منتديات حوامل النسائية - تجربة زواج من خطابة

السلام عليكم ورحمة الله وبركاته

أنا عضوة جديدة في منتداكم وأود طرح بعض الخواطر التي سمعتها من بعض صديقاتي ومنها أشياء حدثث في العائلة ولكم في كل سطر فائدة و درس جديد

حكاية 1

قصة طلاق أخي

عمره 31

لايدخن وجامعي وموظف و طيب لكنه عصبي

كان يبغى يتزوج وجلسنا نبحث طويلا عن فتاة أحلامه ولكن

له صفات معينة أتعبنا و تعبت أبواب الجيران و الأقارب و المعارف وكل مايشوف بنت قال ماعجبتني

أخيرا تعرف على خطابه عن طريق وحدة من زميلاتي

الخطابة طبعا عندها مجلد كبير فيه معجم يحتوي على بنات بجميع الصفات والمقاسات

قلتلها أخويا الغالي يبغى بنت لاهي طويلة ولا قصيرة
لاهي متينة ولاهي نحيفه
لاهي بيضة ولاهي سمرا
لاهي ممشوقة ولاصعلوكه
شعرها ماهو طويل ولا قصير
خشمها لاهو كبير ولا صغير
عيونها تشبه عيون سفنج بوب كبيرة

والمهم طبعا الخطابه بسرعة قالت موجودة !!

ناس طيبين حلوين مؤدبين يعملو مجالس ذكر وخيرهم كثير وبناتهم يلبسو عبايات على الراس

قلنا بسسسسس هيا دي فتاة أحلامه

راح شافها عجبته وخلاص الرجال مو قادر ينسى شكلها

نقله أسأل عنهم يقول شكلهم طيبين مرة والبنت حلوة مرة فأنا ماراح اسأل مرة

بعد كذا أختلفنا في المهر و القاعة وهوا ضغط على نفسه وأخذ قرض وأتزوج وهوا على الحديدة

وكل ماكان يقلها ترى أنا حأكون على الحديدة بعد الزواج تقله أنا حأصبر عليك وأكبس رجولك كل يوم

المهم أتنيل واتزوجها وقلنا الحمد لله كان عندنا حالة استنفار أمني وانتهت

وبالفعل البنت طيبة معانا كلنا وكانت راضية بقسمتها وعايشة معاه على ماقسم

وبدأت كل كم يوم تقله ابغى اروح عند أهلي وهوا يوديها

ويوم ورا يوم بدأت تتغير عليه و كأنها ندمانه على شيء

وفي أحد الأيام خرج من وظيفته لسبب قاهر نقص الراتب وما الى ذلك

ماكان منها الا أن تبكي وكأنه انتهى رزق زوجها

كان يحاول يطمنها يقلها انا ان شاء الله سأجد عمل أفضل

وفي نفس تلك الظروف كان أخي يحاول يقلل المصاريف عشان مايحتاج لأحد

وكانت تبغى هدية مولود بمناسبة ولادة زوجت أخوها

نزل أخويا الطيب لأختي في بيتها وكان يبغى يعمل فورمات للابتوب حقها وسألته ماشاء الله وين رايح ؟

قال زوجتي أخوها جاله ولد ورايحين نباركلهم ....

قالت أجل اسمع لاتشتري هدايا تعال فوق دولابي برج هدايا جديدة خذلك منهم وغلفها ومشي حالك انت ماعندك وظيفة دحين

قال طيب يعني مافيها شي ؟ قالت أختي لا ماعليك كل العالم تسويها

وراح أخويا غلفها وطلع البيت وقلها أشتريت هدية وهيا مرة فرحت وراحت قدمت الهدية ونزلت من عند أخوها وهيا جدا راضية

أخويا وهما راجعين حاسس بتأنيب الضمير ويقول في نفسه ماينفع أكذب على شريكة حياتي خليني أصارحها (ماعنده خبرة )

المهم فتح معاها الموضوع واتفاجئ انها زعلت وصارت تقول بصوت عالي اصلا انا عارفة انها هدية ابو كلب !

لمن وصل البيت صار يحاول يكلمها وهيا تعطيه ظهرها وراحت تنام في الصالة

راح المسكين يبغى يرضيها بكلمتين برضها ماتبغى تسمع

المهم عمل نفسه راح ينام

رفعت الجوال على أمها وقالت لها كل شي

أمها رسمت لها خطة انها تقول له في الصباح وصلني الجامعة عندي مراجعة وأخذت الذهب وكل شي مهم في شنطة الجامعة
ومن الجامعة أمها أرسلت لها السواق ياخذها على بيت أهلها بدون علمه

صار أخويا يتصل على البنت ماترد
اتصل على أبوها مايرد
اتصل على أمها ماترد

هوا عرف انها خلاص راحت عند أهلها وأخذت معاها جوال أخويا القديم كان حاطه في المكتب من زمان

المهم فتحت الجوال ولقيت ارقام بنات ورسايل

زاد زعلها وصارت المشكلة أكبر

طبعا أخويا ماهو داري عن حكاية الجوال ولا ردت عليه ولا عاتبته

بعد كم يوم ارسلت له رساله تقول ياخسيس يازاني ياحق الحريم
وكلام كبير جدا

أخويا مرة ماقدر يتمالك أعصابه وخرج يفحط بالسيارة على بيتهم

لمن وصل هناك لقى أخوها ينتظره ومعاه مسدس

قال له أطلع برة ولا لك شي عندنا وبيننا وبينك المحكمة

قلهم طيب أبغى أكلم زوجتي هيا فاهمة غلط ولكن ماهم سامحين له يكلمها ولا مصدقين كلمة من اللي يقوله

جلست البنت عند أهلها سنة وشهرين حاولنا نصلح الموضوع ولكنها غلطانة وتبغى شماعة تعلق غلطها فيه

وأخويا يقول هذا شي كان ماضي وفترة وانتهت وانا ناسي انه في شي في الجوال

طبعا راحو عند الناس قالو انه فيه ومايخطيه وتشويه سمعة عشان ماتطلع بنتهم الغلطانه ويلومهم الناس

أخويا راح فضح كل شي عند أقاربها وأرحامها وصديقاتها باقي بس يعلق مطويات في المساجد

بعد 15 شهر اتصلت أمها على أمي قالت اذا يبغى البنت يرجعها بشروط

الشرط الاول يعمل عزيمة للعيلة كاملة و يتأسف ويقول أنا الغلطان

الثاني يسكنها قريب من بيت أهلها

الثالث يعطيها مصروف شهري 1000 ريال

الرابع تدفع جميع مصاريف جوالها والهدايا و الجامعة

أخويا طبعا رفض وقال يعني صحيح انا صرفت كل اللي عندي عليها
وماعندي اتزوج غيرها

بس كرامتي أهم منها و طلقها طلقة واحدة بصك

قالوا الناس أقوال منها

هي ماتحبك من البداية وفي بالها واحد غيرك

أهلها ماهم رجال عشان يوقفوا بصفها

تبغى تتخلص منك وماهي لاقية حجة

وأنا أقول انه ثلاثة أشهر ماكان هناك الوقت الكافي للتفاهم

أطلت عليكم ولكن دمتم بود ,,,,