|
اللي جربوا مستشفى الحرس بالرياض افيدونا
السلام عليكم
حبيت اسأل اللي جربت ولاده بمستشفى الحرس بالرياض.. كيف توليدهم ؟ وكيف عنايتهم بالام والطفل؟؟ وكيف غرفهم مريحه والا ازعاج؟؟ وهل فيه غرف خاصه؟ وحبيت اسأل عن خياطتهم كويسه ؟ والا مشي حالك ؟ وهل عندهم خياطه تجميليه؟؟ وياريت تخبرونا كل شي بالتفصيل لاني بكريه وماحصلت احد يفيدني عنه .. سمعت اللي يمدحه مرااا والا الي يسبه !!! ربي يوفقكم جميعا ويسهل جميع اموركم .. |
رد: اللي جربوا مستشفى الحرس بالرياض افيدونا
وانا اتمنى تفيدوني عن مستشفى الحرس الوطني بجده وتعاملهم لاني بكريه بليز
اب الموضوع |
رد: اللي جربوا مستشفى الحرس بالرياض افيدونا
اهلييين ،، انا والده بمستشفى الحرس صراحه مستشفى راقي بالنسبه للمستشفيات الحكوميه
اول حاجه قبل الولاده دخلوني بغرفه كبيره مقسمه بستاير كل مريضه لحالها وعندها ممرضه تخدمها وتابع حالتها ملابسك اغراضك تبقى معك مايصادرونها مثل المستشفيات الباقيه بس تحطها لك الممرضه بكيس وتحطها معك ،، شنطة الولاده ماتحتاجينها الان لانهم يلبسونك قميص مفتوح ،، طبعا دكتوره رايحه ودكتوره جايه طلبة مسكن وعطوني لاني طووووولت بالكششك عطوني ابره بالفخذ ريحتني شوي وخلتني انام بين الطلق جت الولاده ونقلتني ممرضه على عربيه لغرفة الولاده غرفه خاصه بحمامها الله يكرمك للاسف فيهم عيب الكل يشتكي منه لازم يدخل عليك دكتور ويقول انا اللي بولدك بس انا رفضضضته قالي مافي غيري قلت عادي وطلع من عندي وبعد ساعه جتني قابله وانا توي ماجت الولاده صدق وتعبببت مرره وطلبت امي ودخلت عندي وطلبت ابرة الظهر وعطوني كان الدكتور مرررره شاااطر والحمدالله ارتحت ونمت كم ساعه بحزة الولاده جت كذا ممرضه تساعدني ومع القابله والحمدالله تمت الولاده وبدينا بالخياطه ماكنت احس فيها لاني ماخذه ابره حسيت بالغرزه الاخيره وكانت خياطه داخليه وخارجيه دكتورتين اللي خيطوني وحده داخلي ووحده خارجي بنتي اخذوها عندي بالغرفه بس بسرير لحالها ينظفونها ويلفونها من عندهم ماطلبو ملابسها وعطونيها ارضعها واشوفها بعدها دخل زوجي وطلعت امي وجلس معي عشر دقايق لاني قلت لهم ابي يشوفها لو طلع فوق خلاص من ورا القزاز يشوفها اتذكر الممرضه كانت ترتبني قبل لايدخل زوجي بعدين اخذو البنت للوزن ولدكتور يشوفها وانا خلوني اتعشى وارتاح بعدها دخلتني الحمام الله يكرمك ودخلت معي هي وغسلتني ونظفتني وغيرتلي ملابسي الى درجة الفوطه الله يكرمك لبستني لان اختل عندي التوازن بعد الكرشه والتعب لي يومين ولاده ، بعدين رحت الغرفه ارتحت ونمت جت الممرضه شافتني نايمه ودة البنت للحضانه وبس قمت جابوها كنت بغرفه مشتركه ماكان فيه ازعاج عادي الفطور وممرضه عندك بنفس الغرفه وجتني دكتوره تشوف خيوطي وبعدين جتني دكتورة الاطفال تشوف بنتي هذا كله الضحى وبعدها ماشفت احد لوقت الزياره موفرين لي فوط وملابس داخليه عند سريري وجاني الصيدلي صرفلي كريمات وادويه والعصر طلبة الشنطه من زوجي غيرة ملابسهم وترتبت ،، بنتي تركوها يومين بالحضانه لان معها صفار وكنت اروح ارضعها وماطلبو لها ملابس الابوقة الطلعه ،، يعطونك موعدبعد اسبوع للخياطه يشيكون عليها ، الغرف الخاصه ماادري كيف وضعها للحالات الخاصه او اللي بفلوس بس احس ضيقة صدر ومالها داعي لان من بكرا يطلعونك وبتمليين ماجت الزياره ،، الله يسهلك ويهون عليك |
