[...றεறoOo...]

السلام عليكم ورحمة الله وبركاته
الحمدلله على النعمه زي هذا اليوم25/5 /1432 ولدت وجبت نور عيوني عبدالله وانا وعدت نفسي اني مااكتب قصة ولادتي الا اذا كمل عبودي السنه عشان اعيد الذكريات الحلوه واليووم الحمدلله ربي حققلي الامنيه وراح اكتبها لكم

طبعا انا اخر دوره لي كانت تاريخ 2/8 وحددولي موعد ولاده تاريخ 14/5
ومع الاسف ماولدت كنت مع صديقاتي امهات الغد بتجمع الي بيولدون في جمادي الاولى 1432
وماشاءالله كانت ايام حلوه ماننساها وكل يوم وحده من كروشات التجمع ربي يفرج عليها وتولد والحمدلله

بس مع الاسف انا جا موعد ولادتي المحدد وماولدت طبعا انا بكريه والبكريات في الغالب يطولون مايولدون بسرعه
مرت 10 ايام وانا اراجع بالمستشفى وماكان فيني اثار ولاده ابد كنت اراجع بمستشفى الملك عبدالعزيز الجامعي بالرياض
وعشاني طولت رحت مراجعتي وعلى طول قررت الدكتوره تكتبلي تنويم بالمستشفى

