حلوة أفكار البنات بس حأضيف لك فكرة ممكن تضيفيها و هي عنصر المفاجأة .. .. يعني ليلة عيد ميلاده لمن تجي الساعة 12 غني لو بنفسك و جيبي كب كيك مثلا و عليه شمعة صغيرة و صوريه فيديو وهوا يطفيها و قولي لو كل سنة و إنت طيب و خلاص حيفكر إنو خلصت المفاجأة .. ويبقى الفيديو للذكرى .. اليوم التاني تصحي قبلو و تكتبي على المرايات إللي يوقف يتجهز عندها عبارات بالروج الأحمر أو الفوشي .. ( لا تكثري عبارات مختصرة و معبرة ) .. وبرضو مرايات الحمام عبارات تانية .. و بعد ما يطلع الدوام أبدأي بالزينة و التجهيز للحفلة البسيطة و أفضل لو كانت مختصرة و بينك و بينه بس .. .. ممكن توصي محل ورود أو محل باقات الفواكه(Edible Arrangements أنصحك فيه جداً رائع و لذيذ) يبعت لو باقة معاها بالونة وحدة هيليوم مكتوب عليها إما i love you أو happy birthday .. على محل شغلو لو أمكن .. و لو ما أمكن ممكن توصيهم يجيبوها للبيت تزيني بيها طاولة السفرة لحفلة الليل .. .. و جيبي تورتة صغيرة ممكن توصي عليها في محلات الكيك إللي تنعمل بالفوندان و عليها مجسم رجل .. حسب شغلو أو أكثر شيء يفضله .. مثلا الطبيب حيعملو له كيكة عليها مجسم دكتور معاه سماعات أو دكتور بالروب الأبيض و بيفحص مريض ع السرير أو جنبو كتب طب و هكذا .. مثلا لو شاب يحب البلايستشين يعملو مجسم بلايستيشن أو شاب بيلعب بيه .. ( إن شاء الله فهمتي الفكرة ) .. أو لو ماتوفر جيبي كيكة بسيطة جداً مكتوب عليها كل سنة وإنت طيب أو أي عبارة خاصة تفضليها و أعملي لو الأطباق إللي يحبها أو جيبيها من السوق جاهزة .. .. و طبعا ماتنسي هديته جيبي لو حاجة يكون محتاجها دي الفترة أو ناقصتو مثلا ( جوال - محفظة - نضارة شمسية - بجامة - جهاز لاب توب - قلم ماركة - ساعة - طقم عطور -... إلخ أي حاجة محتاجها .. لو كان رياضي مثلا جيبي لو طقم رياضة جديد مع شوز و غلفيهم في علبة حلوة و الأفكار كتير ترجع لإيش زوجك يفكر يشتري الأيام الجاية ولو ماعندك فكرة جرجريه بالكلام بطريقة حلوة وغير مباشرة عشان تستشفي إيش يناسبو هدية ) .. و ماتنسي الكرت .. ممكن تعملي الكرت بنفسك مثلا صورة زواجكم أو صورة حلوة لزوجك أطبعيها على ورق A4 .. واختاري قبل الطباعة إن الصورة تكون ربع الصفحة بس أو نصها حتى تقدري تطويها و تسير كرت ( أستخدمي ورق مقوى حتى يطلع شكلو حلو ) وهكذا .. ممكن تستخدمي أي صورة أو رسمة و تعملي الكرت بنفسك .. مدخل البيت .. من جوه زي ماقالوا البنات شموع و كده .. طيب من بره !! ممكن تحطي على الباب .. ورقة بنفسك أطبعيها مثلا أكتبي عليها I Love Birthday Man مع صورة مضحكة مثلا .. و لا Happy Birthday مع قلوب و على زاوية الورقة تكوني حاطة بالونات مجمعتهم بشريطة طويلة نازلة .. مرة حلوة تطلع .. حيتفاجأ جداً .. وكمان حيلاقي تعليقات حلوة من الجيران و حيهنوا بعيد ميلاده لمن يشوفوه .. ( في حال زوجك ما يتضايق إنتي أعرف بزوجك ) .. و أكيد البيت يكون نضيف و معطر و إنتي لابسة لبس حلو .. و خلاص فاجئيه أول مايدخل شغلي لو هابي بيرثداي وأرقصي لو و خليه يطفي الشموع .. .. و لو حيتعبك ده كلو ممكن تحجزي في مطعم هاديء و تتفقي معاهم إنك بدك تعملي مفاجأة لزوجك بعيد ميلاده و يسير لمن تروحو و تجلسو يجيبو الكيك وعليها الشمع و يغنولو هابي بيرثداي و إنتي طبعا تكوني جايبة لو هدية .. ( دي ترجع لشطارتك كيف حتخلي زوجك يروح معاكي للمطعم بدون مايحس إنو في حفلة أو مفاجأة له ) .. و لاتنسي فكل الأحوال تصوري وقت مايطفي الشموع بالفيديو حتبقى ذكرى جداً جميلة و ربنا يسعدكم و يألف مابين قلوبكم إن شاء الله أكون أعطيتك ولو فكرة مفيدة ممكن تنفذيها ..