منتديات حوامل النسائية - قصتي بالحمل و ولادتي ب حبيبي "خالد"

بسم الله الرحمن الرحيم

السلام عليكم ورحمة الله وبركاته

في تاريخ 17 / ذو الحجة / 1434 هـ
الموافق 22 / اكتوبر / 2013 م

رب العالمين رزقني بأول طفل لي حبيب قلبي و نور عيني (( خـــالـــد )) hwaml13
الله يحفظه و يرزقني بره إن شاء الله

و ولدت بمستشفى السلمانيه في المنامه / البحرين

الساعه 4 و ثلث العصر

~ ~ ~ ~ ~ ~ ~ ~ ~ ~ ~ ~ ~ ~ ~

قــصه الـحــمــل :

الحمدلله رب العالمين مسألة الحمل كانت شوي صعبة في البداية
والسبب ارتفاع هرمون الحليب قبل الزواج ، وحملت في الشهر الرابع
ولكن الحمدلله على كل حال الحمل ماثبت وطرحت كان عمره اسبوعين فقط

بعدها اكتشفت ان فيني تكيس بعيد الشر عنكم، و لمدة سنة جربت كل شي
أدوية ( كلوميد، حبوب تنظيم الدورة ، إلخ ) و حجامه و تمسد <--- تمريخ باللهجة السعودية
المهم اني تعبت نفسياً .. وكنت كل مرة تتأخر الدورة اروح احلل ويطلع لي سالب.

وفي رمضان سنة 2012 كان في برنامج عن الطب النبوي في قناة البحرين
و اتصلت بنت حالتها مثلي بالضبط وعطاها الحل ..

(( القسط الهندي ))

لكن للأسف ماطبقته على طول لكن الموضوع كان ببالي ولا فارقني
و على بدايه السنة الميلاديه 2013 استخدمته لمدة 14 يوم بنية تطبيق سنة الرسول
والحمل بإذن الله، والحمدلله حملت على طول !

في النهاية راح احط لكم الطريقة ..

وابتدينا بالنساة ( الوحـام ) .. الحمدلله كانت سهالات ماكنت ارجّع ( قيء ) ولا لوعه
لكن النوم كان شي مو طبيعي !!
وتخيلوا لدرجة اني مرة نمت في الدوام ودخلت علي مسئولتي ولا حسيت فيها !!
و ارجع البيت وعلى ماانتظر الغدا تجهزه الشغاله انام وبعد الغدا انام 5 ساعات تقريباً
واصحى 7 او 8 بالليل .. وعالساعه 12 او 1 ارجع انام !!!

المهم اني تعبت في حملي والسبب اكرمتوا "التهاب البول" كان من بداية الحمل موجود
لكن تعالجت واختفى لحد الشهر السادس .. من اول مادخلت فيه وابدت المعاناة hwaml15

طبعاً كل شهر من بعد السادس كنت اتنوم بالمستشفى بسبب الالتهاب
كان الالم يصيدني فجأة خفيف بالبدايه واحاول استحمل اقول يمكن نمت غلط
كان يزيد ويزيد واوصل لمرحلة ان خلاص ودوني الدختر ( المستشفى )
وكالعادة اترقد لمدة اسبوع والسيلان صار كأنه شريان في جسمي ويرخصوني ويعطوني
نفس المضــاد ( zinnat ) .. الحمدلله

وصلت إلى نهاية الثامن وانا على نفس الحاله لكن صار بدل الألم .. سخونه على طول
وجفاف وضغطي نازل ولحد التاسع

موعد ولادتي كان تاريخ 27 / 10 / 2013
لكني جدمت 6 ايام ..

~ ~ ~ ~ ~ ~ ~ ~ ~ ~ ~ ~ ~ ~ ~

ببتدي بقصة ولادتي في الرد الثاني ..

رجاءً لا احد يكتب تعليق لحد ما انتهي وشكراً