[الطير الحزين]

السلام عليكم
ربنا عالم انا بكتب وعينى ورمت من كتر الدموع وقلبى مكسور وحزين انتو عارفين انى متجوزه من سبع سنين وحصل حمل من 6شهور بس كان كيس بدون جنين

الدكتوره كانت كتبالى كلوميد حبه وحده لخمس ايام رحت لها وقالتلى ماشاء الله التبويض كويس وشافت تحليل جوزى الدكتور بتاعه كان قاله كويس لكن الدكتوره لما شافته قالت العدد كويس لكن نسبه التشوهات 95% وضعف الحركه 93% يعنى الحيوان المنوى بيموت قبل مايوصل للبويضه
انا حزنت اوى بس ماحبيتش ابين لجوزى ده بالعكس رفعت معنوياته ومالوش علاج لانه كان عمل عمليه الدوالى من 3سنين ياخد فيتامينات بس

انا قلقانه عشان انا ماشيه فى 30سنه وصبرت كتير ومافيش حاجه اقدر اعملها ولا اقدر اعمل تلقيح صناعى فوضت امرى اليك يارب واهلى بيقولو لى انتى بتضحكى على نفسك وكده مش هتخلفى اطلقى منه وانا بقول ربنا قادر على كل شىء ومش هيخيب ظنى

انا بحكيلكو لان انتو اخواتى واكيد هتحسوا بيا وفى منكم اللى جربت الانتظار للحمل

انا مش هيأس بالعكس هدعى ربنا اكتر واستغفر اكتر واذاى اياس وربنا قال ادعونى استجب لكم( ربى لاتذرنى فردا وانت خير الوارثين ) ربى هون عليا غربتى والهمنى الصبر وارزقنى يارب بالذريه الصالحه عاجلا غير اجلا انا وكل منتظره
اللهم لاتحرمنى وانا ادعوك ولا تخيبنى وانا ارجوك