السلام عليكم حبيباتي أخباركم ان شاءالله طيبات ..
اشكر كل وحده رحبت فيني ربي يسعدكم ويرزقكم ماتتمنون ..
وانا الخبله سويت رد مرتين على بالي الرد الاول ضاااااااااااع (ليش حطيته في صحراء وانا مدري هع )
للي سألت عن مشكلتي راح ابدأ لكم من الأول ..
بسم الله ..
طووووول التسع السنين الماضيه يعني قبل لاأحمل وأسقط نتعالج بس مانستمر بسبب الفلوس تخلص .. بس هالمره قررنا نتعالج حتى احمل وبالفعل ربي يسر وكملنا علاجنا حتى حملت وهاهي القصه .. جلست 9سنوات وبعدين تعالجت وحملت بس كان عندي مشاكل خفيفه ارتفاع بسيط بهرمون الحليب وضعف بالتبويض والدوره كانت ملخبطه وكان عندي الرحم مايل خفيف بجهة اليسار قالت الدكتوره مو مشكله جامعو بجهة اليسار..
المهم اعطتني الدكتوره حبوب للتنزيل الدوره واعطتني حبوب للتعديل الهرمون واعطتني كمان حبوب كلوميد بس ..
والحمدالله نزلت الدوره واخذت كلوميد وحملت الحمدالله ..
آآآآآآآآآآآه يازينها من لحظه يوم قال مبروك (حااااااااااااااامل ) افففففففف خقق
المهم الحمدالله على كل حال (سقطت هع )
المهم القصه الي فوق كانت قبل 4 سنوات ونص ..
................................
نجي لليوم ..
بسم الله ............
بعد ماسقطت بسنتين قررت انزل وزني وااروح اتعالج مره ثانيه الله يعين ..
وبعدين جلست افكر وين اروح وين اروح وين اروح عند اي دكتوره كويسه المهم كتب ربي سبحانه اني اتعالج عند دكتوره قريبه من الحي الي ساكنين فيه اهلي بس مو قريبه مره يعني ..
المهم .. توكلت على الله ودخلت وتكلمنا في بعض الأمور ..
وقالت وزني زايد لازم انزله قلت لها نزلت 30 كيلو ارحميني ياحرمه قالت على الأقل وصلي وزنك لـ90 كيلو .. بدينا من هاللحين مانتفق الله يستر من الجاي ..
المهم .. عملت لي بعض الفحوصات والتحاليل وسوتلي اشعه صبغه وجبت العيد وربي صيحت كأنها ولاده الله لايفضحنا ..
وطلعت الكوارث بعد صدور النتايج ..
طلع عندي كيس كبير باالمبيض الأيمن وضعف تبويض شديد لدرجة انها قالت وش مسويه بحالك هذا الليمون وشربه على الريق بسبب اني ابغ انحف الله يصلحني ..
وكمان طلعت نتيجة اشعة الصبغه وطلع عندي سدد بسيط باالأنبوب الأيمن ..
ومره يقولون الرحم مايل ومره يقولون خلفي .. وآخر شيء بيقولون (رحمك فوق راسك)هع
المهم واعطتني حبوب للتنظيم الدوره لانها ماجتني فتره طويله بعد ماسقطت واعطتني مدري شسموه دفاستون او مدري دفستون وربي معرف اسمه باالضبط أخر شيء بسميه سنجاب خخخخخخخخخخخ
وبعد العلاجات الي دامت ثلاث شهور وحولتني كمان على دكتور اختصاص سمنه ..
وآخر شيء تقول خلاص لاتجين استمري على العلاجات وتعاليلي بعد ثلاث شهور او مدري اربع قد نسيت ..
فاأنا جلست اناظر فيها من الصدمه ..
وطلعنا من عندها انا وزوجي وجلست ابكي بكاء في حياتي ماقد بكيته ..
وجلست اقول لزوجي بس كذا علاجها يعني فلوسنا راحت الي انتظرناها سنه وتعبي راح وحلمي انطفى مو معقوله ..
المهم زوجي شغل السياره ورجعنا لها وقالهم باالأستقبال ابغ اقابل الدكتوره سلوى ودخلوه عليها وقالي انتظري بره ..
المهم شكله اشتغلها شغل نظييييييييييييييييف احسن ..
جلسو ساعه أو مدري 45 دقيقه قد نسيت لطعوني لطعه بالأنتظار ..
وأخييييييييرا جاء زوجي وقالي روحي للدكتوره تبغاك .. قلت ياويلي عرفت اني اشتكيتها عندك احسن افتضحت ..
المهم .. دخلت للدكتوره وقالت وشفيك ياصالحه قلت مافيني شيء الحمدالله بس ابغ احمل وقالت رحتي تتبكي عند زوجك وتشتكيه مني وتدلعي ..حسبي الله عليها مو وقت دلع ابغ احمل ..
المهم وخلاها تصرف لي غصب منشط ..
الله يسامحها صرفت لي كلوميد وهي قالت لي اول زياره عندها انها ماتتعامل الا بالأبر ..
وصرفت لي كلوميد حبتين باليوم وسافرت لبيتي وانا فرحااااااااااااااااانه احسب اني بحمل مثل اول مره مادريت ان حالتي صارت اسوء من اول خخخخخخخخخخ
المهم ماصارحمل وجتني الدوره ورحت للدكتوره الي بالمنطقه الي ساكنه فيها وقلت لها بحالتي واعطتني برضو كلوميد لكن زادت الجرعه لثلاث حبات باليوم مع ابر تفجير ..
وللأسف ماصاااااااار حمل وخلصت الفلوس
وهكذا أنتهت القصه مع العلاج ..صار مثل كل مره ينتهي بمأساه .
اسأل الله الحي القيوم ان يعوضني ويرزقني بتوأم الصالح السليم وكل منتظره اللهم آآآمين
وآآآآآآآآآآآآآآآسفه اني طووولت وربي ماأقصد بس هذي قصتي مع العلاجات
وذلحين انا انزل وزني واتجهز لعرس اختي وبروح بعدها يمكن للدكتور على حسب امكانيات زوجي .. وهذي المره بروح عند دكتور ممتاز ويخاف الله في وفي فلوسي القليله .. وان شاءالله هذي المره ينتهي علاجي بالحمل ومو مثل كل مره الله يستر ..
والسلام عليكم ............