ما شاء الله وايد اللي حملوا على توائمهم.. أنا ما أحس روحي بتجرأ بس إذا هو رزق من الله اللهم لا اعتراض
بناتي الشهر الجاي يكملون سنة.. وبصراحة جايتكم بمشكلة وأبيكم تشوفون لي حل أو تطيبون بخاطري بكم كلمة عشان أشيل هموم قلبي
الله يسلمكم أنا عندي مشكلة عائلية.. زوجي متهاوش مع أبوي والصراحة أبوي الغلطان مو زوجي.. لله في لله ما يحب زوجي ويعامله معاملة زفت وعجزنا من الكلام على مدى 3 سنوات من أخذت زوجي وأبوي يعامله معاملة كلش سيئة.. وزوجي متحمل هالثلاث سنوات عشاني يروح بيتنا ويجلس معاهم وكل شي عادي بس أبوي ما يكلمه ولا يواطنه ويتعمد يسوي حركات مثل الأطفال عشان يطفش زوجي وزوجي على الرغم من انه عصبي إلا انه متحمل عشاني وساكت وما عمره كلم أبوي
كنت أنا وأمي واخواني نكلمه ونحاول مع أبوي أن زوجي واقع وواحد من العائلة وما له داعي تكرهه من غير سبب بس ماكو فايدة.. بدت السالفة بغيرة على بنته وألحين حقد مو طبيعي
المهم قبل 3 شهور تقريباً ولعت شرارة الهواش.. كان الموضوع كلش سخيف بس لأن لمدة 3 سنين هم متحاملين على بعض أبوي هاوش زوجي وطرده من بيته!!!!! قدام عيوني وقال له اطلع من بيتي انت قاعد على جبدي وما ابي اشوفك وهالحجي وصار الهواش قدام عيوني ولا في من يقدر وجودي حتى
وانا حسيت بإهانة كبيرة لأن حسيت الطردة لي مو لزوجي.. وطلعت يومها من بيت أبوي وكان ودي ما أرجع.. بس حاجتي لأمي انها تشيلني وأمي ما اقدر ابتعد عنها خاصة أني بنتها الوحيدة وما عندي خوات ما عندي إلا أمي
صرت ما احب اروح بيتنا بس مضطرة ومحتاجة وأمي مالي غنا عنها
المهم.. ألحين أبوي مرتاح ومستانس لأن زوجي ما يطب بيت أبوي.. وأني اللي ماكلتها زوجي كل يوم هوشة لأني رحت بيت أبوي
ويتحجج علي على كل شي.. ما ابي ابوج يكلمج ما ابي ابوج يلمس بناتي وكل يوم طحنة
وفي بيت ابوي أخاف حتى اجيب سيرة زوجي أو بالغلط يطلع اسمه! صاير في دوامة وانا اللي ماكلة كل هالعداوات
ألحين أول عيد ميلاد لبناتي جاي وهم بكري وبصراحة أول عيد ميلاد للأم مو للطفل. وودي أفرح بس فرحتي ناقصة
كيف أسوي حفلة وأعزم أهلي وأهل زوجي؟
يعني لين عزمت اهل زوجي بيجي عمي وعمتي وبنتهم
ولين عزمت بيتنا بيجون أمي وأخواني وأولاد أخواني وزوجاتهم ما عدا (أبوي)
وكيف أخبرهم وأقول لهم أبوي لا يجي؟ لا زوجي متحملنه ولا انا اعرف اقول لأبوي تعال!
وأبوي هو اللي غلطان ومن النوع اللي ما يتقبل
قبل شهر رمضان حاولت أمي تكلم زوجي وتقول له ارجع البيت وتعال عندنا وخل الأمور طيبة اعتذر وقال لها ما يقدر.. وبصراحة أنا أقدره! تخيلوا نفسكم مطرودين من مكان وشخص ثاني يقول لكم تعالوا وخلوا الوضع عادي؟ إذا الشخص اللي طرد ما بادر وصلح المشكلة! كيف يجي منه ومن نفسه جذي يصير بدون كرامة
تدخلت أمي أكثر من مرة وأخواني كلموا أبوي بس أبوي معند ومو شايف نفسه غلطان!
انا تعبانة وايد من هالسالفة وما ابي أفوت عيد ميلاد بناتي ودي أفرح مثل ما حلمت بهاليوم من قبل لا اتزوج اني اسوي حفل عيد ميلاد لبناتي! وخاصة أني أحب الحفلات وأحب أجهز لهالسوالف.. أحس فرحتي مكسورة وناقصة ومو عارفة شسوي وأرضي من لو من!
ساعدوني وشوروا علي