السلام عليكم ورحمة الله وبركاته،،
توك صغيره وابتديتي تحبين،، من علمك ليل السهر يا صغيره؟
بدري عليك العشق يا بنت هاللحين،، حرام هذا القلب وشهو مصيره؟
انتي بريئه في الهوا ليه تشقين؟،، دروبه طوالٍ عليك وعسيره
رحتي بدربٍ ماله أصلاً عناوين،، وانتي مشاويرك من أول قصيره
ياطفلةٍ حبّت وراحت على وين؟،، عقب الهنا ذقتي الحياه المريره
وينك ووين الحب والشوق والبين؟،، عنّيتي عيونك وصرتي سهيره
أمحق تسلّي كان ودك تسلّين،، الورد لولا اللون وشهو عبيره؟؟؟
خلّيتي دروسك وصرتي تحاتين،، الدرس في ديره وصرتي بديره
وصرتي بعد من غير هذا تغارين،، والمشكله يابنت منتي خبيره
نصيحتي لك كان ودك تردين،، يم السعاده والحياه المثيره
خلّك بجو العايله لا تعدّين،، ماما وبابا والعجوز الضريره
شيبانك اللي ما يبونك تعانين،، من بينهم عشتي كأنك أميره
الحب قبلك هز ناسٍ كثيرين،، خلا القلوب تعيش همٍ وحيره
والحب يفضح لا انكشف داخل العين،، وانتي بنفسك ما هقيتك بصيره
طيعي كلامي واحذري لا تمادين،، تراجعي لعل في الأمر خيره
عيشي الطفوله والبراءه لك سنين،، وبعدين حبّي لا غديتي كبيره
للشاعر: حمــــــد المســـــرع
ولا هنتو