مش عارفة ابدأ مشكلتي ازاي لانها مشكله حساسة شويه انا زوجي مذبذب جدا وبيتاثر بكلام اي حد يسمعه سواء من اهله او من اصحابه في العمل
المشكله باختصار في العلاقة مع زوجي ممكن يكون بيداعبني واسفة على الصراحة في الالفاظ بس هو ده فعلا اللي بيحصل ممكن يكون بيداعبني وبعد كدة يسبني ويقوم عشان خايف يعمل اتصال كامل طبعا انا بتأثر وبنجرح بس مش قادرة اتكلم وده لاسباب اولا انه بيقوم بالعلاقة في اوقات معينه في الاسبوع ومش عايز في اي وقت تاني
ثانيا انه بدأ يقرب من شخص مش كويس بيعمل علاقات محرمة وبيحكي له عن علاقته المحرمة وزوجي طبعا بيعمل مقارنة من غير ما يشعر
ثالثا الشخص ده على علاقة بنساء بيخونوا ازواجهم وانهم مش سعداء مع ازواجهم
وفي النهاية الاقي زوجي يقوم معي بالعلاقة كأنها واجب مفروض عليه مش من باب الحب
انا حاولت افهمه كتير ان انا بحبه لشخصه وان العلاقة بين الازواج مودة ورحمة وحب متبادل ومش علاقة شهوانية حيوانية زي ما بيسمع من الناس
مش عارفة ازاي اخليه يحبني ويبعد عن الاصدقاء السوء ويحاول يرضيني من غير ما يكون متضرر
دلوني اعمل ربنا يكرمكم ويسعدكم مع ازواجهم واسفة على الاطالة والجرأة في الكلام
ملحوظة
انا لس زوجة جديدة مكملتش 4 شهور ومش حاسة اني عروسة جديدة زي كل البنات