السلام عليكم حبيباتي ... انشاء الله الكل تمام
حبيت افتح موضوع لكل البنوتات الي اعانون من التكيس و ضعف التبويض
عشان انشجع بعض على تخطي هالموضوع و انصير كلنا حوامل يا رب العالمين
موضوع مثل مكان انفضفض فيه عن شعورنا و مراحل العلاج عشان الكل يستفيد
***********************************
بالنسبة لقصتي مع التكيس و ضعف التبويض
زرت الدكتوره مره عشان اشوف اسباب تاخر الدوره الشهريه و احيانا اوصل الموضوع الى اكثر من 50 يوم
طبعا قالت لي الدكتوره اذا ارغب في الحمل او تنظيم الدوره فقط
خبرتها انه صار لي سنه من الزواج و كنت بسافر فقلت الى الدكتوره اني في البدايه فقط بنظم الدوره و بعد ما ارجع من السفر ببدأ اشوف اسباب تأخر الحمل خصوصا انه زوجي يبغي عيال.
رجعت من السفر و ثالث يوم من الدوره قالت لي الدكتوره لازم اسوي فحص هرمونات .. و طبعا قالت تحتاج نتيجه فحص الحيوانات المنويه لزوجي عشان تتاكد الخلل من اي طرف
على العموم سويت الفحص و كانت النتيجه عندي تكيس و مسبب لي ضعف في التبويض بس قالت لي ما عليك خوف و انشاء الله في امل في الحمل.
و خبرتنا بعد قراءة نتيجه زوجي انه لازم ازور المستشفى و روح اشوف دكتور
و قالت ما في شي بس يمكن يعطونه شي بسيط .
و طبعا زرنا استشاري امراض الذكوره و بعد قراءه النتيجه خبرنا انه الحيوانات المنويه عددها جيد جدا و كلشي ممتاز و ظل مشكله واحده هي قلة حركه الحيوانات و السبب وجود دوالي و لازم اسوي عمليه جراحيه لربط الاوعيه و هي بسيطه و نتائجها جيده جدا و لكن لا تظهر الا بعد 3 الى 6 شهور و احيانا بعد سنه كامله و لكن الدكتور اكد لنا بانه حاله زوجي جيده و يمكن تظهر النتائج بسرعه انشاء الله.
بعدها بسبوع ذهبت للدكتور لموعد السنونارو كنت في حزتها اشرب كلوميد و اخبرتني انه حجم بويضتي 6 و ضعيف جدا و اعطتني موعد بعدها بسبوع آخر و كانت انه النتيجه حجم بويضتي 13 فقط اي ما زال ضعيف و لا يصلح لحدوث حمل .
خبرتني الدكتوره اني احتاج ابره تفجيريه لزياده فرص الحمل و لكن خبرتها زوجي يحتاج عمليه الدوالي . فقررت اتاجل موضوع التنشيط و الابر الى ان يتعافى زوجي و اتصير الحيوانات قويه اي بعد 3 شهور.
قالت ليي فقط امشي على الادويه حاليا ... طبعا قلت ليها في مجال انه ما استخدم الابر بالمره و قالت ليي اكيييييييييييد اذا اتعالجت عن التكيس و افضل وسيله لمقاومه التكيس و زياده تنشيط التبويض هي الرجيم القاسي و التخسيس و كذلك تناول الاطعمه المفيده للتبويض مثل الانناس و الجوز و العسل.
و نتيجه قرأتي الكثيره عن موضوع التكيس لاحظت انه اكثر من نصف الحالات كانوا يتعالجون عن طريق تنقيص الوزن و ممارسه الرياضه.
على هالاساس ببدأ فتره علاجي بالادويه و الرجيم و الرياضه لمده 3 شهور و انشاء الله اجي اليوم الي ابشركم فيه اني ما بحتاج الابر و انه التبويض صار ممتاز عندي ياااااارب .