منتديات حوامل النسائية - تجربتي مع الحقن المجهري-اول مرة اكتب على المنتديات😛

السلام عليكم سيداتي
انا اول مرة اكتب على اي منتدى عن تجربتي
يمكن ما بحب التفاصيل ويمكن ماكنت حاسة انو رح افيد حد

لكن الان ان شاء الله تفاصيل تجربتي تفيدكم

اولا تزوجت من خمس سنوات ونص اول سنة كنت باخد موانع وبعدين تركتها
ما بتزكر عملتلي اي مشاكل
بعد كم شهر ماصار حمل فرحت عن طبيبة نسائية!!!
للاسف كانت مستعجلة ومعجوقة..... حكتلي اعملي فحوصات الك ولزوجك
فحوصاتي كانت ممتازة وفحوصات زوجي كانت جيدة بس على الحد

وبعدين بلشت الدكتورة توقعات .... عندك تكيس مع العلم دورتي منتظمة وعندي اباضة طبيعية ممتازة خدي جلوكوفاج جرعة كبيرة جدا حولتني لهيكل عظمي!!!
وكل زيارة تعطيني دوا جديد وفيتامينات جديدة وبالاخير عملت عندها IUI او تلقيح صناعي
طبعا ما نجحت

المهم بعدها سافرت انا وزوجي وكملنا دراستنا ونسينا الموضوع
بعد سنة جينا زيارة عالبلد ورحنا على مستشار اخصاب.....هيك يعني نطمن ونقوم بالاسباب
وقتها شبه انصدمنا .... تحليل زوجي طلع ضعيف كتير وما بينفع معنا غير تلقيح مجهري او ICSI!!!

روحنا على بلدنا وقررنا نبلش علاج بعد 5 سنوات زواج
اندلينا على دكتورة لسه بتتخصص استشارة اخصاب
كتييييير رايقة وحبابة ومطلعة على التقنيات الجديدة
وشو ما بتساليها بتجاوب ومؤدبة كتير بالكلام والفحص

المهم بلشت معها اخد فيتامينات pregnacare conception وزوجي برضو اخد فيتامينات proxeed .... صراحة غاليين شوي

اول شهر جربت معها طبيعي.....انا متاكدة انه ماحيصير حمل بس هي حبت تشوف استجابة جسمي وهيك
بعدين عملنا كمانIUI ....برضو انا متاكدة انو ماحيصير شي

المهم بعد شهرين بلشنا الحقن المجهري
اول يوم اخدت فيه ابر التنشيط صار عندي حساسية وحرارة ورعشة واستفراغ....كتيييير كان سيء وما ارتحت الا لما المستشفى اعطوني منوم!!
بعدين جسمي تعود عالمنشطات
ضليت متوجعة وبطني كبير.....لدرجة صاحبتي فكرتني حامل😂💔

المهم وصلنا لسحب البويضات وتلقح عدد منيح ورحعنا 2 درجة اولى
كان عندي تكيسات في المبايض من باقي التنشيط وكنت كتير تعبانة وصراحة ما توقعت تنجح
وفعلا مانجحت!!
الحمدلله لعله خير واكيد حكمة رب العالمين حتى الدكتورة بتقلي كنا متفاجئين في المختبر كيف ما زبط

قررت اني اخد بريك شهر وبعدين كان رمضان فارتحت جسديا ونفسيا ودعيت ربنا كتير وعاهدت ربنا اني ارضى بقضاؤه لانه اكيد ارحم فيي من حالي

هداك الشهر ما اخدت ادوية ولا اشي .... عاشر يوم الدورة بعد ما طهرت عملت حجامة عامة على كل الظهر وطلع كتير دم وقتها!!
وبرضو عملتلي الدكتورة قفلة الظهر ....اللي هي كاسات هوا اسفل الظهر

بعدها بيومين ضليت دايخة ومرهقة وبعدين رجعت طبيعي
رح عن طبيبتي يوم 13 وكان عندي اباضة طبيعية وسماكة رحم ممتازة فقالتلي بدي اعطيك ابرة تفجير مشان نتاكد من موعد الاباضة واعملك ارجاع اجنة

رحعت جنينين
خلال 10 ايام كنت اخد اسبرين وكوروتروب واستروفيم وتحاميل بروجيسترون....كان بطني عبارة عن بلون!!!!

وكنت احس باوجاع شديدة زي شد في الرحم ووجع ظهر مو طبيعي

ضليت اربع ايام على ضهري وما اقوم الا للصلاة او الحمام
بعدين صرت اقوم عادي بس بهدوء وما اشيل اشياء تقيلة واعمل اشياء متعبة

اليوم العاشر حللت دم .... قلت لزوجي هو يروح يجيب التحليل ....مابدي انا!!
وطلعت حامل 😍

تخيلت انو التوتر والانتظار مرحلة عدت.....بس طلع بين كل زيارة للدكتورة توتر واعصاب!!!
الحمدلله هلا كملت 6 اسابيع وشفنا كيس رحم وبدايات جنين
وان شاء الاسبوع الجاي بشوف نبض❤

اتمنى تستفيدو من تجربتي واي سؤال انا جاهزة

الله يرزقنا كلنا اولاد صالحين 🌹