[احلى ليان]

انا بدأت اعلم بنتي لمن كان عمرها سنة ونص على الحمام احطلها الكرسي فوق الحمام مباشرة عشان تتعود وانقطعت فترة ما سرت ادخلها لسفراتنا الكثيرة وما نجلس بمكان واحد واو قات في فندق ومافي كرسي فوق الحمام وما تعرف تجلس بس بما اني حامل وقربت خلاص على الولادة قررت اعلمها وما حرجع عن دا الموضوع ان شاء الله الا وهيه متعودة ومتعلمة مع انو تعب والله تعب تشيلي طفل او اي شي وانتي خلاص على نهايات حملك بس ايش اسوي ربنا المعين ويكتبلنا الاجر جميعا..
اول شي ابدأو بالاسابيع الاسبوع الاول تشيلي الحفاضة من الصباح الى العصر مثلا كل يوم بدون تكسيل ومن يوم تشتيلي الحفاضة خلوهم يجلسوا وانتو بكرامة على الحمام واستني شويتين لانو ممكن تكون عملة صغيرة وعملة كبيرة..
والاسبوع التاني ابدأي طولي الفترة من الصباح الى المغرب او العشا ووقت النوم لبسوهم حفاضة او وقت الخرجة لمن يكون طويل او عند ناس تخافي تتفشلي معاهم حطيلهم حفاضة بس اسالي برضو ودخليهم حمام ..

المحفز اللي خلاها تدخل سويت لها لوحة وجبت لها قلم وسويتلها جدول فيه وحطيته في الحمام كل ما تدخل تسوي اوشو او عملة كبيرة اخليها تكتب صح واصفق لها واوقات اعطيها حلاوة هيه تحبها..
واوقات اغير المكافأة لخرجة للملاهي عشانها شاطرة وتسوي في الحمام بدأت تستوعب الحمد لله صح اوقات تنسى بس ما اخاصمها ولا انهرها عشان ما تعند ولا تكره دخول الحمام..

بس الحمد لله بدأت اطول الوقت اللي بدون حفاضة وفي الليل لمن البسها تقوم الصباح مافيها شي نظيفة الحفاضة زي ما لبستها وربي يتمم على خير وعقبال الباقين..

سامحوني طولت بس اتمنى تستفيدوا..