طفلي والشرقة
 

السلام عليكم
ياليت تفيدوني بنصايحكم حبيباتي
ولدي عمره شهر وخمس أيام من قبل اسبوعين وشوي شربته بالرضاعه موية وشرق منها شرقه قوية يالله رد نفسه ومن عقبها صار كلما شرب مويه يشرق وإذا خلص راضع حليب او موية يطلع صوت من حلقه وكأن فيه حليب باقي في حلقه مابلعه ومايبلع الحليب كويس بعد ماأوخر الرضاعه ألقى الحليب في فمه لازم أمسك حنكه من تحت عشان يتذكر البلع ويبلع والخشم أكثر الوقت مسدود وأنواع الشخير في الليل وإذا نام أحس حلقه ناشف يبلع ريقه ويكح وديته للطبيب قال المشكله كلها في الأنف بعض الأطفال يولدون وفتحة الأنف من جوا صغيرة عشان كذا ينسد ويخليه يشرق ومع الايام بتتعدل اموره عطاني محلول ملحي للأنف بس مافادته مازال فيه صوت حليب في حلقه بعد الرضاعة والموية قال لاتشربيه موية يكفيه المويه اللي في الحليب وديته طبيب ثاني لما استمرت المشكله قال ممكن عضلات المريء عنده لس ضعيفة عشان كذا يرجع الحليب من المعدة للحلق واذا استمرت هالحالة تعالي نسوي له اشعة ممكن يكون فيه عيب خلقي وكشف على حلقه قال فيه شوية احتقان وعطاني له مضاد استخدمه عند الحاجة لان موزين كثرة الادوية لطفل بعمره الان حالته يوم تتحسن ويوم تنتكس والصوت مازال يطلع من الحلق بعد الرضاعة والشرقة مازالت مستمرة والموية منعها عنه وانا والله يجيني خوف من الشرقة كل ماجيت ارضعه ومع كل رضعه تنتهي اشيل هم الرضعه الثانية والله معاناة وتعب نفسي غيرت اكثر من عشر مرات حلم الرضاعة والحليب ماأعطيه اياه الا دافي ياجماعه من حصل لطفلها لاسمح الله مثل هالمشكلة او سمعت عنها تفيدني بالحل الله لايوريكم مكروه والله يشفي طفلي ويعافيه

رد: طفلي والشرقة
 

والله ياقلبي انا ولدي اذا شربة موية يتهاوع والشرقة هذي اكثر من مرة يشرق مدري وش السالف الله يشفي ولدك ولدي وجميع اطفال المسلمين ودية دكتور استشاري انف حنجرة وان شاء الله يبين وش عنده

رد: طفلي والشرقة
 

4يو جزاك الله خير عالرد
أنا وديته استشاري جهاز هضمي وقال اذا استمرت هالمشكلة يحتاج نسوي اشعة بس أشوف توه صغير على الأشعة
الله ينزل عليه شفاء من عنده بدون استشارة أي دكتور
ألف شكر ياأم فهد ويحفظ لك أطفالك يارب

رد: طفلي والشرقة
 

انا ولدي وهو نايم يشرق
واذا صاااح كثير بعد ما يهدا اسمع صوت بنفسه زنفس الحاله اذا رضعته

رد: طفلي والشرقة
 

الله يحفظ لك صالح ويحميه
طيب وش تسوين ياأم صالح عشان يروح هالصوت ؟

رد: طفلي والشرقة
 

حبيبتي حرام عليك تعطينه مضاد او تفكرين فيه في ذا السن

انا بنتي شهر ونص نفس حالة ولدك بس طبيعي جدا تأكدي بس ان ثومة الرضاعه مو كبيره واذا من صدرك حاولي ما تدرين الحليب في فمه بكثره
وربي بنتي مثله حطت امي في انفها من الشخير والسدد نقطة زيت زيتون وراحت على طول ونامت براحه
حبيبتي اصبري عليه لين يكبر شوي ويكبر حلقه ويروح هذا كله

ما يشوف باس يارب

رد: طفلي والشرقة
 

ما اعطيه ولا اسوي له
الشكوى لله مع الصوت هذا مااا ره مخوفني

رد: طفلي والشرقة
 

حلاا مشكورة على ردك وربي يحفظ لك بنتك ويخليها
يارب يكون طبيعي ومع الأيام تتعدل أموره
بالنسبة للحلمة أنا أشيك على الحلمة كل فترة حتى غطاء الرضاعه أكون حريصه على أنها تكون مسكرة عدل
على فكرة عشان يروح السدد اللي في الأنف قال لي استشاري الأطفال أخطر شي تحطين زيت في أنفه لأن الزيت خفيف يوصل للحلق ويشرق يقول حطي شوي فازلين على حوايف الأنف من داخل يلين السدد وينزل دامه نفعها فالحمدلله بس حبيت أقولك للحرص وربي يديم عليها العافية

رد: طفلي والشرقة
 

أم صالح
الله يطمن قلبك ويحفظ لك ولدك وبإذن الله أنه طبيعي
بما أن حالة ولدك مثل ولدي بأقول لك اللي وصاني عليه الدكتور احرصي وأنت ترضعينه يكون مستوى راسه أعلى من جسمة وبعد مايخلص أهم شي يتجشأ أو يتكرع اللي تسمونه بيخفف هالصوت غير كذا قال خليه مرفوع بعد مايرضع خمس وعشرين دقيقة واذا سمعتي الصوت خليه على جنبه بتلاحظين بإذن الله أنه خف أهم شي تحرصين أنه مايشرق هذي النقطة حرص عليها حتى قال لي لاتعطين شغالة ترضعه عشان مايشرق والله يشفيه ويعافيه

رد: طفلي والشرقة
 

الله يشفية ويحفظة لكي حياتي