1_حملج كان بادويه او طبيعي؟ شنو نوع الادويه ابر او حبوب؟
حملي كان بإبر تنشيط .. حملت بالتلقيح الصناعي لأنه صارلي 4 سنوات ونص ما حملت
2- عند اي دكتوره اذا بادويه ؟ وجم شهر مدة العلاج؟
دكتورة بدبي ، من أول شهر ماشاء الله صار التلقيح الصناعي
رحت عندها وعطتني حبوب تنزيل الدورة لأن كانت الدورة متأخرة وبعدهاسوتلي فحوصات مثل فحص أنابيب قناة فالوب للتأكد من عدم انسدادها والحمدلله طلعت سليمة وبعدها بدأت معي بإبر التنشيط واحتجت لثلاث ابر ، وبعدها ابرة التفجير وثم التلقيح اللي كان عبارة عن اخذ عينة من السائل المنوي للزوج ووتنقيتها وتلقيحها لداخل الرحم ..
وبعدها بأسبوعين طلبت اعمل تحليل دم ، وسويت تحليل دم وبول وطلع حمل ولله الحمد
3- حملج بالتوام شنو كان ترتيب بين عيالج او البجر ؟؟
البكر
4- واذا طبيعي هل وراثه او صدفه؟؟
علاج
5- متى اكتشفتى بالسونار انهم توأم باي شهر ؟؟
من اول زيارة شافتهم بس ما خبرتني وقالت احتمال توأم وطلبت أراجعها في الشهر الثاني ، وفي الشهر الثاني تقريبا في الاسبوع السابع خبرتني انهم توأم وسمعتني النبض الحمدلله
6-اشلون النساة معاج ؟ والحمال ؟
ماذا تقصدين بالنساة ،
الحمل كان متعب في البداية كنت اشعر بغثيان شديد وطلبت من دكتورتي تكتبلي دواء يخفف الغثيان بس ما كان عندي ترجيع
ووقفت الدوا وشربت زنجبيل لاني قرأت انه يخفف الغثيان ، وبنفس الوقت قرأت انه يسبب اجهاض فسألت دكتورتي اذا عادي اشربه واوقف الدوا ، فقالت عادي ما يضر ، واستمريت عليه ، الغثيان استمر معي تقريبا شهرين ونص ، وكنت اتضايق من كثير روائح وزوجي اتضايق من ريحته بس بنفس الوقت ابغاه يكون عندي .. وكمان كنت احس ببعض الآلام اسفل البطن بس طمنتني الدكتورة انها طبيعية
7-ولادتهم طبيعي او قيصري؟
لسة ما ولدت ، انا في نهاية الشهر الخامس ، والله يقدرلي اولد بالطريقة اللي فيها الخير لي ولهم إن شاء الله
8-شنو نوعهم ؟مشيمه وحده ولالا؟
لسة ما شفت الجنس لأنهم يقولون انهم ما بانو ، وهم بمشيمتين وهي اللي قالولي افضل
9- شنو نصيحتج للي ناويه عالحمل بتوام ؟؟
اللي ناوية تحمل توأم ،، بداية تهتم بغذائها كثير بحيث يكون صحي وتنتبه لهالنوع من الحمل كثير
لأنه متعب نوعا ما بالنسبة لي تعب نفسي وجسدي ، واذا بتحمل بالتوأم تستعيذ من الوساوس اللي تجيلها
لأن تكثر عندنا الوساوس ، اذا هم بخير اذا واحد صارله شي اذا بولد ولادة طبيعية او قيصرية اذا بكمل للشهر التاسع او بولد ولادة مبكرة والكثير الكثير ، فعليها بالصبر وبتوكيل امورها لله ,, الله يصبرني ويصبر باقي الحوامل يارب ويتمم حملنا على خير إن شاء الله
والله يرزق كل وحده تتمنى حمل بالتوام ويزرق كل محرومه
آمين الله يسمع منك ويرزقك الخير فيما تتمنين ، أي استفسار أنا موجودة وإن شاء الله أقدر افيدك باللي اعرفه