[زينب السعدي]

والله العيال مشكلة هسه اني بقارة وهمو بقارة وملوحكيني بعربانه حتى بوضعي هذا... بعد وين انهزم منهم يعني شتقترحون عليه اطلع للمريخ لو للقمر؟؟؟؟؟
شوفو من ردت اجهض بلندن طبعا برغبة زوجي همو رفضو كالو لالالالا روحي للعراق احسن
اني عبالي لسواد عيوني حتى اهلي يمي تالي اسمع امه تكله وديها هناك يم اهله تجهض خاف بالامارات يصير شي وانت وحدك وياها يعني رادو يخلصون من الموضوع ميريدوني اسويها بلندن حتى ليتعذبون همو ولا بالامارات حتى ابنهم ليتورط وحده طبعا هالحجي قبل لا نعرف انه ممنوع بالامارات وجانت تكلي عمتي روحي يم اهلج احسنلج واتونسي وغيري جو وارتاحي نفسيا واني العوبه حشاكم مصدكة تريد مصلحتي شو هناك من صارت الشغلة صدك وقررت اجي للعراق وبعد رجلي يريد يحجزلي كلي زنوبة شكد متردين ضلي انتي نفسيتج تعبانه بلكي ترتاحين يم اهلج واغسليلج دورة دورتين وتعاليلي حتى رحمج يكون مرتاح ونسوي طفل جديد انشالله اني هم كيفت لان صارلي سنة مشايفة اهلي وصدك مشتاقتلهم ومحتاجتهم وهسه من رايحه احس روحي بحلم والله من اذكر اني حشوفهم انسى مصيبتي .. تالي البارحة خابر اهله وكال لامه حتروح فد شهرين يم اهلها كالتله شدعوة وتعوفك وحدك طبعا هو اخوه حيجيه هسه يعني محيبقى وحده ...هناك صاحولي وحجت ويايه عمتي تكولي مو تبقين يم اهلج هواي وتعوفين رجلج وحده كلتلها هو مو وحده اخوه يمه كالت حتلو روحيلج اسبوع اسبوعين سقطي ووتعالي كلتلها شنو فوك تعبي يعني اروح بس اسقط واجي ومااشوف اهلي كلتلها لا عيني اني صارلي سنه مشايفه اهلي كالت اي بس مو شهرين كلتلها لا اقل انشالله الله كريم .. يعني متقدر وضعي شوف هي بيش حايرة واني بياحال طبعا للعلم بنتها مزوجة يوميه يم اهلها تجي من الظهر تطلع بالليل ومن تكعد تحجي تكول زوج بنتي كلش شديد وميخليها تطلع خخخخخخخخ ماادري تضحك علينه لو شو؟
المهم بعد المكالمة ويه اهله زوجي كلب عليه ويكلي هواي شهرين مع العلم هو اقترح هالشي كتله لا مو هواي شنو اني ريدارتاح اريد اشوف اهلي المهم اتناقشنه واني ضليت مصره ع رأيي بس عناد ويه اهله لان صدك مصخوها بالتدخلات وفوكاتها تكلي عمتي شنو اهلج انسيهم بعد رجلج هو اهلج من كل عقلها والله ردت اكللها ليش مابنتج تنساكم بس اتجنبت مشاكل
والله فوك قهري هالمرة يحركون اعصابي يعني واحد يخابرهم تلفون والا يغثوه
لاحول ولا قوة الا بالله العلي العظيم