رد: اللي جربوا مستشفى الحرس بالرياض افيدونا
عن تجربتي اللي ماكملت شهرين جبت بنتي بيوم5/20 بالهجري
كنت قبل اولد مثلكم ماتركت منتدي إلا ودورت فيه عن تجارب الامهات بمستشفى الحرس بالرياض وماكان فيه راي واحد يتفقون عليه ناس تمدح وناس تذم .. كنت ابي اولد بمستشفى اليمامه لانو مجربته ومرتاحه نفسيا له لاكن زوجي اصر علي نولد بالحرس لانهم دقيقين حتى بوقت المراجعه ونظيف واهم شي قريب مننا استخرت ربي والخيره من عنده . رحت لهم بالطوارى وانا متخوفه وكنت توي احس بطلق خفيف دخلوني وزينوا اوراقي وحطوني بغرفه مقسسومه بستاير بينك وبين الغرف الثانيه اخذوا تحليل البول وجابو كيس تحطي فيه عباتك وملابسسك ونوموني وحطوا التخطيط علي وقدامي ممرضه جالسسه اذكر انو طلبت مويه وجابتلي عصير تفاح وجاء الدكتور يمر على الغرف ويكششف ..لما جت الولاده دفوني بكرسسي لغرفه الولاده غرفه وفيها دورة مياه مايكون معك اي مريضه ثانيه ..الله يسعدها الممرضه لما قلت منو بيولدني قالت دكتور اللي كشف عليك بيولدك قلت لها مابي دكتور ابي دكتوره . طلعت دقايق ورجعت قالت خلاص دكتوره دكتوره .. جت القابله كانت حبوبه سلمت علي وجلست تمزح معي وبعدها عطوني حقنه شرجييه نص سساعه وبعدها بششوي بس حسييت بالدفع فجاءه وقتها كانو قايلين لي معك ساعه ونص وبعدها يحمى الطلق ولا استنيت هالسساعه صارت تنادي الممرضات وجو ثنتين الله يسعدهم وحده كانت ماسسكه يدي تهديني وتقولي كيف ادفع طلعت بنوتي وحطوها بسرير جنبي كنت اشوفها تمسسحها وقالت الممرضه بنعطيك ابره في الفخذ مسكن بنطلع المشيمه و للخياطه وطلبت اني الف وجهي يم بنتي وهي تخيط ولا حسييت فيها ابد بعد ماخلصت الخياطه حطوا البنت معي ورضعتها نصف سساعه بعدين شالوها . وقوموني لدورة الميياه حتى انهم دخلو معي وكنت رافضه بس اصرت انو هاذا من نظام المششفى غسلتني ولبسستني لبس المشفى حتى الفوطه والملابس الداخليه .. رجعت نومتني على السرير لحد مايطلعوني فوق وسئلتني اذا دايخه ومتى اكلت اخر مره وبعدها جابت لي وجبه خفيفه ,, وطلعوني على غرفه خاصه مع انو ماطلبت شي بس كان حظي حلو فيها بلازما ودورة مياه خاصه فيها غيارات فوط وكلوتات ومرهم للخيوط . جتني الممرضه مرتين تسئلني اذا بدخل دورة المياه وقلت لا . ورجعت جابت لي شااي حاار قالت زين للولاده ووقت مارحت لدورة المياة دخلت معي توريني كيف احط المرهم وكيف اللبس .. ماطلبوا مني ملابس لا لي ولا لبنتي جابوها لي لابسسه ابيض وعليها قبعة الصغار ومعها بامبرز ومناديل يمسحونها فيها .والصبح مر الدكتور وكتب لي على فيتامينات ومرهم حتى حبوب المنع كتبها لي وطلعوني مع اذان العششاء حتى لما طلعت وصلوني انا وبنتي لحد باب السياره مستشفى جد من افضل المستشفيات وتعامل الممرضات رائئئع وعنايتهم حلوه ونظافته ممتازه . كتبت لك تجربتي فيه وانتي استخيري |
