[- سكر -]

اختي كلامك منطقي وصحيح وانا معك فيه لكن انا اختلف معك في الشمم والهواء من تحت الهواء ياقلبي يقولون عنه خراب انتي ماجربتيه شكلك عشان كذا تقولين اللي قلتيه الهواء يوسع المهبل وقت الجماع يطلع صوت يفشل ممكن ينفهم شي ثاني وحتى بدون جماع يطلع الصوت وهذا له اسباب وهو اهمال وقت النفاس في البارد والمشي حافيه او غسل الرجلين بماء بارد لاتقولين مافيه شي اسمه هواء الا فيه والا ليش امك قالت لاتشربين بارد ولاتمشين حافيه ماسألتيها ليش لو مافيه فايده اجل ليش تقولك التعليمات هذي
والشي الثاني الشمم يقولون عنه المستشفى التهاب ويصرفون له مضاد حيوي لكن مايطيب العلاج منه ابدا الا ببعض الاعشاب المعروفه مثل المره منقعوع او الصبره ولاتقولين ما اعرفها بعد معروفه جدا بالذات عند اهل نجد والمعروف عليه ان الوحده اول ماتولد تتعطر بكل انواع العطور فرنسي او شرقي تدرين ليش عشان لو شمته بعدين مايجيها شمم واللي يحصل ويجيها المره تشرب منها مثل قنجال القهوه وممكن تحط شوي من منقوع المره في مويه دافيه وتتغسل فيه لاتقولين مافيه شي اسمه شمم وترى انا اعرفه قبل يطلع النت لاتقولين قريتي عنه وهذا موجود ومعروف

وعندي تعقيب على كثير من البنات يقولون الاجانب والاجانب ياحبيبتي خواتنا العرب وانا اعرف كثيررر منهم عندهم عادات للنفاس واعشاب لكن كل ديره ولها عادتها يعني اللي نستخدمه مايعرفونه والعكس صحيح اللي يسوونه حنا مانعرفه وهذا شي طبيعي كل ديره ولها اكلها واعشابها اما سالفة انهم مايعرفون ولايسوون الا يسوون انا لي علاقات من مصر وسوريا والعراق وفيه منهم اقارب يستخدمون اما بالنسبه للغرب هذولا مايعرفون التمر عشان يعرفون الشي الثاني ربي مكرمنا عنهم بالاسلام ومعرفة بعض الاعشاب والا كان ماقال لنا الرسول ترى النفاس اربعين يوم ليه ماقال اولدي وقومي نطي من بكره في حضن زوجك كل شي وله حكمه ولو يعرفون بعض اعشابنا استفادوا منها وياكثر امراضهم مايعرفون لها علاج ويعتمدون على الخياطه التجميليه تصك الوحده صك وحابه اقولكم معلومه كثرة خياطة التجميل اكثر من ثلاث الى اربع مرات تضر الانسجه وماتتحملينها لان اللحم يقص ويخيط والغربيين تجيب ولدين والا ثلاثه وتصكه وتكمل حياتها لكن حنا لا حنا امه نفتخر بكثرتنا ونظامنا لايوقف نجيب عيال واجد وبعدين ياليت تردون على اللي طايحين فينا يالخليجيين بالكلام هذا عشان ينكتمون حتى رجالنا يقارنون فينا بحريم الاجانب لانهم مايدرون عن اللي كتبته هذا كله

اعتذر على الاطاله وكلامي عام للجميع وليس خاص بعضوه معينه عشان لا انفهم غلط لكن انفتح المجال وحبيت اقول رايي ومشكورين *