[Rania Negm]

السلام عليكم ورحمة الله وبركاته

بعد عنااااااء طويل مع رحلة الحمل الحمدلله رب العالمين

الله كرمنى بنور عينى اللى تعب معايا وهو فى بطنى يمكن أكتر منى كمان

بنات والله ما كتبت قصة ولادتى إلا لأوفى حق دكتورتى عليا الله يكرمها ويبارك فى عمرها

ولأفيد بنات جدة بنصحهن بالولادة فى مستشفى السعودى الألمانى وخصوصا المتابعة والولادة مع دكتور منى نبيل ربنا يكرمها ياااااارب

انا مقدرتهاش طول فترة المتابعة ولا قدرت ذكائها وحنيتها وذوقها غير لما تم حملى على خير وتمت ولادتى بفضل الله

من الشهر الخامس وجالى ضغط حمل والله المستعان

فكان هو ده أخطر حاجة بمر بيها طول شهور حملى

وفعلا ليلة الولادة كان ميعاد الكشف الاسبوعى العادى فى الاسبوع التانى من الشهر التاسع

يومها كان المفروض لأول مرة هجرب كشف النسا

كنت مؤهلة وراحة فرحانة بنفسى وناوية اخلص الكشف واخرج اروح سوبر ماركت واعمل شوبنج أنا وزوجى

سبحان الله

أول ما طلعت على سرير الكشف جاتلى حالة ذعر وخوف رهييييييييبة

وعضلاتى تشنجنت وجسمى ارتعش

والدكتورة الله يباركلها واقفة لابسة القفاز بتاع الكشف ومنتظرانى يمكن أهدى

وهى تكلمنى بهدوء وتطمنى ان الامر بسيط

وقفت انتظرتنى رغم الزحام الرهيب فى العيادة .. كان الكشف ضرورى لأن جالى فى نهاية الحمل سكر حمل والبيبى كبر حجمه جدا وكانت بتطمن على ان الحوض ممكن يعدى البيبى

بعد ماتم الكشف كنت برتجف جداا ومرعوبة

الدكتورة قالت بهدوء البيبى راسه منزلتش الحوض

وبعد قياس الضغط .. ارتفع ضغطى وكان 160/110

وقالتلى هتتحجزى فورا فى المستشفى نعلق محاليل تنزل الضغط ونتابع البيبى على جهاز التخطيط وننتظر للصباح لو البيبى راسه نزلت الحوض نديكى طلق صناعى وتولدى طبيعى

انا فجأة انهرت فى العيااااط وأعصابى اتدمرت وقلتلها لا لا لا ارجوكى لااء بلاش ولاده طبيعى انا عاوزة سيزيريان

برغم انى طول الحمل مؤهلة للطبيعى واتكلمت مع دكتورتى على طريقة التوليد والبنج فى الطبيعى

لكن كان عندى حالة رعب فجائية

الدكتورة ربنا يكرمها اتكلمت معايا كتير وحاولت تهدى فيا وتطمنى وقالتلى اللى انتى عاوزاه هعملهولك وذكرتنى بالله وذكرتنى بالبيبى انى هشوفه بكره وقالتلى فكرى هتلبسيه ايه وفكرى فى شكله

حسيت انها مامتى او اختى الكبيرة

لما طلعت قسم الولادة واتحجزت هى جاتلى بعد ما العيادة بتاعتها انتهت واطمنت عليا وكلمتنى تانى وهدت فيا أكتر وطلبتلى عصير

وطبعا ممنوع الرجال يدخلوا القسم ده

لكن كانت الدنيا فاضية فسألتنى زوجك شافك ؟؟ قلتلها لااء

طلبت من السيستر إنها تدخلى زوجى 10 دقايق

تانى يوم فى الصباح كان ميعاد ولادتى 10 ظهرا

هى كانت موجودة من الساعة 8 ودخلتلى أكتر من مرة مع إن المفروض هى موش تجيلى

التقرير بيوصلها فين ما تكون

وقبل ما ادخل العمليات قالتلى هجيبلك زوجك يشوفك عشان هندخل العمليات وفعلا دخلى واتكلم معايا

وفى غرفة العمليات قمة الحنااااان كانت هيا

كانت ماسكة إيدى وهم يركبو ليا المحاليل وكانت تكلمنى وتهرج معايا

ولما السيستر جت ترفع هدومى وينيمونى فى وضع الولادة هى رفضت قالت لما يدخل دكتور البنج وتتبنج

والحمدلله صحيت من التخدير وانا ناسية فى ايه حصل

كانت ايدى على بطنى وانا نايمة لاقيتها طرية وفاشة

عرفت انى ولدت افتكرررررررررررت

رحت فضلت أصوت بئى لما حسيت بالألم لحد ما اخدت مسكن ومفعوله اشتغل

وطبعا لأنها متفهمة لحالتى " هى انا سمعاها بتقول للدكاترة اللى معاها فيما معناه عن حالتى : خوف زائد وضغط عالى "

لانها متفهمة لحالتى لما خيطتلى مكان العملية كان نوع الخيط يذوب لحاله ياعنى بدون فك سلك

عشان هى عرفت انى موش هتحمل الموقف ده

فعلا يابنات دكتورة رائعة ربنا يكرمها ويريح قلبها زى ما ريحتنى