بنات لا تنسوا الكاميرا تاخذوها اذا كانت متوفرة
الا إذا كان تصوير جوالك حلو وواضح لان هذي اللحظات هي احلى وقت انها تتصور
وانا في كل اطفالي اسوي حاجة ما ادري اذا الكل يسويها ولا لأ
انا من النوع الي احب الذكريات واحب احتفظ بأول شي يحصلي في اي مناسبة يعني مثلا لمن تزوجت احتفظت ببطاقة صعود الطائرة وكرت غرفة الفندق والفاتورة وكل رحلة رحناها احتفظت ببطاقاتها واول عصير قدملنا هو الفندق هدية الزواج كانوا حاطين عليه مروحة ورق صغيرة احتفظت فيها واشياء كثير وحطيتها في شنطة وكتبت عليها شنطة الذكريات
ونفس الشي سويته مع اطفالي اول لبس لبسه اسوارة المستشفى اول دفتر كتب فيه اول لعبة مسكها اول كراسة رسم عليها وأشياء كثير ما تتخيلوها وطبعا تصوير فديو لكل الاحداث الي يمر فيها وصور وبرضه حطيتها في شنطة وبين فترة والثانية اجمع بناتي ونفتح الشنطة والله شعور مرة حلو وهم ما تتخيلوا اول مرة افاجئهم بهذي الشنطة قديش استانسوا وضحكوا على بعض في اشياءهم
حبيت اقلكم يمكن تعجبكم الفكرة وتسووها