السلام عليكم ورحمة الله وبركاته
ازيكم يا بنات عاملين ايه؟؟
انا بصراحه مش عضوه فعاله هنا انا بدخل اشوف نصايح واخبار واتابع معاكو ... وربنا اللي عالم اني كل ما بشوف واحده نفسها في حمل بدعيلها من قلبي والله ..... ولما روحت العمره في رمضان دعيت لكل واحده فيكو بضهر الغيب
السبب اني مش بعمل مواضيع ولا مشاركات اني وصلت لقناعه (( أَنَّ مَا أَصَابَكَ لَمْ يَكُنْ لِيُخْطِئَكَ ... وَمَا أَخْطَأَكَ لَمْ يَكُنْ لِيُصِيبَكَ )) وبالتالي فاحساسي ان وقت ان ربنا يكرمني بالذريه الصالحه ماجاش لسه .
اسفه للمقدمه الطويلة بس انا بقالي مده عندي حاجات غريبه ومش عارفه ده سببها ايه وجوزي بيقولي ما اخدش دوا يمكن اطلع حامل بس انا مش عايزه اشغل تفكيري بالحكايه دي عشان ما اعشمش نفسي .
مبدئيا انا الشهر ده بدأت اتابع مع دكتور شاطر اوي الحمدلله ... قالي حنتابع التبويض ... وانا دورتي منتظمه الحمدلله وهو عملي سونار وقالي ان البطانه بتاعتي ممتازه الحمدلله ... ده غير ان جوزي عمل تحليل ولاقاه طبيعي الحمدلله
دلوقتي انا البيريود جاتلي يوم 1-10 ... الدكتور شاف التبويض يوم 11 وعملي تحليل يوم 21 ولاقي نسبه هرمون البروجسترون طبيعيه جدا وان انا في مرحله Luteal Phase وكله تمام واداني حمض الفوليك وقالي لو البيريود نزلت حنعمل تحليل هرمونات في اليوم التاني للبيريود وبعدها الصبغه عشان نشوف قنوات فالوب
دلوقتي انا بقالي اكتر من 10 ايام عندي وجع ضهر فظيع وكان اعراض البيريود كلها ...وبعديها بطني بقت تعمل حاجات غيربه جاتلي حموضه لاول مره في عمري لمده يومين وبحس اني الاكل واصل لحلقي حتي لو اكلت من مده طويله .... ده غير مغض في المعده وتحسها منفوخه كده ووجع في اسفل البطن كده .... واشتغل بقي الصداع اللي مش عارفه اخدله علاج عشان البنادول مش بيأثر فباخد دوا قوي غلط للحوامل ... غير كمان سوري للفظ بعمل حمام كتير وساعات بحس ان رحته قويه
تفتكرو دي اعراض حمل؟؟؟؟؟ مش عايزه اعيش الوهم والله بس اعمل ايه الموضوع سيطر عليا