رد: اللي جربوا مستشفى الحرس بالرياض افيدونا
اقتباس:
ياحبيلك جزاك الله خييييير على الرد السرريع .. بس بسألك كيف غرزتين هل وحده عاديه والثانيه تجميليه؟؟ وابرة الظهر اسمع يقولون تتعب عقب الولاده ؟؟ ومتى كانت ولادتك؟؟ اعذريني طولت اسأله بس ابي اتطمن ... |
رد: اللي جربوا مستشفى الحرس بالرياض افيدونا
اقتباس:
يعطيك الف عافيه. على سردك للقصه وربي كنت ادور احد يقص لي قصته من البدايه للنهايه .. بس ياقلبي بسألك.. ما اخذتي ابرة ظهر ؟؟ وهل حسيتي بألم؟؟ وبصراحه كنت خايفه من الممرضات العالم يسبونهم سب قووووي. ويقولون كلهم حبشيات 😞 |
رد: اللي جربوا مستشفى الحرس بالرياض افيدونا
هلا معليش تأخرت بالرد ،،
الممرضات مو حبشيات لا امريكيات سمر ،، واللله حبوبااااااات تعاملهم رااااااقي جدااااا انا صارلي والده ست شهور ، ابرة الظهر تعبتني من بكرا ظهري وبعدين خلاص ماعاد حسيت باوجاع ،، والغرز كانت اربع غرز خارجيه والداخليه مدري كم الخارجيه طاحت خيوطها اما الداخليه تذوب وكنت استخدم الكريم اللي صرفوه لي ومع غسول البيتادين ،، الله يرزقك ساعه سهله وميسره يارب وعادي ياقلبي اي سؤال انا حاضره |
رد: اللي جربوا مستشفى الحرس بالرياض افيدونا
وبغيت افيدك بخصوص الممرضات انا ولادتي كانت صعبه وطوييييله دخلت الفجر وماولدة الا الساعه 11 بالليل يعني شفت كذا ممرضه الفجر والعصر والمغرب وبالليل
كلهم ممتازات وخدوماات ،، اهم شي انتي لاتصارخين وتسبينهم انا احسه من اسلوب الحرمه نفسها تعاملتي معهم كويس يصيرون كويسين انا كنت ابكي العصر واصيييح واذكر ربي رحمتني الممرضه وجابتلي المسكن بالفخذ ودلكتني ونومتني على جنب وتغطيني كل شوي وحتى اللي بالغرف مرره كويسات وكل ساعه والثانيه تطل علي من غير ازعاج ،، اتذكر امي لما ولدة باليمامه تقول موتوني الفجر يغيرون المفرش عشان الدكتور ،، بالحرس محد يزعجككك وكنت متطمنه على بنتي مااستلمتها الا وانا بالسياره |
رد: اللي جربوا مستشفى الحرس بالرياض افيدونا
اقتباس:
|
رد: اللي جربوا مستشفى الحرس بالرياض افيدونا
اقتباس:
قولي امين الله يوفقك ويرزقك من واسع فضله وربي انك طمنتيني وتحملتي اسألتي الكثيره الله يسعدك .. انا الان بالاسبوع الثاني من الثامن ربي يهونها |
| الساعة الآن 05:25 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
Search Engine Optimization by vBSEO 3.6.0 (Unregistered)
لا يتحمّل موقع منتديات حوامل النسائية أيّة مسؤوليّة عن المواد الّتي يتم عرضها أو نشرها في موقعنا، ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر .