكم من حزن باقي
جاريت كشف الهموم وجات منسلــه
وانا لو اني زعلت وشانت اخلاقي
لازلت من فضل ربي من هل الملــه
مخلوق قانع وراضي بامر خلاقي
مثلت لامره وانا خاضع من الذلــه
بكيت يوم المدامع تحرق احراقي
لكن هانت بعد جف البكا كلــه
اخاف من يوم تشخص فيه الاحداقي
وتميل بي كفة التقصير والزلــه
يارب عفوك وانا للعفو تواقي
كم لي وقلبي يفوح ولا برد غلــه
لو راحة البال تعرض وسط الاسواقي
ماكان نصف الخلايق صابها خلــه