حبيبتي دادو ما يهمك في الاغلاط. المهم اني افهمك وتفهميني 
يعني الدورة عندك ماهي منتظمة وممكن تجلس شهور من غير ما تجي والبرولاكتين (هرمون الحليب) عندك مرتفع وفعلا هذا سبب كافي لتأخر الدورة من غير حمل لكن كم كانت نسبة البرولاكتين بالتحاليل؟
الدكتورة وصفتلك كلوميد 3 شهور بدون انقطاع ؟؟؟؟ ولا 5 ايام بس في كل شهر؟
هو فعلا الدوفاستون بيجيب الدورة لكن ممنوع انك تاخذيه لحالك من غير استشارة الدكتورة.
هو المفروض انه يوم التبويض بيتحسب على الطريقة التالية: مثلا لو كانت دورتك 30 يوم (من أول يوم نزيف لحد اليوم الي قبل الدورة الجاية) تحسبي 30 - 14 (دائما 14) = 16 يعني يوم التبويض عندك 16 والجماع يكون يوم 15, 16 و17
والمفروض لو أخذت الكلوميد تحسي بالالم في المبايض الاثنين (حتى فالمبيض الي موش شغّال في الشهر، لانه كل شهر في مبيض بيشتغل, مرة يمين ومرة شمال) يومين الى 4 ايام قبل التبويض يعني في المثال الي اخذناه تحسي بالوجع من اليوم 12 تقريبا. لكن اذا البرولاكتين لسه طالع ما يكون عندك تبويض أساسا والكلوميد ما يعمل ولا نتيجة معاك فالمفروض انه الدكتورة حسبي الله عليها تتابعك بعد الكلوميد وتعملّك سونار وما تخليك كده لانه وضعك لازمه متابعة.
هي بتعطيك الكلوميد من اليوم ال2 لانه تعرف انه ما عندك تبويض او لانه ضعيف جدا.
طيب حبيبتي ما يجيك ايام الافرازات عندك بتكون كثيرة وممططة وشفافة ومثل ابيض البيض ؟؟؟ لانه هذه افرازات التبويض بدون شكّ
لازم وأكيد تعملي سونار (الترا ساوند) بعد الكلوميد عشان تعرفي انه جاب نتيجة ولا لا.
غيري الدكتورة حبيبتي وروحي لمستشفى خاص والله المستعان.
انت حبيبتي ساكنة في تبوك ولا وين؟ أنا في جدّة ولو محتاجة مساعدة في جدّة قوليلي من غير أي حرج. وبالله عليك اسألي الي تبغين وأنا أجاوبك ان شاء الله. والله المستعان
وللاجابة على سؤالك، المفروض انه الكلوميد يسبب الم في المبايض لكن مو شرط، ممكن يكون في تبويض لكن من غير ألم لانه الجسم البشري بيختلف من واحد لواحد.
الله يرزقك ولا يحرمك من الذرية الصالحة يااااا ربّ