منتديات حوامل النسائية - تجربتي مع تنقيص وزني وطريقة ريجيمي

السلام عليكم ورحمة الله وبركاته

ما رح اطول بالتفاصيل رح ابدأ معكن مشواري مع التنحيف والريجيم على طول
انا كان وزني وصل لل 94 كيلو وكيف ما بعرف صرت اكل باليوم حوالي 6 وجبات وكلها اكل جاهز
المهم من بعدها قررت اهتم بحالي >> بدري hwaml5

صرت اخفف اكل بس واحاول اكل من اكل البيت واخفف قد ما بقدر اكل جاهز من المطاعم المهم نقص وزني لل 89 كتير انبسطت بهالوقت اتقدملي عريس ( زوجي حاليا )
وزوجي يموووت بالنحف لما سألني عن وزني قلتله بأول الثمانينات وطبعا هو ببلد وانا ببلد يعني ما شافني .. صار الضغط علي اكبر كان معي شهر واحد بس لعند ما يشوفني بديت اخفف اكتر من اكلي ووصلت لل 85 كيلو بس مش اكتر
المهم لما شافني زوجي قاللي لازم تنحفي .. قلتله انا اصلا مقرره وعامله تخفيف من قبل لانه انا مش راضيه على شكلي هيك خصوصا لسه ما حملت حتى

واتزوجنا وكملت التخفيف حتى وصلت لل 82 كيلو ومن بعدها ما عاد ينزل وزني ابدا حتى صرت اكل وجبه وحده بس يوميا واجوع كتير بس ما كان ينزل ابدا

قررت اروح اختصاصية تغذيه اشوف شو المشكله
قالتلي بعد الفحص انه اللي نحفته كان كتير كويس لكن الباقي عندي دهون مخزنه وهيدي صعبه كتير انها تنزل الا بريجيم خاص
وبديت معها وما زالت ماشيه معها بالريجيم انا اليوم صار وزني 77 كيلو وكتير مبسوطه فيه ورح اكمل لعند ما اوصل ال 60 ان شاء الله مع انه هي قالتلي لو وصلتي لل 65 رح يكون ممتاز كمان لطولي لانه طولي 166 سم ..

اما بالنسبه للنظام اللي مشتني عليه رح يكون كالتالي في حالة حبيتوا تمشوا عليه معي كمان hwaml8

الساعه 9 : شريحة توست اسمر بالشوفان مع 2 ملعقه طعام لبنه عاديه .. وممكن استبدال اللبنه ببيضه مسلوقه او مقليه بدون زيت انا صرت اغير كل يوم
تاكلي معها 1 خيار او خس او جرجير >> انا اكلت خيار

الساعه 12 : تاكلي تفاحه او حبه كلمنتين

الساعه 2 : وجبة الغدا تختاري وحده من الوجبات التاليه :

1- 3 ملاعق سكب ( كفاكير ) او ملاعق الكبيره لغرف الطعام من اللوبياء بزيت او الهندباء ( ينطبخوا بقلي البصل المفروم مع الثوم المفروم والكزبره المفرومه وملعقة زيت واحده فقط ) + نص رغيف اسمر + صحن سلطه خضراء مع ملعقه زيت زيتون صغيره

2- 200 غرام من الدجاج >> ممكن يكون شيش طاووق او اسكالوب او فاهيتا او مطبوخ عالطريقه الصينيه على حسب ذوقك ممكن تغيري + 1 توست شوفان او نص رغيف اسمر + صحن سلطة خضراء مع ملعقة زيت زيتون صغيره
ممكن استبدال الدجاج بعلبة تونه لايت بالماء

3- 2 ملعقة غرف طعام من اليخنه ( الايدام ) بس مو اي يخنه محدد ب ( قرنبيط - ملوخيه - سبانخ - ارضي شوكي - لوبيا ) + ملعقة غرف ارز بسمتي مسلوق

4- 3 ملاعق غرف كبيره من شوربة الخضار او العدس + سلطه خضراء مع ملعقه زيت زيتون صغيره

الساعه 5 : حبة تفاحه او حبة كلمنتين

الساعه 8 : اتوست شوفان + ملعقه لبنه + حبة تفاحه او حبة كلمنتين وممكن استبدال اللبنه بعلبة تونه لايت بالماء بس الصغيره اظن وزنها 60 غرام والله نسيت

ملاحظات مهمه :

الخضار اللي نستعملها هي الخس الخيار الجرجير البقدونس البصل الاخضر او العادي الثوم الكرفس الكراث البروكلي الكوسا الجزر

الابتعاد عن البندوره ( الطماطم ) فتره النظام لانه بتساعد على تخزين الدهون

شرب القهوه والشاي بدون سكر

الفواكه محدده بحبة تفاحه او كلمنتين بس

ممكن استبدال السلطه بالتبوله بس من غير بندوره ( طماطم ) بس انا ما حبيتها بقيت عالسلطه

لازم تمشي او تمارسي رياضه او ترقصي كل يوم ساعه وافضل وقت رح يكون بالصباح بعد شرب القهوه وقبل الافطار

طبعا هي اعطتني الساعات اللي اكل فيها على حسب مواعيد نومي وانتي غيريها على حسب مواعيدك
انا مثلا اصحى كل يوم ما بين 6 ونص لل 7 ونص وانام عال 10 ونص او 11 ..

هالنظام رح تمشي عليه لمدة 3 اسابيع فقط رح يعمل على تدويب الشحوم المخزنه وفعلا اول مابديت فيه نزلت 2 كيلو ب 3 ايام من بعدها وقف وزني ما نزل كلمتها قالتلي عادي بس اهم شي استمري .. وفعلا صرت انقص كل يوم نص كيلو حاليا

هي قالتلي ما تقيسي وزنك كل يوم بس ما سمعت كلامها لانه هالشي بشجعني اني استمر واقاوم مغريات الاكل خصوصا بجمعاتنا العائليه واشوف المحمر والمشمر hwaml9 وما اكل ولا لقمه

بالنسبه لاي سؤال عن اي اكله او اي شي بخصوص النظام اسألوني hwaml7

عندي موعد مع اختصايه التغذيه مره تانيه يوم الاربعاء القادم .. هي قالتلي لازم اقل شي ينزل من دهون جسمك ما بين 4 الى 5 كيلو طبعا هالشي من دهون جسمي ومش من الماء او العضلات و هالشي بينعرف من الجهاز اللي عندها انا طلع عندي 40 بالميه من وزني كله دهوووون hwaml4

مين رح يمشي معي بالنظام hwaml03