السلام عليكم ورحمة الله وبركاته
ربنا يكرمكم يا أحلي أمهات .. تسلمولي يا رب ويسلملي ردودكوا الحلوة
وربنا يبارك في أولادكم و يفرحكم بيهم يا رب
انا الحمد لله رحت لدكتور وسألته كل الي عايزة اعرفه
هو برده نصحني اني مش أأكل ياسمين الا في آخر الشهر السادس عشان تستفيد من اللبن قدر المستطاع انا اقتنعت بكلامه وهي اصلا كلها عشر أيام وتدخل السادس واهي الايام بتجري بسرعه ربنا يبارك فيها يا رب وفي كل أطفالنا
المهم انا خليته برده يكتبلي ابدأ بإيه وكده
هو نصحني اني اشربها عصائر مخففه وحددهم كالتالي :
عصير برتقال _ عصير ليمون _ عصير جوافه
وكل ده مخفف بمياة معدنية بنسبة نص لنص يعني نص عصير ونص ميه
وابدأ بمعلقه واحده من العصير المخفف بدون سكر طبعا
وقالي مش اشربها ابدا الا مياة معدنيه فقط يعني لا مغليه ولا من الفلتر
وده ممكن ابدأ بيه في المرحله الحاليه طبعا لان فيتامين سي معروف انه بيساعد علي امتصاص الكالسيوم أسرع
وطبعا قالي استمر في اعطائها الكالسيوم وكتبلي فيتامين د
وقالي الحديد علي الشهر السابع ان شاء الله
وده الي كتبهولي عشان ياسمين ان شاء الله
الشهر السادس : زبادي _ سيريلاك قمح _ شوربة خضار
( بطاطس , جزر , كوسه ....)
الشهر السابع : كبدة فراخ _ صدر فراخ _ جبنة مثلثات
بس كده ولما توصل للثامن هيكم معايا واحده واحده
حبيت اقولكم بأمانه الي قاله ليا الدكتور وبجد انا فرحانه جدا لتفاعلكم معايا
ربنا يجازيكم كل خير يا رب ويباركلي فيكم
شكرا جزيلا وكل سنه وانتوا بألف خير بمناسبة عيد الأضحي المبارك
وعليكم السلام ورحمة الله وبركاته