رجعت البيت جهزت اغراضي ورحت المستشفى الي بولد فيها
مكان الولاده في مستشفى الملك خالد الجامعي
تنومت يوم الثلاثاء وجت عندي الدكتوره الخاصه فيني وكلمتني وقالت بما انك طولتي ماولدتي راح نظطر نعطيك طلق صناعي وراح نبدا من بكره ان شاءالله انا من هنا بدا الخوف عندي لاني قريت ان الطلق الصناعي حارر وانا بكريه مااعرف شي ابد
يوم الاربعاء عطتني الدكتوره الطلق وكان عباره عن تحميله وبغيت اموووت وهي تحطها لي ويوم حطتها قاست عنق الرحم طلع مفتوح 1سم بس وبعد التحميله على طووووول نزل مني دم وقالت لي هذا الدم طبيعي لاتخافين
جلست يوم كامل دم بدون طلق اوشي
وكنت امشي بالاسياب وامي تنصحني اني مااجلس ابد
بصراحه حسيت بالملل وانا انتظر كنت احسب اول مايعطوني الطلق بيبدا مفعوله على طول
جا اليووم الثاني ودخلت عندي الدكتوره وقالت لي ماتحسين بالم او شي قلت لا قالت اجل خلاص بنبدا بالمرحله الثانيه من الطلق الصناعي
طلع فيه مراحل
ودوني قسم الولاده انا ووحده وسوولي تخطيط وعطوني الطلق الي هي التحميله مره ثانيه بس اتوقع انها اقوى
قالت لي الدكتوره في بعض الحريم نعطيهم 6 مرات الى ماتجيهم الولاده انا هنا جتني حاله وقلت مافيه الا اني اقولهم اني بطلع على مسؤوليتي رحت للدكتوره واول ماشافتني قالت لي ماولدتي قلت لا وقلت لها ابغى اطلع قالت لا ممنوع وخصوصا انه الضغط عندك مرتفع
لانه الضغط ارتفع عندي صحيح في الايام الاخيره من حملي وتنومت بالمستشفى من قبل
رجعت غرفتي كلمت امي وابكي قلت بجلس في المستشفى الى متى وماراح اولد ابغى اطلع قلت لها تعالي عندي لان نفسيتي صارت زفت
والحمدلله جت امي زارتني واخواتي وخالتي وعمتي وارتحت الحمدلله طبعا ماقصروا عطوني نصايح وجابولي عسل وتمر وقالولي امشي بالاسياب لاتوقفين اتعبي عشان تولدين خلصت الزياره وقاموا بيطلعون طلعت معاهم ورحنا لقسم مابعد الولاده لعند حضانة الاطفال اول ماشفت الاطفال دمعت عيني ودعيت ربي انه يفرج علي قريب
طلعوا اهلي من هنا وانا رحت امشي على طول مشيت ساعه كامله والممرضات يشوفوني ويقولون لي خلاص مدام يالله نوم رجعت غرفتي واكلت العسل والتمر ونمت وكانت الساعه 11 بالليل
صحيت عالساعه 2 وانا حاسه بشي يزر من تحت يجي ويروح ومع الوقت احس انه يزيد وكان مابين كل الم والثاني وقت منتظم اذن الفجر وجت الممرضه وقالت لي تعالي بنقيس الوزن رحت معها وقست وزني وماقلت لها لاني كنت احسبه شي عادي وبيروح
قلت بدق على امي وبقولها وفي ذاك اليوم اهلي كانوا في الاستراحه كان يوم الخميس وماكان عندي جوال وتلفون المستشفى مايدق الا على الثابت
وكل مامر الوقت احس ان الالم يزيد فيني عرفت انه هاذي ولاده الى ماجت الساعه 6 قلت بروح اعلم الممرضه دقيت جرس وقلت لها اني تعبانه وفيني ولاده قالت بروح اعلم قسم الولاده وبجيب لك كرسي عشان تروحين قلت اوك وحاولت ادق على بيت اهلي بس مع الاسف مشغول حسيت اني ببكي ابي اقول لامي عشان تدعيلي تتسهل ولادتي ومر الوقت والممرضه طولت والطلق يزيد
رحت لها قلت لها وين انا تعبانه قالت شويه استني الين الساعه 8 عشان مافيه دكتور كل الدكاتره يسوون عمليه
صرخت عليها قلت كيف انا تعبانه فيني ولاده
شكلها مومصدقتني قالت الحين بجي اسويلك تخطيط
وسوتلي تخطيط وطلع فيي طلق قالت انتي من متى فيك ولاده قلت من الساعه 2 قالت يوم قست وزنك ليش ماعلمتيني قلت مدري احسبه وجع خفيف ويروح
المهم على طول راحت تجيب لي كرسي وجت ممرضه وجابت لي لبس وعطتني ابرة الشرج وقالت لي روحي فضي بطنك وانا من الالم عيوني تدمع وودي اعلم امي رحت عند وحده جنبي وقلت لها تعطيني جوالها الله يعطيها العافيه ودقيت على امي خليتها تدق علي قلت لها فيني ولاده والحين بيودوني قسم الولاده دعواتك دعت لي وقالت لي الحين روحي امشي عشان تتسهل ولادتك قبل ماتروحين قسم الولاده قفلت الخط ورحت امشي وادعي وابكي من الالم وجابولي فطور بس اكلت شوي لاني مالي نفس وشوي وتجي الممرضه وجابت لي الكرسي ودتني قسم الولاده كانت الساعه 7 الصباح
على طول حطولي مغذي وسوولي تخطيط وحطولي اكسجين
وانا تعبانه الطلق كل شوي يزيد كشفت علي وقاست الرحم طلع مفتوح 3 سم
الممرضه جالسه عندي وكل شوي تشوف التخطيط وتكلم الممرضات وشوي الا وتقولي انتي مااكلتي شي قلت لا ليش قالت الطفل مايتحرك ببطنك
احتمال ولاده قيصريه انا هنا مت خووف وجلست ابكي
تعبانه من الالم وخايفه يصير للنونو شي
على طول الممرضه راحت جابتلي لبس ثاني قالت هذا عشان اذا ولاده قيصريه تكونين جاهزه
طبعا ماكان فيه دكاتره لانهم يسوون عمليه بس جتني وحده وكشفت علي وجلست تكلم الممرضه
وانا تعبانه ومن قوة الالم قلت لهم خلاص سوولي عمليه تعبااانه وابكي من الالم كل شوي واقولهم ابغى بنج تقولي مافيه بنج اذا عطيناك بنج بينام الطفل وكل شوي من التعب اجلس بالسرير والممرضه تهاوشني وتسدحني تقول لا عشان نشوف التخطيط وكل مازاد الطلق اجلس مااقدرت اتحمل من شدته وابكي
وكل شوي تقولي الممرضه ليش مااكلتي البيبي خايف وموراضي يتحرك شوي جت الدكتوره وحطتلي زي الانبوب من تحت وحسيت كانه دخلت علي مويه من جوه عشان يتحرك البيبي
وانا تعبانه واتعصر من الالم ومسكت حواجز السرير وابكي ولااراديا حسيت اني ادفع ومع الدفع حسيت بمويه تنزل من تحت
شافتني الممرضه وشافت المويه وقالت لي انتي فيه ولاده كشفت علي قالت لي يوووه انا اشوف الراس ماشاءالله مفتوح 8 سم خلاص ولاده يالله مو هنا
لانها بتوديني غرفة ثانيه وهي الغرفه الي بولد فيها وانا مقدر خلاص احس ان بولد تقولي لا امسكي نفسك مو هنا
جابتلي كرسي ودتني غرفه فرديه نومتني بالسرير
وعطتني ابره بفخذي وعطتني اكسجين اول ماحطيته حسيت بدوخه ورحت عالم ثاني وحسيت اني هديت بعد ماعطتني الابره
قالت لي يالله الحين ادفعي دفعت باقوى ماعندي مره ومرتين و3 وكل ماادفع ااحس بتعب واتفس بقوه
قالت لي الممرضه ارتاحي شوي وخذي نفس وبعده دفعت ودفعت وشوي حسيت ان كل الالم الي فيني راح ناظرت الممرضه لقيتها ماسكه عبودي
ولدت وماحسيت بنفسي الحمدلله ياارب
ورتني اياه وقالت لي وش هذا قلت ولد وكنت فرحانه مومصدقه اخيراااا ولدت وكل شوي احمد ربي كانت الساعه 9وربع
مسحت له الممرضه قدامي وقلت لها ابي اشوفه عطتني اياه شوي وسلمت عليه وهو يبكي ومع الصياح قال كلمه سبحان الله ماراح انساها اول كلمه نطقها لي قال امااااااااه حسيت الدنيا مو شايلتني من الفررررح كان وزنه كيلوين و300 قرام كان صغنون مرره
جتني دكتوره وخيطتني
وكل شوي اناظر في ولدي ومومصدقه اني ولدت الحمدلله يارب شوي وشالته الممرضه قالت بنوديه الحضانه وانا كنت تعبانه هلكانه
وودوني الغرفه الساعه 11 كان يوم الجمعه تاريخ 25/5/1432ه
هذا اليووم ماراح انساه في حياتي هو يوم فرحتي وهو اجمل حدث في حياتي
الحمدلله ان ربي رزقني هالنعمه كلمه شكرا ما تكفي رب العالمين والحمدلله عالعافيه والنعمه الي نحن فيها
وبهاليوم عبدالله كمل سنه
حبيت اقوله كل عام وانت بخير ياروح ماما وان شاءالله تكبر وتصير رجال
اتمنى اني ماطولت عليكم وان شاءالله اكون خفيفه في كتابة قصتي
ادعوا ربي انه يفرج على كل حامل بهالوقت ويولدون بالسلامه ويرزق كل محرومه ومايحرمها ربي من نعمة الضنا
اتمنى انكم ماتنسوني من دعواتكم
لان عبودي هو كل شي بحياتي الحين دعواتكم اني ماانحرم منه ياارب