[ام عبودي 615]

المشاركة الأصلية كتبت بواسطة deedee

السلام عليكم يا كروشات المدينة

الله يتمملنا على خير يارب


فرحت مره لما شفت التجمع وقاعده بأقرا في الصفحات اللي فاتت ادور شي يطمن قلبي

انا حامل في الشهر السابع وبكريه و اول حملي راجعت عند دكتورة سلمى في الزهراء

مره حبيتها هاديه وتطمن بس ما كنت ابغى اولد فيها لانه مافيها مختصين كتير

ورحت للمطبقاني وياريتني ما رحت <<<<< بدأت تفضفض

اول مراجعه كانت كويسه ومافيها شي عند دكتورة عزه ولما جيت للمراجعه التانيه بدأت اللخبطة وبدأت البلااهه ومن بعدها وانا عايشه فرعب
كشفت عليا ولقيت وزني زايد وسارت تقولي المفروض تخففي من اكل الدهون والسكريات والحلويات
وانا اصلا ما احب الحلا كتير !!!!!
عملتلي سونار وطلعت المويه زايده وعملتلي تحليل سكر وطلع الحمدلله مافي شي
وكل ما اروحلها تكون ناسيتني وتماطلني بتحليل جديد واقولها سويته تقولي انا معرفش ازاي مجاش في بالي
غيرتها ورحت لنيره
شكلها طيبه وحبوبه واتطمنتلها وعرضتني على الاستشاري حسين عشان يشوف مشكلة المويه الزايده
ومن بعدها وانا بس ابكي اول مره اشوف دكتور ما يطمن ابدا ابدا وكلامو زي الرصاص وفي الوجه
يقولي انتي ولادتك حتكون مبكرة وقدامي خيارين اما يسحب السوائل بإبره وفيها تكون الولاده المبكره او علاج دوائي يسبب انسداد الاورده الدمويه عن الجنين وبعدين لاسمح الله وفاة وانه لو ولدت مبكر الطفل الخديج دا اسوأطفل ممكن تواجهيه لان معرض للالتهابات والتشوهات
تخيلوا الكلام دا كلو في جلسه وحده ومدري ليه من ساعتها وانا حاسه انو الموضوع كله هدفو مادي حسبي الله ونعم الوكيل

حاليا راح اتوكل على الله واراجع عند الولاده بس ماني عارفه عند مين ولا كيف مراجعاتهم
والمراجعاات مره متعبه ليا
ادعولي يا بنات الله يسهل اموري وولادتي ويحفظلي جنيني من كل شر

الله يقومك بالسلامه ويرزقك بالطفل السليم ويتمم حملك على خير واظن الحوامل ماقصرو ساعدوك .. وطمنينا عليك ..